ନୂଆଦିଲ୍ଲୀ, ୧୧।୯ : ଦିଲ୍ଲୀ ପରିବହନ ନିଗମ ଦ୍ୱାରା ୧୦୦୦ ଲୋ-ଫ୍ଲୋର ବସ କିଣିବାରେ ହୋଇଥିବା ଦୁର୍ନୀତି ଅଭିଯୋଗ ନେଇ ମୁଖ୍ୟ ଶାସନ ସଚିବ ନରେଶ କୁମାରଙ୍କ ପ୍ରସ୍ତାବକୁ ଦିଲ୍ଲୀ ଉପରାଜ୍ୟପାଳ ବିନୟ କୁମାର ସାକ୍ସେନା ଅନୁମୋଦନ କରିଛନ୍ତି। ଏକ ସରକାରୀ ବିବୃତ୍ତି ଅନୁଯାୟୀ, ଉପରାଜ୍ୟପାଳଙ୍କ ସଚିବାଳୟ କାର୍ଯ୍ୟାଳୟ ଏହି ମାମଲାରେ ଅଭିଯୋଗ ଗ୍ରହଣ କରିଛି। ଫଳରେ ମୁଖ୍ୟମନ୍ତ୍ରୀ କେଜରିଓ୍ବାଲଙ୍କୁ ପୁଣି ଏକ ଝଟ୍କା ଲାଗିଛି।
ନିକଟରେ ସିବିଆଇ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ଘର ଏବଂ ଅନ୍ୟାନ୍ୟ ସ୍ଥାନରେ ଚଢ଼ାଉ କରିଥିଲା। ଏହା ପରେ ଭାଜପା ଏବଂ ଏଏପି ଉଭୟ ଦଳ ପରସ୍ପର ବିରୋଧରେ ଦୁର୍ନୀତି ଅଭିଯୋଗ କରିଛନ୍ତି। କେବଳ ମଦ ନୀତିରେ ନୁହେଁ ଶିକ୍ଷା କ୍ଷେତ୍ରରେ ମଧ୍ୟ ଦୁର୍ନୀତି ହୋଇଥିବା ଭାଜପା ଅଭିଯୋଗ କରିଛି।
ଗତ ମାସରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଅଭିଯୋଗ କରିଥିଲେ ଯେ ଭାଜପା ଦିଲ୍ଲୀରେ ନିର୍ବାଚିତ ସରକାରକୁ ହଟାଇବାକୁ ଚେଷ୍ଟା କରୁଛି। ଭାଜପା ତାଙ୍କ ବିଧାୟକଙ୍କୁ କିଣିବା ପାଇଁ ୮୦୦ କୋଟି ଟଙ୍କା ମହଜୁଦ କରି ରଖିଛି। ବିଧାନସଭାରେ ଫ୍ଲୋର ଟେଷ୍ଟ କରିବା ବେଳେ କେଜରିୱାଲ କହଥିଲେ ଯେ ସରକାରଙ୍କୁ ହଟାଇବାକୁ ଚେଷ୍ଟା ବିଫଳ ହୋଇଛି।
