ଦାରିଙ୍ଗବାଡ଼ି,୬ା୧୦(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି଼କୁ ସଂଯୋଗ କରୁଥିବା ୫୯ନଂ ଜାତୀୟ ରାଜପଥର ଗାଜଲବାଡ଼ି ଘାଟିରେ ଗତ ମାସରେ ହୋଇଥିବା ଭୁସ୍ଖଳନ ପରେ ରାଜପଥ ବିଭାଗ ପକ୍ଷରୁ ମରାମତି କାର୍ଯ୍ୟ କରଯାଇଥିଲା। ଏଥିପାଇଁ ଏକାଧିକ ଠିକାସଂସ୍ଥା ପକ୍ଷରୁ ଯୁଦ୍ଧକାଳୀନ ଭିତ୍ତିରେ ମରାମତି କାର୍ଯ୍ୟ କରାଯାଇଥିଲା। ହେଲେ କାମ ଶେଷ ହେବାର ମାତ୍ର ଏକ ସପ୍ତାହ ମଧ୍ୟରେ ଏବେ ପୁଣି ସେହି ସ୍ଥାନରେ ବଡ଼ବଡ଼ ଫାଟ ଦେଖା ଦେଲାଣି। ଫଳରେ ସେହି ରାସ୍ତା ଦେଇ ଯାତାୟାତ କରିବା ବିପଦ ଦେଖାଦେଇଛି। ସେଠାରେ ଫାଟ ହୋଇଥିଲେ ମଧ୍ୟ ବିଭାଗର କୌଣସି ଅଧିକାରୀ ଘଟଣାସ୍ଥଳରେ ପହଞ୍ଚି ନ ଥିବା ଜଣାପଡ଼ିଛି। ସେପଟେ ଦୈନିକ ଉକ୍ତ ରାଜପଥ ଉପରେ ନିର୍ଭର କରୁଥିବା ଯାତ୍ରୀ ଅସନ୍ତୋଷ ପ୍ରକାଶ କରୁଥିବା ବେଳେ ନିମ୍ନମାନର କାର୍ଯ୍ୟ କରାଯାଇଥିବା ମଧ୍ୟ ଅଭିଯୋଗ କରିଛନ୍ତି। ଏନେଇ ବିଭାଗର କନିଷ୍ଠ ଯନ୍ତ୍ରୀ ଜୟଦେବ ଦେ କହିଛନ୍ତି, କାମ ଅସ୍ଥାୟୀ ଭାବେ କରାଯାଇଛି ଏବଂ ଭଲ କାର୍ଯ୍ୟ କରାଯାଇଛି। ଗାଡ଼ିମୋଟର ଚଳାଚଳରେ କୌଣସି ସମସ୍ୟା ନ ଥିବା ଏବଂ ମଙ୍ଗଳବାରଠାରୁ ସେହି ରାଜପଥରେ ସମସ୍ତ ଗାଡ଼ିମୋଟର ଛଡ଼ାଯାଇଥିବା ସେ କହିଛନ୍ତି।
