ଆଜିକାଲି ସହର ଆପାର୍ଟମେଣ୍ଟମୟ ହୋଇଗଲାଣି। ଜନସଂଖ୍ୟା ବଢିବା ସହ ଆପାର୍ଟମେଣ୍ଟ କଲ୍ଚର ବଢିବାରେ ଲାଗିଛି। ହେଲେ ଏଥିରେ ବଳି ପଡିଯାଉଛନ୍ତି କୁନି କୁନି ଚଢେଇ। ଗଛ ସଂଖ୍ୟା କମିବା ଯୋଗୁ ସେମାନେ ବାସହରା ହୋଇଯାଉଛନ୍ତି। ତାସହ ଅନେକ ଚଢେଇଙ୍କ ବଂଶ ବି ଲୋପ ପାଇବାକୁ ବସିଲାଣି। ଏହିସବୁକୁ ନଜରରେ ରଖି ରାଜସ୍ଥାନର ରାଜଧାନୀ ଜୟପୁରରେ ଖାସ୍ ଚଢେଇଙ୍କ ପାଇଁ ଛଅ ମହଲାବିଶିଷ୍ଟ ୮୦ ଫୁଟ୍ ଉଚ୍ଚତାର ଏକ ସୁନ୍ଦର ଆପାର୍ଟମେଣ୍ଟ ତିଆରି କରାଯାଇଛି। ଦୂରରୁ ଏହା ଲିନିଂ ଟାଓ୍ବାର ଅଫ୍ ପିସା ଭଳି ଦେଖାଯାଏ। ଏହି ଆପାର୍ଟମେଣ୍ଟରେ ପକ୍ଷୀ ରହିବା ଲାଗି ୧୩୦୦ଟି ଖୋପ ବା କଣା ଅଛି। ପ୍ରତି ଖୋପରେ ଗୋଟିଏରୁ ଦୁଇଟି ପକ୍ଷୀ ଆରାମରେ ରହିପାରିବେ। ଉକ୍ତ ଆପାର୍ଟମେଣ୍ଟକୁ ତିଆରି କରିବା ଲାଗି ଦୁଇ ମାସ ସମୟ ଲାଗିଥିଲା। ଏଥିରେ ଏବେ ଚଢେଇ ରହିବା ସହ ସେଥିରେ ଅଣ୍ଡା ଦେବା ମଧ୍ୟ ଆରମ୍ଭ କରିଦେଲେଣି। ଏଥିରେ ଦାନା ଓ ପାଣି ଦେବାର ବ୍ୟବସ୍ଥା ବି ରହିଛି। ପକ୍ଷୀମାନେ ଯେମିତି ଠିକ୍ ସମୟରେ ଦାନା ପାଣି ପାଇବେ ସେଥିପାଇଁ ତିନିଜଣ ବ୍ୟକ୍ତିଙ୍କୁ ନିଯୁକ୍ତ ବି କରାଯାଇଛି। ଉକ୍ତ ଆପାର୍ଟମେଣ୍ଟକୁ ଜୟପୁରର ପିଞ୍ଜରାପୋଲ ଗୌଶାଳା ନିର୍ମାଣ କରାଇଛି। ସୂଚନାଯୋଗ୍ୟ ଏହିଭଳି ଆପାର୍ଟମେଣ୍ଟ ଉଜୈନରେ ବି ଅଛି।
