ପଟ୍ଟାଙ୍ଗୀ,୫।୪(ଡି.ଏନ.ଏ.): କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ତଥା ଆନ୍ଧ୍ର ସୀମାନ୍ତ କୋଟିଆ ପଞ୍ଚାୟତର ତିନି ଗ୍ରାମ ତଳ ଗଞ୍ଜେଇ ପଦର, ଫଗୁଣସିନେରି ଓ ଫାଟୁସିନେରିରେ ଆନ୍ଧ୍ର ପଞ୍ଚାୟତ ନିର୍ବାଚନ ଗତ ଫେବୃୟାରୀ୧୩ରେ କରିଥିଲା। ଏହାକୁ ନେଇ ଏବେବି ବାଦ ବିବାଦ ଲାଗିରହିଥିବାବେଳେ ରବିବାର ସମ୍ପୃକ୍ତ ପଞ୍ଚାୟତଗୁଡିକରେ ଜିଲା ପରିଷଦ ସଭ୍ୟ ନିର୍ବାଚନ ପାଇଁ ତାରିଖ ଘୋଷଣା କରିଛି। ଯାହାକି କୋରାପୁଟ ଜିଲା ପ୍ରଶାସନର ଚିନ୍ତା ବଢାଇ ଦେଇଛି। ଆନ୍ଧ୍ର ସୀମାନ୍ତ ଫଗୁଣସିନେରି ଓ ଫାଟୁସିନେରି ପଞ୍ଚାୟତରେ ଆସନ୍ତା ୮ ତାରିଖରେ ଆନ୍ଧ୍ରର ତିନୋମ ଜିଲା ପରିଷଦ ସଭ୍ୟ ପାଇଁ ଭୋଟ ହେବ। ତଳଗଞ୍ଜେଇ ପଦରବାସୀ ମଧ୍ୟ ନେରେଡିବାଲସା ଗ୍ରାମରେ ଏହି ଦିନ ଭୋଟ ଦେବେ। ଫଗୁଣସିନେରି ପଞ୍ଚାୟତର ସଲପଗୁଡା, ଏଗୁମାଣ୍ଡାଙ୍ଗି, ମହିପାଣି ଓ ଫଗୁଣସିନେରି ଆଦି ୪ଟି ଗ୍ରାମର ୪୮୯ ଭୋଟର ତିନୋମରେ ଭୋଟ ଦେବେ। ଏହି ପଞ୍ଚାୟତର ଡୋଲିଆମ୍ବ, ମାଡକାର, କୋନାଦୋରା, ବର୍ଣ୍ଣନା ପାଡୁ, ଚିକାପାରୁ, ନିମାଲପାଡୁ, କୋମେଟିବାଲସା, ପାନସାବାଲସା, ଗୁଞ୍ଜିମାଡା, ଡୋଙ୍କେଲୱବାଲସା, କତୁରୁ ଏବଂ ଫାଟୁସିନେରି ଆଦି ଗ୍ରାମର ୧୦୨୫ ଭୋଟର ମଧ୍ୟ ତିନୋମ ଅଞ୍ଚଳରେ ଭୋଟ ଦେବେ। ସେହିପରି ତଳ ଗଞ୍ଜେଇ ପଦର ପଞ୍ଚାୟତର ଧୂଳିପଦର , ଦିଗୁସେମ୍ବି , ଏଗୁସେମ୍ବି, କୋଟିଆ, ରଣାସିଂ, ଉପର ଗଞ୍ଜେଇ ପଦର, ସିମାଗେଡା, ପାନୁକୁଲାଭା, କୁରୁଡିପଦର ଏବଂ ତଳ ଗଞ୍ଜେଇ ପଦର ଆଦି ଗ୍ରାମର ୧୨୭୨ ଭୋଟର ନେରେଡିବାଲସା ଗ୍ରାମରେ ଭୋଟ ଦେବାକୁ ଆନ୍ଧ୍ର ପକ୍ଷରୁ ବ୍ୟବସ୍ଥା କରାଯାଇଛି।
