ତେହରାନ,୬ା୭: ଇରାନ ସୁପ୍ରିମ ଲିଡର ଆୟାତୋଲ୍ଲା ଅଲି ଖାମେନେଇଙ୍କ ଅନ୍ତିମ ସଂସ୍କାର ପ୍ରାର୍ଥନା ରବିବାର ରାଜଧାନୀ ତେହରାନ୍ରେ ଅନୁଷ୍ଠିତ ହୋଇଥିବାବେଳେ ସେଥିରେ ଦେଶର ସମସ୍ତ ଶୀର୍ଷ ଅଧିକାରୀ ଓ ଖାମେନେଇଙ୍କ ୩ ପୁଅ ଉପସ୍ଥିତ ଥିଲେ। ତେବେ ତାଙ୍କ ଉତ୍ତରାଧିକାରୀ ତଥା ନୂଆ ସୁପ୍ରିମ ଲିଡର ମୋଜତାବା ଖାମେନେଇ ବାପାଙ୍କ ଶେଷକୃତ୍ୟ ପ୍ରାର୍ଥନାରେ ଅନୁପସ୍ଥିତ ଥିବା ଦେଖାଯାଇଛି। ଖାମେନେଇଙ୍କ ଶେଷକୃତ୍ୟ ସ୍ଥଳରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ହତ୍ୟା ପାଇଁ ଆହ୍ବାନ ଦିଆଯାଇଥିଲା। ଯୁଦ୍ଧ ବିପଦ ଦୂର ହୋଇ ନ ଥିବାବେଳେ ତେହରାନ୍ରେ ଅନେକ ଲକ୍ଷ ଲୋକଙ୍କ ଆଗରେ ଖାମେନେଇଙ୍କ ୩ ପୁଅ ଓ ଶୀର୍ଷ ଅଧିକାରୀମାନଙ୍କ ଉପସ୍ଥିତି ଅକଳ୍ପନୀୟ ଥିଲା। ସୂଚନାଯୋଗ୍ୟ, ଫେବୃଆରୀ ୨୮ରେ ଆମେରିକା ଓ ଇସ୍ରାଏଲ୍ର ମିଳିତ ଏୟାରଷ୍ଟ୍ରାଇକ୍ରେ ସୁପ୍ରିମ ଲିଡର ଖାମେନେଇ ଓ ତାଙ୍କ ପରିବାରର କେତେଜଣ ସଦସ୍ୟ ଓ ଅନ୍ୟ ଅଧିକାରୀମାନେ ନିହତ ହୋଇଥିଲେ। ଯୁଦ୍ଧ ସମୟରେ ସର୍ବସାଧାରଣରେ ଉପସ୍ଥିତ ଅନ୍ୟ ନେତାମାନଙ୍କୁ ମଧ୍ୟ ଇସ୍ରାଏଲ ଟାର୍ଗେଟ କରିଥିଲା। ଏହା ସତ୍ତ୍ୱେ ରବିବାର ତେହରାନ୍ରେ ସବୁ ଶୀର୍ଷ ନେତା ଏକାଠି ହୋଇଥିଲେ ମଧ୍ୟ ନୂଆ ସୁପ୍ରିମ ଲିଡର ମୋଜତାବାଙ୍କ ଦେଖା ମିଳି ନ ଥିଲା। ଫେବୃଆରୀ ୨୮ ଆକ୍ରମଣରେ ଆହତ ହୋଇଥିବା ମୋଜତାବା ନିଜକୁ ଲୁଚାଇ ରଖିଥିବା ବିଶ୍ୱାସ କରାଯାଉଛି। ୯୭ ବର୍ଷୀୟ ଶିଆ ମୌଲବୀ ଆୟାତୋଲ୍ଲା ଜାଫର ସୋଭାନି ତେହରାନ୍ର ଗ୍ରାଣ୍ଡ ମୋସାଲ୍ଲାଠାରେ ଖାମେନେଇଙ୍କ ପ୍ରାର୍ଥନା ସଭାର ନେତୃତ୍ୱ ନେଇଥିଲେ। ଖାମେନେଇଙ୍କ ପୁଅ ମାସୁଦ, ମେସାମ ଓ ମୋସ୍ତାଫଙ୍କୁ ଯୁଦ୍ଧ ଆରମ୍ଭରୁ ପ୍ରଥମ ଥର ପାଇଁ ଦେଖିବାକୁ ମିଳିଥିଲା। ସେହିପରି ଯୁଦ୍ଧ ପରଠାରୁ ସର୍ବସାଧାରଣରୁ ଦୂରେଇ ରହିଥିବା ରିଭଲ୍ୟୁଶନାରି ଗାର୍ଡ ମୁଖ୍ୟ ଜେନେରାଲ ଅହମଦ ଭାହିଦି ଗୁରୁବାର ପ୍ରଥମ ଥର ଦେଖାଦେଇଥିଲେ।
