ଭୁବନେଶ୍ୱର,୭।୯(ଶର୍ମିଷ୍ଠା ପାଣିଗ୍ରାହୀ)ସ୍ବାଧୀନତା ଦିବସ ଅବସରରେ ଟାଇମ୍ସ ସ୍କୋୟାର୍ରେ ପ୍ରଦର୍ଶିତ ହୋଇଥିଲା ଓଡ଼ିଶାର କଳା, ସଂସ୍କୃତି ଓ ଭାସ୍କର୍ଯ୍ୟର ପ୍ରତୀକ ‘କୋଣାର୍କ ଚକ୍ର’ର ପଥର ନିର୍ମିତ ପ୍ରତିକୃତି। ସେଫ୍ ବିକାଶ ଖାନ୍ନାଙ୍କ ଚେଷ୍ଟାରେ ଓଡ଼ିଶାର ଟିମ୍ ଏହାକୁ ସେଠାରେ ପ୍ରଦର୍ଶନ କରିଥିଲେ। ତେବେ ଏହା ପଛରେ ପ୍ରମୁଖ ଭୂମିକା ନେଇଥିଲେ ଟିମ୍ର କ୍ୟୁରେଟର ତଥା ବିଶିଷ୍ଟ ଫିଲ୍ମ ନିର୍ମାତା ଜିତେନ୍ଦ୍ର ମିଶ୍ର ଓ କାରିଗର ଅମରେଶ ଚନ୍ଦ୍ର ବିନ୍ଧାଣୀ। ବୁଧବାର ବକୁଳ ଫାଉଣ୍ଡେଶନ ପକ୍ଷରୁ ଆୟୋଜିତ ଖବରଦାତା ସମ୍ମିଳନୀ ଓ ଭାବବିନିମୟ କାର୍ଯ୍ୟକ୍ରମରେ ଜିତେନ୍ଦ୍ର ଓ ଅମରେଶ ସେମାନଙ୍କ ଅଭିଯାନର ଅନୁଭୂତି ବଖାଣିଥିଲେ। ଫାଉଣ୍ଡେଶନ୍ର ପ୍ରତିଷ୍ଠାତା ସୁଜିତ୍ ମହାପାତ୍ର କାର୍ଯ୍ୟକ୍ରମରେ ପୌରାହିତ୍ୟ କରିଥିବାବେଳେ କୋଣାର୍କ ଚକ୍ରର ପ୍ରତିକୃତି ପ୍ରଦର୍ଶନକୁ ନେଇ ଉପସ୍ଥିତ ଦର୍ଶକ ସେମାନଙ୍କଠାରୁ ପଚାରି ବୁଝିଥିଲେ।
ମିଶ୍ର କହିଥିଲେ, ପ୍ରଥମେ ସେଫ୍ ଖାନ୍ନା ଆଉ ମୁଁ ଯୋଜନା କଲୁ, ମୁଁ ପରେ ଆମ ପଶ୍ଚିମ ଓଡ଼ିଶାର ଜଣେ ଭାଇ ସୁବାସ ଭାଇଙ୍କ ସହ କଥା ହେଲି। ତାଙ୍କ ସହ କଥା ହୋଇ ଡିଜାଇନ ଓ କାମ କେମିତି ହେବ ସେ ସମ୍ପର୍କରେ ଆଲୋଚନା କଲୁ। ପରେ ସେ କାରିଗରଙ୍କ ସହ କଥା କରାଇଲେ। ସମସ୍ତଙ୍କ ଚେଷ୍ଟାରେ ଏହା ପ୍ରସ୍ତୁତ ହେଲା। ନିକଟରେ ସ୍ବାଧୀନତା ଦିବସରେ ଏହା ଟାଇମ୍ସ ସ୍କୋୟାର୍ରେ ପ୍ରଦର୍ଶିତ ହେଲା। ସମସ୍ତଙ୍କ ପ୍ରତିକ୍ରିୟା ବହୁତ ଭଲ ଥିଲା। ଗ୍ଲୋବାଲି ଏହା ପରିଚିତ ହେଲା। ଓଡ଼ିଶାର କଳା, ସଂସ୍କୃତି ସହ ପର୍ଯ୍ୟଟନର ମଧ୍ୟ ପ୍ରଚାର ପ୍ରାସର