ନୂଆଦିଲ୍ଲୀ, ୨୨।୩:କୋରାପୁଟ ଜିଲାର ବିବାଦୀୟ କୋଟିଆର ୨୧ଟି ଗ୍ରାମକୁ ଆନ୍ଧ୍ରପ୍ରଦେଶର ବୋଲି ଘୋଷଣା କରିବା ସହ ସେଠାରେ ଓଡ଼ିଶା ସରକାରଙ୍କ ପକ୍ଷରୁ କରାଯାଇଥିବା ପଞ୍ଚାୟତ ନିର୍ବାଚନକୁ ଅସିଦ୍ଧ ଘୋଷଣା ସକାଶେ ଆନ୍ଧ୍ର ସମର୍ଥିତ ୫ ସରପଞ୍ଚ ଦାୟର କରିଥିବା ଆବେଦନକୁ ସୁପ୍ରିମକୋର୍ଟ ସୋମବାର ଖାରଜ କରିଦେଇଛନ୍ତି। ଜଷ୍ଟିସ୍ ଡି. ଓ୍ବାଇ. ଚନ୍ଦ୍ରଚୂଡ଼ ଓ ସୂର୍ଯ୍ୟକାନ୍ତଙ୍କୁ ନେଇ ଗଠିତ ପୀଠ ଓଡ଼ିଶା ଓକିଲଙ୍କ ଯୁକ୍ତି ଶୁଣିବା ପରେ ଆନ୍ଧ୍ର ପକ୍ଷରୁ କରାଯାଇଥିବା ଆବେଦନକୁ ଅଗ୍ରାହ୍ୟ କରିଦେଇଛନ୍ତି।
ଶୁଣାଣି ବେଳେ ଓଡ଼ିଶା ପକ୍ଷରୁ ଓକିଲ ଶିବଶଙ୍କର ମିଶ୍ର କହିଥିଲେ ଯେ, ସମ୍ବିଧାନର ଅନୁଚ୍ଛେଦ ୧୩୧ ଅନୁଯାୟୀ ମୂଳ ମକଦ୍ଦମା ଏବଂ ଅଦାଲତ ଅବମାନନା ମାମଲା ସର୍ବୋଚ୍ଚ ନ୍ୟାୟାଳୟଙ୍କ ନିକଟରେ ବିଚାରାଧୀନ ରହିଛି। ଚଳିତ ବର୍ଷ ଓଡ଼ିଶା ସରକାର କୋଟିଆର ସମ୍ପୃକ୍ତ ଅଞ୍ଚଳରେ ପଞ୍ଚାୟତ ନିର୍ବାଚନ କରିବା ଓ ସେଥିରେ ୭୫ ପ୍ରତିଶତ ମତଦାନ ହୋଇଥିବା ସଂକ୍ରାନ୍ତ ତଥ୍ୟ ମଧ୍ୟ ମିଶ୍ର କୋର୍ଟରେ ଉପସ୍ଥାପନ କରିଥିଲେ। ଏଥିସହିତ ସେ ଯୁକ୍ତି ବାଢ଼ିଥିଲେ ଯେ, ସେହିସବୁ ଗ୍ରାମରେ ଆନ୍ଧ୍ର କେବେହେଲେ ନିର୍ବାଚନ କରିନାହିଁ ଓ କେବଳ ପଞ୍ଚାୟତ ପ୍ରତିନିଧି ବାଛିଛି।
ତେବେ ବିବାଦୀୟ ଅଞ୍ଚଳର ସରପଞ୍ଚ ବୋଲି ନିଜକୁ ଦାବି କରୁଥିବା ଆନ୍ଧ୍ରପ୍ରଦେଶର ୫ ଜଣ ବ୍ୟକ୍ତି ସୁପ୍ରିମକୋର୍ଟରେ କରିଥିବା ଆବେଦନରେ ଦର୍ଶାଇଛନ୍ତି ଯେ, ଓଡ଼ିଶା ସରକାର ସେଠାରେ କରିଥିବା ପଞ୍ଚାୟତ ନିର୍ବାଚନକୁ ସର୍ବୋଚ୍ଚ ଅଦାଲତ ଅସିଦ୍ଧ ଘୋଷଣା କରନ୍ତୁ। ଯେଉଁଭଳି ଭାବେ ଓଡ଼ିଶା ସରକାର ବିବାଦୀୟ ଅଞ୍ଚଳରେ ପଞ୍ଚାୟତ ସମିତି ନିର୍ବାଚନ ପରିଚାଳନା ସକାଶେ ବିଜ୍ଞପ୍ତି ଜାରି କରିଥିଲେ, ତାହା ସେମାନଙ୍କୁ ବ୍ୟଥିତ କରିଛି ବୋଲି ଆବେଦନକାରୀ କହିଛନ୍ତି। ସେମାନେ ଆବେଦନରେ ଦର୍ଶାଇଛନ୍ତି ଯେ, ୨୧ଟି ଗ୍ରାମରେ ୫ ହଜାରରୁ ଅଧିକ ଲୋକ ରହିଛନ୍ତି ଓ ସେମାନଙ୍କ ମଧ୍ୟରୁ ଅଧିକାଂଶ ତେଲୁଗୁ ଭାଷା କହିବା ସହ ଆନ୍ଧ୍ରପ୍ରଦେଶର ପରମ୍ପରା ଓ ସଂସ୍କୃତିକୁ ଅନୁସରଣ କରୁଛନ୍ତି।
ଉଲ୍ଲେଖଯୋଗ୍ୟ ଯେ, ସୁପ୍ରିମକୋର୍ଟ ମାର୍ଚ୍ଚ ୧୬ରେ କହିଥିଲେ କୋଟିଆ ସୀମା ବିବାଦ ନେଇ ସମ୍ବିଧାନର ଅନୁଚ୍ଛେଦ ୧୩୧ ଅନୁଯାୟୀ ଓଡ଼ିଶା ସରକାରଙ୍କ ପକ୍ଷରୁ ଆନ୍ଧ୍ରପ୍ରଦେଶ ବିରୋଧରେ କରାଯାଇଥିବା ମୂଳ ମକଦ୍ଦମାକୁ ପ୍ରଥମେ ବିଚାରକୁ ନେବେ। ୨୦୨୦ରେ ଓଡ଼ିଶା ପକ୍ଷରୁ ଆନ୍ଧ୍ର ସରକାରଙ୍କ ବିରୋଧରେ ଅଦାଲତ ଅବମାନନା ସଂକ୍ରାନ୍ତୀୟ ମାମଲାରେ ନିଜର ଯୁକ୍ତି ଉପସ୍ଥାପନ କରିବାକୁ ଉଭୟ ପକ୍ଷଙ୍କୁ ଜଷ୍ଟିସ୍ ଏ.ଏମ୍. ଖାନ୍ଓ୍ବିଲକର ଓ ସିଟି ରବିକୁମାରଙ୍କୁ ନେଇ ଗଠିତ ସୁପ୍ରିମକୋର୍ଟର ପୀଠ ଅନୁମତି ଦେଇଥିଲେ।
ଗୁରୁତ୍ୱପୂର୍ଣ୍ଣ ବିଷୟ ହେଉଛି, ଚଳିତବର୍ଷ ଜାନୁୟାରୀରେ ଓଡ଼ିଶା ତରଫରୁ ସୀମା ବିବାଦ ନେଇ ପୁନଶ୍ଚ ଏକ ମକଦ୍ଦମା ସର୍ବୋଚ୍ଚ ଅଦାଲତରେ କରାଯାଇଥିଲା। ଏଥିରେ କୋଟିଆ ଗ୍ରାମପୁଞ୍ଜ ଉପରେ ଓଡ଼ିଶାର ସମ୍ପୂର୍ଣ୍ଣ ପ୍ରଶାସନିକ ଅଧିକାର ରହିଛି ବୋଲି ସୁପ୍ରିମକୋର୍ଟ ଘୋଷଣା କରନ୍ତୁ ବୋଲି ଓଡ଼ିଶା ପକ୍ଷରୁ କୁହାଯାଇଥିଲା।
