ଭୁବନେଶ୍ୱର,୭।୮ (ବ୍ୟୁରୋ): ରାସ୍ତାରେ ଫଳ ବିକ୍ରି କରୁଥିବାରୁ ଅନେକ ସମୟରେ ଟ୍ରାଫିକ୍ ଜାମ୍ ପରିସ୍ଥିତି ସୃଷ୍ଟି ହେଉଛି। ଏଥିସହିତ ଫଳଗୁଡିକ ବାହାରେ ଖରା, ବର୍ଷା ଖାଇ ପଚିଶଢ଼ି ଯାଉଛି। ତେଣୁ ଫଳ ବ୍ୟବସାୟୀମାନେ କିପରି ସୁରୁଖୁରୁରେ ବେପାର କରିପାରିବେ ସେଥିପାଇଁ ୟୁନିଟ-୨ ପେଟ୍ରୋଲ ପମ୍ପ ନିକଟରେ ଫଳ ବଜାର ନିର୍ମାଣ କରାଗଲା। ୩ ମହଲା ବିଶିଷ୍ଟ କୋଠାରେ ୭୮ଜଣ ବ୍ୟବସାୟୀ ଫଳ ବିକ୍ରି ପାଇଁ ସ୍ଥାନ ପାଇଲେ। ମାତ୍ର ବଜାର ଖୋଲିବାର ଦୀର୍ଘଦିନ ବିତିଯାଇଥିଲେ ବି ଫଳ ବ୍ୟବସାୟୀମାନେ ସେଠାକୁ ଯିବା ପରିବର୍ତ୍ତେ ପୂର୍ବପରି ରାସ୍ତାକଡ଼ରେ ବିକ୍ରି କରୁଛନ୍ତି। ବ୍ୟବସାୟୀମାନଙ୍କୁ ମିଳିଥିବା ଅନୁରୂପ ସ୍ଥାନରେ ଅଗଷ୍ଟ ମାସ ସୁଦ୍ଧା ଫଳ ବିକ୍ରୟ ନ କଲେ ସେମାନଙ୍କୁ ପରବର୍ତ୍ତୀ ସମୟରେ ଏଠାରେ ସ୍ଥାନ ମିଳିବ ନାହିଁ ବୋଲି ବିଏମସି କମିଶନର ବିଜୟ ଅମୃତା କୁଲାଙ୍ଗେ ଚେତାବନୀ ଦେଇଥିଲେ। ତେବେ କଣ୍ଟ ପୂରଣ ହୋଇଥିଲେ ମଧ୍ୟ ବ୍ୟବସାୟୀମାନେ ମାର୍କେଟ କମ୍ପ୍ଲେକ୍ସରେ ବେପାର ଆରମ୍ଭ କରି ନ ଥିବାରୁ ବିଏମ୍ସି ପକ୍ଷରୁ ଶନିବାର ବ୍ୟବସାୟୀଙ୍କ ଉଦ୍ଦେଶ୍ୟରେ ବିଜ୍ଞପ୍ତି ଜାରି କରାଯାଇଛି। ୧୨ ତାରିଖ ମଧ୍ୟରେ ନିଜ ଦୋକାନ ସମ୍ପୂର୍ଣ୍ଣ କାର୍ଯ୍ୟକ୍ଷମ କରା ନ ଗଲେ ବ୍ୟବସାୟୀଙ୍କ ଆବଣ୍ଟନ ରଦ୍ଦ କରାଯିବ ବୋଲି ବିଜ୍ଞପ୍ତିରେ ସୂଚାଇଦିଆଯାଇଛି। ଏହାସହ ବିଏମ୍ସିକୁ ବ୍ୟବସାୟୀମାନେ ଦେଇଥିବା ଅମାନତ ରାଶି ବାଜ୍ୟାପ୍ତ କରାଯିବ ବୋଲି ଏଥିରେ ଦର୍ଶାଯାଇଛି । ଭବିଷ୍ୟତ ଉକ୍ତ ବ୍ୟବସାୟୀଙ୍କୁ କୌଣସି ଦୋକାନ ଗୃହ ଆବଣ୍ଟନ କରାଯିବ ନାହିଁ ବୋଲି ବିଜ୍ଞପ୍ତିରେ ସ୍ପଷ୍ଟ ଭାବେ ଉଲ୍ଲେଖ ରହିଛି। ସୂଚନାଯୋଗ୍ୟ, ମାର୍କେଟ କମ୍ପ୍ଲେକ୍ସରେ ବ୍ୟବସାୟ ପାଇଁ ସେମାନଙ୍କୁ ବର୍ଗଫୁଟ ପିଛା ୩୫ ଟଙ୍କା ଲେଖାଏ ମାସିକ ଦେୟ ଦେବେ। ପ୍ରତ୍ୟେକ ମହଲାରେ ୮ଫୁଟ ଦୈର୍ଘ୍ୟ ୧୦ଫୁଟ୍ ପ୍ରସ୍ତ ଥିବା ୨୪ କୋଠରି ରହିଛି। ୧.୯୨ କୋଟି ଟଙ୍କା ବ୍ୟୟରେ ୪ ହଜାର ବର୍ଗଫୁଟ ଅଞ୍ଚଳରେ ଏହି ମାର୍କେଟ କମ୍ପ୍ଲେକ୍ସ ନିର୍ମାଣ କରାଯାଇଛି। ପ୍ରତି ମହଲାରେ ୨ଟି ଲେଖାଏ ଏସି କୋଠା ରହିଛି। ଭୂତଳ ପାର୍କିଂର କରାଯାଇଛି।
