ବମ୍ବେ: ଦିବଂଗତ ମା’ଙ୍କ ଜନ୍ମଦିନରେ ଭାବବିହ୍ବଳ ହୋଇଛନ୍ତି ବଲିଉଡ୍ ଅଭିନେତା ଅର୍ଜୁନ କପୁର। ସୋସିଆଲ ମିଡିଆରେ ସେ ଏକ ଫଟୋ ଶେୟାର କରି ତାଙ୍କୁ ମନେପକାଇଛନ୍ତି। ଏହି ପୋଷ୍ଟଟି ଏବେ ବେଶ୍ ଭାଇରାଲ ହେଉଛି।
ଅର୍ଜୁନ ଲେଖିଛନ୍ତି, ଜନ୍ମଦିନର ଶୁଭେଚ୍ଛା ମା’। ମୁଁ ନିଜ ଫୋନ୍ରେ ତୁମ ନାଁ ଦେଖିବା ମିସ୍ କରେ। ଘରେ ତୁମ ପାଖକୁ ଫେରିବାକୁ ମିସ୍ କରେ। ତୁମେ ଏବଂ ଅଶୁଂଳାଙ୍କ ଗପପେଡ଼ି ଖୋଲିବାକୁ ମିସ୍ କରେ। ମୁଁ ତୁମକୁ ମନେ ପକାଏ ମା’। ମୁଁ ତୁମ ବାସ୍ନାକୁ ମିସ୍ କରେ। ମୁଁ ତୁମ ବିନା ଅଧୁରା। ଆଶା କରୁଛି ଏବେ ବି ତୁମେ ମୋତେ ନେଇ ଗର୍ବ ଅନୁଭବ କରୁଥିବ। ଲଭ୍ ୟୁ। ତୁମ ପୁଅ।
ଏହାଛଡ଼ା ଅର୍ଜୁନ ନିଜ ଇନ୍ଷ୍ଟାଗ୍ରାମ ଷ୍ଟୋରୀରେ ମା’ଙ୍କ ପାଇଁ ପୋଷ୍ଟ କରିଛନ୍ତି। ପିଲାଦିନର ଏକ ଫଟୋ ଶେୟାର କରି ‘ଶୀଘ୍ର ଆମେ ଏକାସହ ହସିବା। ଏକାଠି ହେବା। ପୁଣିଥରେ ମୁଁ ତୁମ ପୁଅ ହୋଇଯିବି। ବାସ ଆଉ କିଛି ନୁହେଁ’ ବୋଲି ଲେଖିଛନ୍ତି।
କହିରଖଛୁ, ଅର୍ଜୁନ ଏବଂ ଭଉଣୀ ଅଂଶୁଳା ମା’ଙ୍କ ବେଶ ପ୍ରିୟ ଥିଲେ। ଦୀର୍ଘଦିନ ଧରି କ୍ୟାନ୍ସର ସହ ଲଢ଼ିବା ପରେ ତାଙ୍କର ମୃତ୍ୟୁ ଘଟିଥିଲା। ୨୦୧୨ ମାର୍ଚ୍ଚ ୨୫ରେ ସେ ଶେଷନିଶ୍ୱାସ ତ୍ୟାଗ କରିଥିଲେ।