ହୋଇପାରିଲା। ଓଡ଼ିଶା ପାଇଁ ଯାହା କିଛି ମୋ ଦ୍ୱାରା ସମ୍ଭବ ହୋଇପାରିବ ମୁଁ ତାହା କରିବାକୁ ଚେଷ୍ଟା କରିବି ବୋଲି ସେ ପ୍ରକାଶ କରିଛନ୍ତି। ଅନ୍ୟପକ୍ଷେ କାରିଗର ଅମରେଶ କହିଛନ୍ତି, ପ୍ରଥମେ ତ ମୁଁ ଜାଣି ନ ଥିଲି ଏମିତି କିଛି ହେଉଛି ବୋଲି। ମୁଁ ମୋର ସିନିୟର୍ ସୁବାସ ପୂଜାରୀଙ୍କଠାରି ଜାଣିଲି। ସେ ଆମକୁ ଡିଜାଇନ ବିଷୟରେ ଜଣାଇଲେ। ତା’ପରେ ଆମ ଟିମ୍ର ୮ଜଣ କାରିଗର ଏହାକୁ ପୂର୍ଣ୍ଣାଙ୍ଗ ରୂପ ଦେବାରେ ଲାଗିପଡିଲୁ। ତିଆରି ସରିବା ପରେ ଗତବର୍ଷ ଏହା ନ୍ୟୁୟର୍କରେ ପହଞ୍ଚତ୍ ଥିଲା। କିନ୍ତୁ ନିର୍ଦ୍ଧାରିତ ସମୟଠାରୁ ଡେରି ହେବାରୁ ଏବର୍ଷ ଏହାକୁ ଅନବାରଣ କରାଗଲା। ମୁଁ ପ୍ରଥମଥର ପାଇଁ ବିଶ୍ୱରେ ପ୍ରଦର୍ଶିତ ହେବାକୁ ଥିବା ଏକ କଳାକୃତିର କାମ ପାଇଥିଲି। ଏହି କାମ ଦ୍ୱାରା ଆମ ଓଡ଼ିଶାର କଳା, ସଂସ୍କୃତି ସହ ଆମ ଭଳି କାରିଗରଙ୍କ ପରିଚୟ ବାହାରେ ବୃଦ୍ଧି ପାଇଛି ବୋଲି ମୁଁ ଭାବୁଛି। ଭବିଷ୍ୟତରେ ଆମକୁ ଆହୁରି କାମ ମିଳିବ ବୋଲି ମଧ୍ୟ ଆଶା କରୁଛି। ଯେତେବେଳେ ଏହା ପ୍ରଦର୍ଶିତ ହେଲା ଆଉ ଖବର ପ୍ରସାରିତ ହେଲା, ମୋ ନାମ ଆସିଲା, ଏହା ଦେଖି ମୋତେ ବହୁତ ଖୁସି ଲାଗିଲା। ପୂରା ପରିବାର, ସମ୍ପର୍କୀୟ ସମସ୍ତେ ଖୁସି ହୋଇଥିଲେ। ଏହାର ଓଜନ ୧୭୫୦ କିଲୋଗ୍ରାମ ରହିଛି। ୮ଫୁଟ ଲମ୍ବ ୬ଫୁଟ ଉଚ୍ଚ ଏବଂ ୧ଫୁଟ ମୋଟେଇ ବିଶିଷ୍ଟ ଏହି ପ୍ରତିକୃତି ବାଲି ପଥରରେ ପ୍ରସ୍ତୁତ ହୋଇଛି। ତିଆରି କରିବାକୁ ୩ମାସ ସମୟ ଲାଗିଥିଲା। ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଅଭିନେତା ସବ୍ୟସାଚୀ ମିଶ୍ର, ଡିଜାଇନର୍ ସୁବାସ ପୂଜାରୀ ପ୍ରମୁଖ ଉପସ୍ଥିତ ଥିଲେ।
