ୱାଶିଂଟନ,୧୧ ।୯: ଆମେରିକାର ୯/୧୧ ଆତଙ୍କବାଦୀ ଆକ୍ରମଣକୁ ଆଜି ୨୧ ବର୍ଷ ପୁରଣ ହୋଇଛି । ଏହି ଦିନକୁ ଆମେରିକା ପାଇଁ କଳା ଦିବସ ବୋଲି କୁହାଯାଏ । ଆମେରିକା ଇତିହାସରେ ଏହା ସବୁଠାରୁ ବଡ ଆତଙ୍କବାଦୀ ଆକ୍ରମଣ ଥିଲା । ଆତଙ୍କବାଦୀ ସଙ୍ଗଠନ ଅଲକାଏଦା ଦ୍ୱାରା ଏହି ଆକ୍ରମଣ କରାଯାଇଥିଲା । ଏହି ଆକ୍ରମଣ ଆଫଗାନିସ୍ତାନରେ ବସିଥିବା ଆତଙ୍କବାଦୀ ସଙ୍ଗଠନର ମୁଖ୍ୟ ଓସାମା ବିନ ଲାଡେନଙ୍କ ଦ୍ୱାରା କରାଯାଇଥିଲା । ସାରା ବିଶ୍ୱକୁ ସ୍ତବ୍ଧ କରିଦେବା ଭଳି ଏହି ଆକ୍ରମଣର ମାଷ୍ଟର ମାଇଣ୍ଡ ଥିଲେ ଓସାମା ବିନ ଲାଡେନ । ଆମେରିକାର ୱାର୍ଲଡ ଟ୍ରେଡ ସେଣ୍ଟର ଉପରେ କରାଯାଇଥିବା ଏହି ଆକ୍ରମଣକୁ ସଫଳ କରିବାକୁ ଓସାମା ବିନ ଲାଡେନ ୧୯ ଜଣ ଆତଙ୍କବାଦୀଙ୍କୁ ଏଥିରେ ସାମିଲ କରିଥିଲେ । ଆତଙ୍କବାଦୀମାନେ ଆମେରିକାର ବିମାନକୁ ହାଇଜାକ କରି ୱାର୍ଲଡ ଟ୍ରେଡ ସେଣ୍ଟର ଉପରେ କ୍ରାସ କରି ଦେଇଥିଲେ । ଦୁଇଟି ଯାକ ବିଲଡିଂରେ ଦୁଇଟି ଅଲଗା ଅଲଗା ବିମାନ କ୍ରାସ କରାଯାଇଥିଲା । ଆକ୍ରମଣରେ ହଜାର ହଜାର ସଂଖ୍ୟାରେ ଲୋକଙ୍କ ମୃତ୍ୟୁ ହୋଇଥିଲା । ଏହାସହ ଶହ ଶହ ଲୋକ ଗୁରୁତର ଆହତ ହୋଇଯାଇଥିଲେ । କେତେକଙ୍କ ମୃତ ଶରୀର ମିଳି ନ ଥିବା ବେଳେ ଆଉ କେତେକଙ୍କ ମୃତ ଶରୀରକୁ ଚିହ୍ନଟ ବି କରାଯାଇ ପାରି ନ ଥିଲା । ଏହି ଆତଙ୍କବାଦୀ ଆକ୍ରମଣ ପରେ ଦେଶ ଆର୍ଥିକ ସଙ୍କଟର ସାମ୍ନା କରିଥିଲା ।
