ଦିଗପହଣ୍ଡି,୯|୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଳକ କଇଠଖଣ୍ଡି ଗ୍ରାମ ସାଉଁଟିଆ ସାହିର ହରି ସାହୁ(୮୧) ନାମକ ଜଣେ ବୃଦ୍ଧ ଗାଁ ନିକଟ ଘୋଡାହାଡ ନଦୀକୁ ଗାଧୋଇବାକୁ ଯାଇ ବୁଧବାର ଅପରାହ୍ନରୁ ନିଖୋଜ ଥିବା ଜଣାପଡିଛି । ସେ ସନ୍ଧ୍ୟା ସୁଦ୍ଧା ଘରକୁ ନଫେରିବାରୁ ପରିବାର ଲୋକେ ତାଙ୍କୁ ଖୋଜାଖୋଜି କରିବା ପରେ କୌଣସି ସନ୍ଧାନ ମିଳି ନ ଥିଲା। ଗୁରୁବାର ସକାଳେ ପରିବାର ଲୋକେ ସ୍ଥାନୀୟ ସରପଞ୍ଚ ମନୋରଞ୍ଜନ ଗୌଡ଼ ଙ୍କୁ ଜଣାଇଥିଲେ। ସରପଞ୍ଚ ଏନେଇ ଦିଗପହଣ୍ଡି ଅଗ୍ନିଶମ ବାହିନୀକୁ ଖବର ଦେବାପରେ ଆଗ୍ନିକ ବୃନ୍ଦ ଘଟଣାସ୍ଥଳରେ ପହଞ୍ଚି ନଦୀ ଗଣ୍ଡ ଓ ପାଣି ଭିତରକୁ ଯାଇ ଅକ୍ଳାନ୍ତ ପରିଶ୍ରମ ସତ୍ତ୍ୱେ ବୃଦ୍ଧ ହରିଙ୍କ କୈାଣସି ସନ୍ଧାନ ମିଳି ପାରିନାହିଁ । ହରି ଘୋଡାହାଡ ନଦୀଗଣ୍ଡକୁ ବୁଧବାର ଅପରାହ୍ନ ପ୍ରାୟ ୨ ଟାରେ ଗାଧୋଇବାକୁ ଯାଇ ଘରକୁ ଫେରି ନ ଥିଲେ। ଗୁରୁବାର ସକାଳେ ନଦୀଗଣ୍ଡ ନିକଟରେ ବୃଦ୍ଧ ହରିଙ୍କ ଆଶାବାଡି ପଡ଼ିଥିବା ଦେଖି ସେ ନଦୀ ଗଣ୍ଡର ଗଭୀର ପାଣି ରେ ବୁଡ଼ି ଯାଇଥିବା ସନ୍ଦେହ କରାଯାଇଛି। ଅଗ୍ନିଶମ କର୍ମଚାରୀ ମାନେ ନଦୀର ପ୍ରାୟ ଦେଢ଼ କିଲୋମିଟର ପର୍ଯ୍ୟନ୍ତ ଖୋଜାଖୋଜି କରିଥିଲେ ମଧ୍ୟ ଗୁରୁବାର ସନ୍ଧ୍ୟା ସୁଦ୍ଧା ହରିଙ୍କ କୈାଣସି ସନ୍ଧାନ ମିଳି ନ ଥିବା ଜଣାପଡିଛି । ନଦୀ ରେ କୁମ୍ଭୀର ଭୟ ଏବଂ ସନ୍ଧ୍ୟା ହୋଇ ହେବାରୁ ଅଗ୍ନିଶମ ବାହିନୀ ପକ୍ଷରୁ ତଲାସି କାର୍ଯ୍ୟ ବନ୍ଦ ରଖାଯାଇଥିବା ବେଳେ ଶୁକ୍ରବାର ସକାଳୁ ପୁଣିଥରେ ଅଭିଯାନ ଜାରି ରହିବ ବୋଲି ଅଗ୍ନିଶମ ଅଧିକାରୀ ବିକାଶ ମୁଦୁଲି କହିଛନ୍ତି ।ଗତ ପ୍ରାୟ ୨ ବର୍ଷ ଅବଧି ମଧ୍ୟରେ ପେଣ୍ଠା ,ନୂଆଗଡ, ତଲାସିଙ୍ଗି, ସେବକ ଟିକରପଡ଼ା, ଗୋଲଣ୍ଡା, କଇଠଖଣ୍ଡି ପ୍ରଭୃତି ଗ୍ରାମର ୧୦ ରୁ ଉର୍ଦ୍ଧ୍ବ ଜଣ ନଦୀ ଗଣ୍ଡ ମାନଙ୍କରେ ବୁଡ଼ିଯାଇ ମୃତ୍ୟୁବରଣ କରିଥିବା ସରପଞ୍ଚ ଜଣାଇଛନ୍ତି।
