ଓ୍ବାଶିଂଟନ୍,୫।୧: ଆମେରିକାରେ ପୁଣି ଥରେ ହିନ୍ଦୁ ମନ୍ଦିରକୁ ଟାର୍ଗେଟ କରାଯାଇଛି। କାଲିଫର୍ନିଆର ଏକ ହିନ୍ଦୁ ମନ୍ଦିର ଉପରେ ଆକ୍ରମଣ ହୋଇଛି ଏବଂ ସେଠାରେ ଖଲିସ୍ତାନ ସମର୍ଥକ ସ୍ଲୋଗାନ ଲେଖାଯାଇଛି। ହିନ୍ଦୁ ଆମେରିକୀୟ ଫାଉଣ୍ଡେସନ ଶୁକ୍ରବାର ଦିନ ଏହି ସୂଚନା ଦେଇଛି। କାନାଡାରେ ମଧ୍ୟ ନିକଟ ଅତୀତରେ ଅନେକ ହିନ୍ଦୁ ମନ୍ଦିରକୁ ଟାର୍ଗେଟ କରାଯାଇଛି।
କାଲିଫର୍ନିଆର ବାଇ ଅଞ୍ଚଳରେ ଅବସ୍ଥିତ ହିନ୍ଦୁ ମନ୍ଦିର ‘ଶେରୱାଲି ମନ୍ଦିର’ରେ ଖଲିସ୍ତାନ ସମର୍ଥକ ସ୍ଲୋଗାନ ଲେଖାଯାଇଛି। କିଛି ଦିନ ପୂର୍ବରୁ କାଲିଫର୍ନିଆର ଶିବ ଦୁର୍ଗା ମନ୍ଦିରରେ ଚୋରି ଘଟଣା ଘଟିଥିଲା। ହିନ୍ଦୁ ଆମେରିକୀୟ ଫାଉଣ୍ଡେସନ ମନ୍ଦିର କମିଟି ସହିତ ଜଡିତ ଲୋକଙ୍କ ସହ ଯୋଗାଯୋଗରେ ଅଛି। ଏହି ଘଟଣା ସମ୍ପର୍କରେ ପୋଲିସ ନିକଟରେ ଅଭିଯୋଗ ହୋଇଛି। କାଲିଫର୍ନିଆର ସ୍ବାମୀ ନାରାୟଣ ମନ୍ଦିର ଉପରେ ହୋଇଥିବା ଆକ୍ରମଣକୁ ଆମେରିକାର ବୈଦେଶିକ ବିଭାଗ ନିନ୍ଦା କରିଛି। ବିବୃତ୍ତିରେ କୁହାଯାଇଛି ଯେ, କାଲିଫର୍ନିଆର ହିନ୍ଦୁ ମନ୍ଦିର ଶ୍ରୀ ସ୍ବାମୀନାରାୟଣ ମନ୍ଦିର ଉପରେ ହୋଇଥିବା ଆକ୍ରମଣକୁ ଆମେ ନିନ୍ଦା କରୁଛୁ।
କାଲିଫର୍ନିଆର ଉଭୟ ମନ୍ଦିର ଉପରେ ହୋଇଥିବା ଆକ୍ରମଣ ପଛରେ ଖାଲିସ୍ତାନ ସମର୍ଥକ ହାତ ରହିଥିବା କୁହାଯାଉଛି। ବିଦେଶରେ ହିନ୍ଦୁ ମନ୍ଦିର ଉପରେ ହୋଇଥିବା ଆକ୍ରମଣକୁ ମଧ୍ୟ ଭାରତ ନିନ୍ଦା କରିଛି। ହିନ୍ଦୁ ମନ୍ଦିର ଉପରେ ଆକ୍ରମଣ ତଥା ଆମେରିକାରେ ଭାରତ ବିରୋଧୀ ସ୍ଲୋଗାନ ଲେଖିବା ଘଟଣାରେ ଭାରତୀୟ ବୈଦେଶିକ ମନ୍ତ୍ରୀ ଏସ ଜୟଶଙ୍କର ଅସନ୍ତୋଷ ବ୍ୟକ୍ତ କରିଛନ୍ତି।
