କୁଜଙ୍ଗ,୨୧।୮(ଡି.ଏନ୍.ଏ): କୁଜଙ୍ଗ ବ୍ଲକର ୧୦ଟି ପଞ୍ଚାୟତର ପ୍ରାୟ ୧୫ ହଜାରରୁ ଉର୍ଦ୍ଧ୍ୱ ଲୋକ ୬ ଦିନ ହେବ ବନ୍ୟା ପାଣି ଘେରରେ ରହି ବିଭିନ୍ନ ସମସ୍ୟା ଭୋଗୁଛନ୍ତି। ମାତ୍ର ବ୍ଲକ ପ୍ରଶାସନ ଏପର୍ଯ୍ୟନ୍ତ କେତେକ ପଞ୍ଚାୟତରେ ରିଲିଫ ସାମଗ୍ରୀ ପହଞ୍ଚାଇ ନ ଥିବା ବେଳେ ଆଉ କିଛି ପଞ୍ଚାୟତରେ ରିଲିଫ ସାମଗ୍ରୀ ପରିଚାଳନାରେ ତ୍ରୁଟି ହୋଇଥିବା ଅଭିଯୋଗ ହୋଇଛି। ଅପରପକ୍ଷେ କାଠକୋଟ ପଞ୍ଚାୟତକୁ ଶନିବାର ରିଲିଫ ସାମଗ୍ରୀ ପଠାଯାଇଥିବା ସୂଚନା ମିଳିଛି।
ଅଗଷ୍ଟ ୧୬ ରେ ଜିଲାନାସୀ ପଞ୍ଚାୟତରେ ବ୍ଲକ ପ୍ରଶାସନ ପକ୍ଷରୁ ରିଲିଫ ବଣ୍ଟନ କରାଯାଇଥିଲା। ମାତ୍ର ଏଠାରେ ସରପଞ୍ଚଙ୍କୁ ରିଲିଫ ସାମଗ୍ରୀ ବଣ୍ଟନ କରିବାକୁ ଦିଆ ନ ଯାଇ ଜିଲା ପରିଷଦ ସଭ୍ୟଙ୍କୁ ଦାୟିତ୍ୱ ଦିଆଯାଇଥିଲା। ମାତ୍ର ସମ୍ପୃକ୍ତ ଜିଲା ପରିଷଦ ସଭ୍ୟ ଠିକ୍ ଭାବେ ରିଲଫ୍ ବଣ୍ଟନ ନ କରିବାରୁ ୧୭ ତାରିଖରେ ବ୍ଲକ କାର୍ଯ୍ୟାଳୟରେ ପ୍ରତିବାଦ ହୋଇଥିଲା। ଏହାପରେ ସରପଞ୍ଚଙ୍କୁ ରିଲଫ୍ ବଣ୍ଟନ ଦାୟିତ୍ୱ ଦିଆଯାଇଥିଲା। ପୁନର୍ବାର ୧୮ ତାରିଖରେ ପଞ୍ଚାୟତ ନିର୍ବାହୀ ଅଧିକାରୀ ରିଲିଫ ସାମଗ୍ରୀ ବଣ୍ଟନ କରିଥିଲେ। ରିଲଫ୍ ପରିଚାଳନାରେ ବାରମ୍ବାର ପରବର୍ତ୍ତନ ହେବା ଯୋଗୁ ସାଧାରଣରେ ଅସନ୍ତୋଷ ପ୍ରକାଶ ପାଇଥିଲା। ସେହିପରି ସାଇଲୋ ପଞ୍ଚାୟତରେ ସରପଞ୍ଚ ସରୋଜ ସେଠିଙ୍କୁ ଅଣଦେଖା କରି ଜଣେ ପୂର୍ବତନ ସରପଞ୍ଚଙ୍କୁ ଦାୟିତ୍ୱ ଦିଆଯାଇଥିଲା। ଏନେଇ ସରପଞ୍ଚ ସେଠୀ ପହଞ୍ଚତ୍ ବ୍ଲକ କାର୍ଯ୍ୟାଳୟରେ ହୋହାଲ୍ଲା କରିଥିଲେ।
