ଭୁବନେଶ୍ୱର, ୭।୯ (ବ୍ୟୁରୋ): ନୃତ୍ୟାନୁଷ୍ଠାନ ‘ସୃଜନ’ ପକ୍ଷରୁ ଚାଲିଥିବା ୨୭ତମ ଓଏମ୍ସି ଗୁରୁ କେଳୁଚରଣ ମହାପାତ୍ର ପୁରସ୍କାର ମହୋତ୍ସବର ସୋମବାର ଥିଲା ଦ୍ୱିତୀୟ ସନ୍ଧ୍ୟା। ପ୍ରସିଦ୍ଧ ଭାରତନାଟ୍ୟମ୍ ନୃତ୍ୟଶିଳ୍ପୀ, କୋରିଓଗ୍ରାଫର ତଥା ସାରସ୍ବତ ସଂସ୍କୃତି କେନ୍ଦ୍ରର ପ୍ରତିଷ୍ଠାତା ଅନିତା ମଲ୍ଲିକଙ୍କ ନୃତ୍ୟରୁ ମହୋତ୍ସବର ସନ୍ଧ୍ୟା ଆରମ୍ଭ ହୋଇଥିଲା। ଗୁରୁ ଥାଙ୍କମଣି କୁଟ୍ଟୀଙ୍କ ଶିଷ୍ୟା ଅନିତାଙ୍କ ପ୍ରଥମ ପରିବେଷଣ ଥିଲା ଲଲିଥା ଶହସ୍ରନାମମ୍ରୁ ଆଧାରିତ ‘ଅମ୍ବିକା ପଲ୍ଲବୀ’। ଶିଳ୍ପୀ ନିଜର ନୃତ୍ୟ ମାଧ୍ୟମରେ ଦେବୀ ଅମ୍ବିକାଙ୍କ ଐଶ୍ୱର୍ଯ୍ୟ, ଶକ୍ତିର ପ୍ରଶଂସା କରିଥିଲେ। ଏହା ପରେ ରାଗ ମାଳିକା ଏବଂ ଆଦି ତାଳରେ ‘କୃଷ୍ଣ ଅନୁଭବମ୍’ ପରିବେଷଣ କରିଥିଲେ। ଏଥିରେ ଭଗବାନ କୃଷ୍ଣଙ୍କର ମହିମା ଏବଂ ଆକର୍ଷଣୀୟ ପ୍ରକୃତିର ପ୍ରତିଫଳନକୁ ବେଶ୍ ଚମତ୍କାର ଢଙ୍ଗରେ ଉପସ୍ଥାପନ କରିଥିଲେ। ତୃତୀୟ ଉପସ୍ଥାପନାରେ ‘କୀର୍ତ୍ତନମ’ ପ୍ରଦର୍ଶିତ ହୋଇଥିଲା। ଏହି ନୃତ୍ୟରେ ସେ ଜୀବନର ଅନନ୍ତ ଚକ୍ର ଯଥା ସୃଷ୍ଟି, ବିବର୍ତ୍ତନ ଓ ବିନାଶର ନିୟନ୍ତ୍ରକ ମହାଦେବଙ୍କୁ ପ୍ରଣତି ଜଣାଇଥିଲେ। ଶେଷରେ ସନ୍ଥ ତୁଳସୀ ଦାସଙ୍କ ରଚିତ ପ୍ରସିଦ୍ଧ ରାମ ଭଜନ ‘ଠୁମକ ଚଲତ ରାମ ଚନ୍ଦ୍ର’ରେ ଭକ୍ତିପୂତ ପ୍ରଣାମ ଜଣାଇଥିଲେ। ବାଦ୍ୟ ସଙ୍ଗୀତରେ ଓଏସ୍ ଅରୁଣ ଓ ବସୁଧା ରବି, ମୃଦଙ୍ଗରେ ଏମ୍ଏସ୍ ସୁଖୀ ଓ ଏନ୍କେ କେଶବନ, ବଂଶୀରେ ନବୀନ କୁମାର ଓ ପାଲଘାଟ ସାଇରାମ, ବେହେଲାରେ ଟି. ଶିବଗଣେଶନ୍ ଓ ଶ୍ରୀଲକ୍ଷ୍ମୀ ଭେଙ୍କଟ ରମଣୀ, ନଟ୍ଟୁଭଙ୍ଗମ୍ରେ ଏମ୍ଏସ୍ ସୁଖୀ ଓ ସୁଧାରାଣୀ ରଘୁପତି ସହାୟତା କରିଥିଲେ।
