ବନ୍ତ,୨୨ା୩(ଡି.ଏନ୍.ଏ.): ଦଳ ବିରୋଧୀ ମନ୍ତବ୍ୟ ମହଙ୍ଗା ପଡ଼ିଲା। ଦଳରୁ ବିଦା ହେଲେ ବିଜେଡିର ୩ ବରିଷ୍ଠ ନେତା। ଭଦ୍ରକ ଜିଲା ବନ୍ତ ବ୍ଲକ ବିଜେଡିର ବରିଷ୍ଠ ନେତା ପ୍ରାଧ୍ୟାପକ ଡ. ସୁଧାଂଶୁ ନାୟକ, ପୂର୍ବତନ ବ୍ଲକ ଅଧ୍ୟକ୍ଷା ରେବତୀ ନାୟକ ଓ ପୂର୍ବତନ ବ୍ଲକ ବିଜେଡି ସଭାପତି କମଳାକାନ୍ତ ସାହୁଙ୍କୁ ଦଳ ବିରୋଧୀ କାର୍ଯ୍ୟ ପାଇଁ ଜିଲା ସଭାପତି ଜଗନ୍ନାଥ ସ୍ବାଇଁ ଦଳରୁ ବହିଷ୍କାର କରିଛନ୍ତି। ସୋମବାର ଜିଲା ବିଜେଡି କାର୍ଯ୍ୟାଳୟ ଚିଠି ନଂ-୧୪/୨୦୨୩ ଅନୁଯାୟୀ ଜିଲା ସଭାପତି ସ୍ବାଇଁ ଏ ସମ୍ପର୍କରେ ସୂଚନା ଦେଇଛନ୍ତି।
ପ୍ରକାଶ ଯେ, ଗତ ରବିବାର ବନ୍ତଠାରେ ‘ଶଙ୍ଖ ମୋର ଗର୍ବ’ ପଞ୍ଚାୟତ ସ୍ତରୀୟ କର୍ମୀ ସମ୍ମିଳନୀରେ ଏହି ୩ ଜଣଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ। ଉକ୍ତ ସମ୍ମିଳନୀରେ ସୁଧାଂଶୁ ସିଧାସଳଖ ଭଣ୍ଡାରିପୋଖରୀ ବିଧାୟକ ଓ ବିଧାୟକ ପ୍ରତିନିଧିଙ୍କୁ ଟାର୍ଗେଟ କରି ନାନାଦି ମନ୍ତବ୍ୟ ଦେଇଥିଲେ। ଏହାର ଭିଜୁଆଲ ସୋସିଆଲ ମିଡିଆରେ ଭାଇରାଲ ହେବା ସହ ଗଣମାଧ୍ୟମରେ ଖବର ପ୍ରକାଶିତ ହୋଇଥିଲା। ଫଳସ୍ବରୂପ ଦିନକ ପରେ ଜିଲା ସଭାପତି ତାଙ୍କୁ ଦଳରୁ ବିଦା କରିଥିବା ଜଣାଯାଇଛି।