ଅପରପକ୍ଷେ ପାଇକା ନଦୀରେ ଘାଇ ହୋଇ କାଠକୋଟ ପଞ୍ଚାୟତ ସର୍ବାଧିକ କ୍ଷତିଗ୍ରସ୍ତ ହୋଇଥିଲେ ବି ଏପର୍ଯ୍ୟନ୍ତ ରିଲିଫ ସାମଗ୍ରୀ ପହଞ୍ଚତ୍ ପାରିନାହିଁ ବୋଲି ପୂର୍ବତନ ସରପଞ୍ଚ ମିହିର ପଟ୍ଟନାୟକ କହିଛନ୍ତି। ଏପରିକି ସେଠାରେ ଡଙ୍ଗା ଖଣ୍ଡେ ଯୋଗାଇ ଦିଆଯାଇ ନାହିଁ ବୋଲି ସେ କହିଛନ୍ତି। ଏ ସମ୍ପର୍କରେ ବିଡିଓଙ୍କ ମତାମତ ନେବାକୁ ଟେଲିଫୋନ କରାଯାଇଥିଲେ ବି ସେ ବାରମ୍ବାର ଟେଲିଫୋନ କାଟି ଦେଇଥିଲେ। ମାତ୍ର ଅତିରିକ୍ତ ବିଡିଓ ଜ୍ଞାନଦା ନାୟକ କହିଛନ୍ତି, ଶନିବାର ଡଙ୍ଗା ଯୋଗେ ରିଲିଫ୍ ସାମଗ୍ରୀ ପଠାଯାଇଛି। ଡଙ୍ଗା ଚାଲିବା ସମ୍ପର୍କରେ ଦାୟିତ୍ୱରେ ଥିବା ବ୍ଲକ କ୍ୟାଶିୟର କହିଛନ୍ତି, ବଡବାଲିକଣୀ ପଞ୍ଚାୟତର ସରଳିଠାରୁ କାଠକୋଟ ପର୍ଯ୍ୟନ୍ତ ଡଙ୍ଗା ଚାଲିଛି। ସେହିପିର କୁଜଙ୍ଗ ବ୍ଲକର ରିଲିଫ ସାମଗ୍ରୀ ଗ୍ରହଣ ଓ ବଣ୍ଟନ ଦାୟିତ୍ୱରେ ଯୋଗାଣ ଅଧିକାରୀ ଥିଲେବି ଅନ୍ୟଜଣେ ବେସରକାରୀ ବ୍ୟକ୍ତି ସୂଚନା କେନ୍ଦ୍ରରେ ଏହାର ହିସାବ କିତାବ ରଖୁଛନ୍ତି। ଏପରିକି ସେ ରିଲିଫ ବଣ୍ଟନ ଦାୟିତ୍ୱରେ ଥିବା ଅଭିଯୋଗ ହୋଇଛି। କୌଣସି ଅଧିକାରୀଙ୍କୁ ବନ୍ୟା ପରିସ୍ଥିତି ଓ ରିଲିଫ ସାମଗ୍ରୀ ବଣ୍ଟନ ସମ୍ପର୍କରେ ପଚାରିବାରେ ସେମାନେ ସମ୍ପୃକ୍ତ ବ୍ୟକ୍ତିଙ୍କ ପାଖକୁ ପଠାଉଛନ୍ତି ା ପ୍ରଶାସନ ପକ୍ଷରୁ ୨୪ଟା ଡଙ୍ଗା ଯୋଗାଇ ଦିଆଯାଇଥିବା କୁହାଯାଉଥିବାବେଳେ ବାସ୍ତବରେ ଏତେ ପରିମାଣର ଡଙ୍ଗା ଯୋଗାଇ ଦିଆଯାଇନାହିଁ। ବ୍ଲକ ପ୍ରଶାସନର ମନମୁଖି କାର୍ଯ୍ୟ ଯୋଗୁ ବନ୍ୟା ବିପନ୍ନମାନଙ୍କ ଦୁର୍ଦ୍ଦଶା ବଢ଼ିଥିବା ଅଭିଯୋଗ ହୋଇଛି।
ଏସମ୍ପର୍କରେ ଏବିଡିଓ ନାୟକ କହିଛନ୍ତି, ଯୋଗାଣ ଅଧିକାରୀ ବିବେକାନନ୍ଦ ମହାନ୍ତିଙ୍କୁ ରିଲଫ ଦାୟିତ୍ୱ ଦିଆଯାଇଛି। ମାତ୍ର ଲୋକପ୍ରତିନିଧିଙ୍କ ଗଣ୍ଡଗୋଳ ପ୍ରସଙ୍ଗ ସେ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଥିଲେ। ଏସମ୍ପର୍କରେ ଯୋଗାଣ ଅଧିକାରୀ ମହାନ୍ତି କହିଛନ୍ତି, ରିଲିଫ୍ କାର୍ଯ୍ୟରେ ସହାୟତା କରିବା ପାଇଁ ସେ ସମ୍ପୃକ୍ତ ବ୍ୟକ୍ତିଙ୍କୁ ଦାୟିତ୍ୱ ଦେଇଛନ୍ତି।
