ଭୁବନେଶ୍ୱର,୨।୧୦(ବ୍ୟୁରୋ): ଓଡ଼ିଶାର ହସ୍ତତନ୍ତ ଓ ବୟନ ସାମଗ୍ରୀ ନିଜର ସ୍ବତନ୍ତ୍ରତା ପାଇଁ ସବୁବେଳେ ଜାତୀୟ ତଥା ଅନ୍ତର୍ଜାତୀୟ ଚାହିଦା ବଜାୟ ରଖି ଆସିଛି। ଶନିବାର ୟୁନେସ୍କୋ ପକ୍ଷରୁ ପ୍ରକାଶିତ ରିପୋର୍ଟରେ ଦେଶର ୫୦ଟି ସ୍ବତନ୍ତ୍ର ତଥା ଆଇକନିକ୍ ଐତିହ୍ୟ ବୟନକଳା ସାମଗ୍ରୀ ମଧ୍ୟରେ ଓଡ଼ିଶାର ୫ ଉତ୍ପାଦ ସ୍ଥାନ ପାଇଛି। ‘ହ୍ୟାଣ୍ଡ୍ମେଡ୍ ଅଫ୍ ଦି ଟ୍ବେଣ୍ଟିଫାଷ୍ଟ ସେଞ୍ଚୁରୀ: ସେଫ୍ଗାର୍ଡିଂ ଟ୍ରାଡିଶନାଲ ଇଣ୍ଡିଆନ ଟେକ୍ସଟାଇଲ୍’ ନାମକ ଏହି ରିପୋର୍ଟରେ ଉତ୍ତର, ଦକ୍ଷିଣ ଓ ପଶ୍ଚିମ ଭାରତରୁ ୧୧ଟି ଲେଖାଏ, ପୂର୍ବ ଭାରତରୁ ୧୦ଟି ଓ ଉତ୍ତର ପୂର୍ବ ରାଜ୍ୟରୁ ୪ଟି ଉତ୍ପାଦ ତାଲିକାଭୁକ୍ତ ହୋଇଛି। ପୂର୍ବାଞ୍ଚଳ ବୟନକଳା ଉତ୍ପାଦ ମଧ୍ୟରେ ଓଡିଶାର ୫ଟି ପ୍ରସିଦ୍ଧ ହସ୍ତତନ୍ତ ବସ୍ତ୍ର ସ୍ଥାନ ପାଇଛି। ସେଗୁଡ଼ିକ ହେଉଛି ସମ୍ବଲପୁରର ‘ବାନ୍ଧ କଳା କାର୍ଯ୍ୟ’, ବ୍ରହ୍ମପୁରର ‘ପାଟ’ (ଫୋଡା କୁମ୍ଭ), ଖୋର୍ଦ୍ଧାର ‘ଧଳାପଥର ସ୍କ୍ରିନ୍’, କନ୍ଧମାଳର ଡଙ୍ଗରିଆ ହସ୍ତତନ୍ତ ବସ୍ତ୍ର ଏବଂ କେନ୍ଦୁଲିର କାଲିଗ୍ରାଫିକ୍ (ହସ୍ତଲିପି) ବୁଣା ପାଟ।
