ଚଣ୍ଡିଗଡ଼,୧୯ ।୩: ଖଲିସ୍ତାନ ସମର୍ଥକ ତଥା କଟ୍ଟରପନ୍ଥି ଅମୃତପାଲ ସିଂଙ୍କ ବିରୋଧରେ ପଞ୍ଜାବ ପୋଲିସ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ପୋଲିସ ଅମୃତପାଲଙ୍କୁ ପଳାତକ ଘୋଷଣା କରିଛି । ତାଙ୍କର ଦୁଇଟି କାରକୁ ଜବତ କରିବା ସହ ତାଙ୍କର ଗନରଙ୍କୁ ଧରିଛି । ସେମାନଙ୍କ ଅସ୍ତ୍ରର ବୈଧତାକୁ ଯାଞ୍ଚ କରାଯାଉଛି । ଜଳନ୍ଧର ପୋଲିସ କମିଶନର କୁଲଦୀପ ସିଂ ଚହଲଙ୍କ ଅନୁଯାୟୀ, ଅମୃତପାଲ ସିଂଙ୍କୁ ଖୁବଶୀଘ୍ର ଗିରଫ କରିବାକୁ ପଞ୍ଜାବ ପୋଲିସା ଯବାନ ବଳ ଲଗାଇ ଦେଇଛନ୍ତି । ଏବେ ପର୍ଯ୍ୟନ୍ତ ୭୮ ଲୋକଙ୍କୁ ଗିରଫ କରାଯାଇଛି ।
ପଞ୍ଜାବ ପୋଲିସର ସୂଚନା ଅନୁଯାୟୀ, ଅମୃତପାଲଙ୍କ ବିରୋଧରେ ରାଜ୍ୟରେ ବଡ ଧରଣର ରାଜ୍ୟବ୍ୟାପୀ ତଲାସି ଅଭିଯାନ ଆରମ୍ଭ କରାଯାଇଛି । ଏପଟେ ଆଉ କେତେଜଜଣ ଖଲିସ୍ତାନୀ ସମର୍ଥକଙ୍କୁ ହାଜତକୁ ନିଆଯାଇଛି । ଅମୃତପାଲଙ୍କ ସହ ଆଉ କେତେଜଣ ଖଲିସ୍ତାନୀ ସମର୍ଥକ ଫେରାର ଥିବା ବେଳେ ସେମାନଙ୍କୁ ଧରିବାକୁ ବଡ ଧରରଣ ଅଭିଯାନ ଆରମ୍ଭ କରାଯାଇଛି । ୱାରିସ ପଞ୍ଜାବ କେ ସଙ୍ଗଠନର ମୁଖ୍ୟ ଅମୃତପାଲ କେତେଜଣ ସାଥିଙ୍କ ସହ ଫେରାର ହୋଇଯାଇଛନ୍ତି । ଗିରଫ ହୋଇଥିବା ଅଭିଯୁକ୍ତଙ୍କ ନିକଟରୁ .୩୧୫ ବୋର ରାଇଫଲ, ଆହୁରି ୭ଟି ୧୨ ବୋରର ରାଇଫଲ, ଏକ ରିଭଲଭର ଓ ବତଭିନ୍ନ କ୍ୟାଲିବରର ୩୭୩ ବନ୍ଧୁକ ଜବତ କରାଯାଇଛି ।
ଏହାରି ମଧ୍ୟରେ ସମ୍ପୂର୍ଣ୍ଣ ପଞ୍ଜାବରେ ହାଇ ଆଲର୍ଟ ଜାରି କରାଯାଇଛି । ପରିସ୍ଥିତି ବିଗିଡିବା ଆଶଙ୍କା କରି ପଞ୍ଜାବରେ ରବିବାର ଦ୍ୱିପ୍ରହର ପର୍ଯ୍ୟନ୍ତ ମୋବାଇଲ ଇଣ୍ଟରନେଟକୁ ବନ୍ଦ କରି ଦିଆଯାଇଛି ।
