କୋଲକାତା,୧୪।୪: ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଶୁକ୍ରବାର ପଶ୍ଚିମବଙ୍ଗର ବୀରଭୁମି ଜିଲାର ସିଉଡିରେ ଏକ ଜନସଭାକୁ ସମ୍ବୋଧିତ କରିଛନ୍ତି। ଏହି ସମୟରେ ସେ ମମତା ବାନାର୍ଜୀଙ୍କ ସରକାର ଓ ତ୍ରୁଣମୂଳ କଂଗ୍ରେସ ଉପରେ ଖୁବ୍ ବର୍ଷିଛନ୍ତି। ସେ କହିଛନ୍ତି ୨୦୨୫ରେ ପ୍ରଥମେ ମମତା ବାନାର୍ଜୀଙ୍କ ସରକାର ଭାଙ୍ଗିଯିବ। ଏହାସହ ଶାହା ଦାବି କରିଛନ୍ତି କି ଏଥର ଲୋକ ସଭା ନିର୍ବାଚନରେ ଭାରତୀୟ ଜନତା ପାର୍ଟି(ଭାଜପା) ରାଜ୍ୟରେ ୩୫ରୁ ଅଧିକ ଆସନରେ ବିଜୟୀ ହେବ।
ଶାହା ଟିଏମସି ସୁପ୍ରିମୋ ମମତା ବାନାର୍ଜୀଙ୍କୁ ଟାର୍ଗେଟ କରି କହିଛନ୍ତି, ଦିଦି ପଶ୍ଚିମବଙ୍ଗ ଜନତାଙ୍କ ପାଇଁ କାମ କରୁ ନାହାନ୍ତି, ତାଙ୍କର ଲକ୍ଷ୍ୟ ନୁହେଁ ରାଜ୍ୟର ଜନତାଙ୍କ କଲ୍ୟାଣ, ତାଙ୍କର ଏକମାତ୍ର ଲକ୍ଷ୍ୟ ତାଙ୍କ ପୁତୁରାକୁ ମୁଖ୍ୟମନ୍ତ୍ରୀ କରିବା। ହେଲେ ଏହା ସମ୍ଭବ ହେବ ନାହିଁ। ପଶ୍ଚିମବଙ୍ଗର ପରବର୍ତ୍ତି ମୁଖ୍ୟମନ୍ତ୍ରୀ ଭାଜପାର ହେବେ।
ପଶ୍ଚିମବଙ୍ଗର ଖରାପ ଆଇନ ବ୍ୟବସ୍ଥାକୁ ନେଇ ଶାହା କହିଛନ୍ତି, ଦିଦିଙ୍କ ସାମ୍ନାରେ ପଶ୍ଚିମବଙ୍ଗ ବୋମା ବିସ୍ଫୋରଣର ସେଣ୍ଟର ହୋଇଗଲାଣି। ସେ କହିଛନ୍ତି ନିକଟରେ ଏବେ ଏବେ ଏନଆଇଏ ବୀରଭୂମିରୁ ୮୦ରୁ ଅଧିକ ଡେଟୋନେଟର ଓ ୨୭ ହଜାର କିଲୋ ଆମୋନିୟମ ନାଇଟ୍ରେଟ ଜବତ କରିଛି। ଯଦି ଏନଆଇଏ ଏହାକୁ ଜବତ କରି ନ ଥାଆନ୍ତା ତେବେ କେତେଯେ ନୀରିହ ଜନତାଙ୍କ ଜୀବନ ଯାଇଥାଆନ୍ତା କେହି ଗଣି ପାରି ନ ଥାଆନ୍ତେ। ସଭା ଆରମ୍ଭରୁ ଶାହା ସିଉଡିରେ ବାବା ସାହେବ ଡା.ଭିମରାଓ ଆମ୍ବେଦକରଙ୍କ ଜନ୍ମତିଥିରେ ତାଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ଶ୍ରଦ୍ଧାଞ୍ଜଳି ଦେଇଥିଲେ।
