ଲକ୍ଷ୍ନୌ,୧୪ ।୧୦: ଉତ୍ତର ପ୍ରଦେଶର ଆମ୍ବେଦକର ନଗର ଘାଘରା ନଦୀର ଜଳସ୍ତର ବଢି ଯାଇଥିବାରୁ ଏହାର ଆଖପାଖ ଅଞ୍ଚଳରେ ଭୟଙ୍କର ବନ୍ୟା ପରିସ୍ଥିତି ସୃଷ୍ଟି ହୋଇଛି । ଏହି ବିପତ୍ତି ମଧ୍ୟରେ ଜିଲାପାଳ ସାମୁଏଲ ପଲ ଏନଙ୍କର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଉକ୍ତ ଭିଡିଓରେ ସେ ବନ୍ୟା ପୀଡ଼ିତଙ୍କୁ କହୁଛନ୍ତି, ସରକାର କୌଣସି ଜମାଟୋ ସର୍ଭିସ ଚଲାଉ ନାହାନ୍ତି ଯେ ଘର ଘର ଖାଦ୍ୟ ପହଞ୍ଚାଇବେ । ଏବେ ଏହା ସୋସିଆଲ ମିଡିଆରେ ଭାଇରାଲ ହେବା ପରେ ଆଲୋଚନାର ପରିସରକୁ ଆସିଯାଇଛି ।
ଭାଇରାଲ ଭିଡିଓରେ ଜିଲାପାଳ ସାମୁଏଲ ପଲ ଏନ ବନ୍ୟା ଆଶ୍ରୟ ସ୍ଥଳ ନିକଟରେ ବନ୍ୟା ପୀଡ଼ିତଙ୍କୁ କହୁଛନ୍ତି, ବନ୍ୟା ଆଶ୍ରୟ ସ୍ଥଳ ନିର୍ମାଣ କରାଯାଇଛି । କ୍ଲୋରିନ ଟାବଲେଟ ଦିଆଯିବ, କାହାକୁ କୌଣସି ସମସ୍ୟା ହେବ ନାହିଁ, କେହି ରୋଗଗ୍ରସ୍ତ ହେଲେ ଡାକ୍ତର ଆସି ଦେଖିଦେବେ । ସେଥିପାଇଁ ବନ୍ୟା ଆଶ୍ରୟ ସ୍ଥଳ ନିର୍ମାଣ କରାଯାଇଛି । ବନ୍ୟା ଆଶ୍ରୟ ସ୍ଥଳର କ’ଣ ଉଦ୍ଦେଶ୍ୟ ରହିଛି । ଯଦି ଆପଣ ଘରେ ରହିବେ ତେବେ କ’ଣ ଆମେ ଘର ଘର ଖାଦ୍ୟ ପହଞ୍ଚାଇବୁ, ଜମାଟୋ ସର୍ଭିସ ଚଲାଉଛନ୍ତି କି ସରକାର । ସୂଚନାଯୋଗ୍ୟ, ବନ୍ୟା ପୀଡ଼ିତଙ୍କ ପାଇଁ ୫୦୦ ମିଟର ବା ୧ କିଲୋମିଟର ମଧ୍ୟରେ ଗୋଟିଏ ଲେଖାଏଁ ବନ୍ୟା ଆଶ୍ରୟ ସ୍ଥଳ ଖୋଲା ଯାଇଛି ।
