ବମ୍ବେ: ବର୍ଷେ କିମ୍ବା ଦୁଇବର୍ଷ ନୁହେଁ ବରଂ ଦୀର୍ଘ ୨୦ ବର୍ଷ ଧରି ଲିଭ୍ ଇନ୍ରେ ରହୁଛନ୍ତି। ହେଲେ ନା ବିବାହ କରିବାର ଇଚ୍ଛା ଅଛି ନା ପିଲାଛୁଆ କରି ସଂସାର କରିବାର। ଆମେ କଥା ହେଉଛୁ ଅଭିନେତା ଅଶ୍ଳେଷା ସାଓ୍ବନ୍ତ ଏବଂ ସନ୍ଦୀପ ବସଓ୍ବାନାଙ୍କ ବିଷୟରେ। ଲୋକପ୍ରିୟ ଧାରାବାହିକ ‘କ୍ୟୁ କି ଶାଶ ଭି କଭି ବହୁ ଥି’ରେ ଉଭୟ ନଜର ଆସି ପ୍ରଶଂସା ସାଉଁଟିଥିଲେ। ଏକାଠି କାମ କରିବା ପରେ ଦୁହେଁ ପ୍ରେମରେ ପଡ଼ିଥିଲେ। ସେବେଠାରୁ ଏବେଯାଏ ଦୀର୍ଘ ୨୦ ବର୍ଷ ଧରି ଦୁହେଁ ଦୁହିଁଙ୍କ ସହ ରହୁଛନ୍ତି। ଅଫିସିଆଲ ଭାବେ ବିବାହ କରି ନ ଥିଲେ ହେଁ ତାଙ୍କ ସମ୍ପର୍କ ବିବାହଠାରୁ କମ୍ ନୁହେଁ ବୋଲି ନିକଟରେ ସନ୍ଦିପ ଏକ ସାକ୍ଷାତକାରରେ କହିଛନ୍ତି।
ଖାଲି ଢ଼ୋଲ ବାଜିନି। ଆମେ ଆଧ୍ୟାତ୍ମିକ ଲୋକ। ଆମେ ଜାଣୁ ବହୁତ କମ୍ ସମୟ ପାଇଁ ଦୁନିଆକୁ ଆସିଛୁ । ଯେତେ ସମୟ ଭଲପାଇବାରେ ବିତିଯାଉଛି ସେତିକ ଭଲ। ଏଥିପାଇଁ ପରସ୍ପରକୁ ପ୍ରତିଶ୍ରୁତି ଦେଇଥିଲୁ ଯେ ଯେବେ ଯାଏ ଭଲପାଇବା ରହିବ, ଆମେ ଏକାଠି ରହିବୁ। ନହେଲେ ଅଲଗା ହୋଇଯିବୁ। ଆଜି ଯାଏ ଆମ ଭିତରେ ଭଲପାଇବା ରହିଛି। ଭବିଷ୍ୟତରେ ବିବାହ କରିବୁ କି ନାହିଁ ତାହା ସମୟ କହିବ। ତେବେ ସେ ବିବାହ ବିପକ୍ଷରେ ନାହାନ୍ତି ବୋଲି ସନ୍ଦୀପ କହିଛନ୍ତି।
ସେହିଭଳି ସନ୍ତାନକୁ ନେଇ ସେ କହିଛନ୍ତି ଦୁନିଆରେ ବହୁତ ଶିଶୁ ରହିଛନ୍ତି। ଏବେ ଜନସଂଖ୍ୟା ବୃଦ୍ଧି ପାଇବାରେ ଲାଗିଛି। କାହାକୁ ନା କାହାକୁ ତ ସେ ବିଷୟରେ ଚିନ୍ତା କରିବାକୁ ହେବ। ହଁ, ଯଦି କେବେ ଅନ୍ତରରୁ ପିଲାଟିଏ କରିବାକୁ ଚାହିଁବୁ ତେବେ ସେ କରିବେ ବୋଲି କହିଛନ୍ତି।