ଆକର୍ଷଣ ଥିଲେ କଣ୍ଠଶିଳ୍ପୀ ରୂପକ କୁମାର ପରିଡ଼ା। ତାଙ୍କର ପ୍ରଥମ ପରିବେଷଣ ଥିଲା ମେଡ୍ଲୀ। କବି ଗୋପାଳକୃଷ୍ଣ ପଟ୍ଟନାୟକଙ୍କ ସଂଯୋଜିତ ଏହି ଗୀତରୁ ତାଙ୍କ ସଙ୍ଗୀତର ସୁର ଆରମ୍ଭ ହୋଇଥିଲା। ପରେ ଜୟଦେବଙ୍କ ଗୀତଗୋବିନ୍ଦ ଅଷ୍ଟପଦୀରୁ ‘ବିରଚିତ ଚାଟୁ ବଚନ’ ଗାନ କରିଥିଲେ। ଏଥିସହ ଶଳ୍ପୀ କିଛି ଓଡ଼ିଆ ଗୀତ ଓ ଭଜନ ପରିବେଷଣ କରିଥିଲେ। ‘ସତେ କି ଭାଙ୍ଗି କଳା’, ‘ଲାଜରେ ସରିଗଲି ଆଜ’, ‘ବରିଜାଖି ମନରୁ ମାନ’, ‘ମୋହନ ମୂରତି’ ଏବଂ ଶେଷରେ ସ’ଚମ୍ପୂ ପରିବେଷଣ କରି ମଞ୍ଚରୁ ବିଦାୟ ନେଇଥିଲେ। ସଙ୍ଗୀତ କାର୍ଯ୍ୟକ୍ରମର ନିର୍ଦ୍ଦେଶନା ଦେଇଥିଲେ ଡ. ବିଜୟ କୁମାର ଜେନା। ଶିଳ୍ପୀଙ୍କୁ ମର୍ଦ୍ଦଳରେ ଗୁରୁ ସଚ୍ଚିଦାନନ୍ଦ ଦାସ, ହାର୍ମୋନିୟମ୍ରେ ମୁରଲୀଧର ସ୍ବାଇଁ, ତାନପୁରାରେ ପ୍ରିୟଙ୍କା ରଥ ଏବଂ ଶ୍ରୀତତ୍ତ୍ୱା ମିଶ୍ର ସହାୟତା କରିଥିଲେ।
ସଂସ୍କୃତି ନିର୍ଦ୍ଦେଶକ ରଞ୍ଜନ କୁମାର ଦାସ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦ୍ଘାଟନ କରି ଭର୍ଚ୍ଚୁଆଲରେ ବାର୍ତ୍ତା ରଖିବା ସହ ଶିଳ୍ପୀଙ୍କୁ ଉତ୍ସାହିତ କରିଥିଲେ। ‘ସୃଜନ’ର ନିର୍ଦ୍ଦେଶକ ଗୁରୁ ରତିକାନ୍ତ ମହାପାତ୍ର କାର୍ଯ୍ୟକ୍ରମ ପରିଚାଳନା, ସଦସ୍ୟା ମାୟା କ୍ରିଷ୍ଣାମୂର୍ତ୍ତି ସଂଯୋଜନା ଓ ଦେବୀପ୍ରସାଦ ମିଶ୍ର ଆଲୋକ ପରିଚାଳନା କରିଥିଲେ। ଏହି କାର୍ଯ୍ୟକ୍ରମ ‘ସୃଜନ’ର ଫେସ୍ବୁକ୍ ଓ ୟୁଟ୍ୟୁବ୍ରେ ସନ୍ଧ୍ୟା ୭ଟା ୩୦ରେ ଲାଇଭ୍ ପ୍ରଦର୍ଶିତ ହୋଇଥିଲା।
