ପାରାଦୀପ,୧୨।୪(ସ୍ବ.ପ୍ର.): ଉପକୂଳ ଓଡିଶାର ଗଞ୍ଜାମ, ପୁରୀ, ବାଲେଶ୍ବର ଓ ଜଗତସିଂହପୁର ଜିଲାର ୮ଟି ସ୍ଥାନରେ ପ୍ରଥମ ଥର ପାଇଁ ପେବୃୟାରୀ ଶେଷ ସପ୍ତାହରେ ଶୈବାଳ ଚାଷ ହୋଇଥିଲା। ସେଥରୁ ଜଗତସିଂହପୁର ଜିଲା ଏରସମା ବ୍ଲକ ଅଧୀନ ନୋଳିଆସାହି ପାଖ ଜଟାଧାରମୁହାଣ ଅଞ୍ଚଳରେ ଏହି ଚାଷ ସଫଳ ଭାବେ ଉତ୍ପାଦିତ ହୋଇଛି। ଏଠାରେ ୧୦ରୁ ୧୫ ଗ୍ରାମ୍ ଶୈବାଳ ଚାରା ବନ୍ଧା ଯାଇଥିଲା ବେଳେ ୪୫ ଦିନ ମଧ୍ୟରେ ଏକ କିଲୋରୁ ଦେଢ କିଲୋଗ୍ରାମ ହୋଇଯାଇଛି। ବାଲେଶ୍ବର ଜିଲାର ଗୋଟିଏ ସ୍ଥାନରେ ଏହିଭଳି ଶୈବାଳ ବୃଦ୍ଧି ପାଉଛି ବୋଲି ସିଏମଏଫଆରଆଇ(ସେଣ୍ଟ୍ରାଲ ମେରାଇନ ଫିଶରିଜ୍ ରିସର୍ଚ୍ଚ ଇନ୍ଷ୍ଟିଚ୍ୟୁଟ୍)ର ନୋଡାଲ ଅଫିସର ଡା.ରୀତା ଜୟଶଙ୍କର କହିଛନ୍ତି। ତେବେ ଅନ୍ୟସ୍ଥାନଗୁଡିକରେ କିଛି ତ୍ରୁଟି ଯୋଗୁ ଶୈବାଳ ବୃଦ୍ଧି ପାଇବାରେ ପ୍ରତିବନ୍ଧକ ହୋଇଛି। ଏହି ଚାଷ ଓଡିଶାରେ ସଫଳ ହୋଇଥିବାରୁ ମତ୍ସ୍ୟଜୀବୀଙ୍କ ପାଇଁ ରୋଜଗାରର ନୂତନ ଆଶା ସୃଷ୍ଟି ହୋଇଛି।
ସୂଚନାଯୋଗ୍ୟ, ସାମୁଦ୍ରିକ ଶୈବାଳ ଚାଷ ୧୦ ବର୍ଷ ତଳେ ତାମିଲନାଡୁର ରାମେଶ୍ବର ନିକଟ ମଣ୍ଡପମ ନାମକ ଜାଗାରେ ଆରମ୍ଭ ହୋଇଥିଲା। ସେଠାରେ ଏହି ଚାଷ ସଫଳ ହୋଇଛି। ଏବେ ସେଠାରୁ ପ୍ରଚୁର ପରିମାଣରେ ଶୈବାଳ ଉତ୍ପାଦନ ହେଉଛି। ତାକୁ ବିକ୍ରିକରି ମତ୍ସ୍ୟଜୀବୀମାନେ ମାସକୁ ୧୫ ରୁ ୨୫ ହଜାର ଟଙ୍କା ରୋଜଗାର କରୁଛନ୍ତି। ଉକ୍ତ ଶୈବାଳ ଚାଷପାଇଁ ଓଡିଶା ଉପକୂଳରେ ପର୍ଯ୍ୟାପ୍ତ ଭିତ୍ତିଭୂମି ରହିଥିବା ଜଣାପଡିବା ପରେ ସିଏମ୍ଏଫ୍ଆରଆଇ ଓ ମତ୍ସ୍ୟବିଭାଗ ପକ୍ଷରୁ ଏହି ଚାଷ ଆରମ୍ଭ ହୋଇଥିଲା। ଜଗତ୍ସିଂହପୁର ଜିଲାର ନୋଳିଆସାହି ପାଖ ଜଟାଧାର ମୁହାଣ ଏବଂ ପାରାଦୀପ ମାଛଧରା ବନ୍ଦର ସଂଲଗ୍ନ ମହାନଦୀ ମୁହାଣ ଅଞ୍ଚଳରେ ପ୍ରୟୋଗାତ୍ମକ ଭାବେ ଏହି ଚାଷ କରାଯାଇଥିଲା। ପାରୀଦୀପରେ କିନ୍ତୁ ଶୈବାଳ ବୃଦ୍ଧି ପାଇ ନ ଥିଲା। ଏସମ୍ପର୍କରେ ନୋଡାଲ ଅଫିସର ରୀତା କୁହନ୍ତି, ପାରାଦୀପରେ ସାମୁଦ୍ରିକ କରେଣ୍ଟ(ଅନ୍ତଃସ୍ରୋତ)ଅଧିକ ରହିଛି । ତା ଛଡା ସେହି ସ୍ଥାନରେ ମାଛଧରା ଟ୍ରଲର ଅଧିକ ଯାତାୟାତ କରୁଛି। ଏଥିଯୋଗୁ ଶୈବାଳ ବୃଦ୍ଧି ପାଇବାରେ ବାଧକ ହୋଇଛି। ନୋଳିଆସାହିରେ ଧାର୍ଯ୍ୟ ଲକ୍ଷ୍ୟ ଠାରୁ ଅଧିକ ବୃଦ୍ଧି ପାଇଛି।
ଟୁଥ୍ପେଷ୍ଟଠାରୁ ଆରମ୍ଭ କରି ଆଇସକ୍ରିମ ଓ ପ୍ରସାଧନ ସାମଗ୍ରୀ ଆଦି ଉତ୍ପାଦନରେ ଏହି ଶୈବାଳକୁ ବ୍ୟବହାର କରାଯାଏ। ଏଥିପାଇଁ ଭାରତ ସରକାର ବିଦେଶରୁ ଏହାକୁ ଆମଦାନୀ କରିଥାନ୍ତି। ଏଥିରେ ସଙ୍କରା ଜାତୀୟ ଔଷଧୀୟ ସାମଗ୍ରୀ କାରାଜିନମ ମିଳିଥାଏ। ଶୈବାଳକୁ ୪୫ ଦିନପରେ କଟାଯାଇ ଲୁଣିପାଣିରେ ଧୋଇ ଶୁଖିଯାଏ। ୩୫ପ୍ରତିଶତ ଆର୍ଦ୍ରତାକୁ ଆସିଲେ ତାକୁ ପୁଣି ମଧୁର ପାଣିରେ ଧୋଇ କଟାଯାଇ ପ୍ୟାକିଂ କରାଯାଏ। ଏହାର ବଜାର ମୂଲ୍ୟ କିଲୋ ପିଛା ୫୦ ଟଙ୍କା ରହିଛି। ଏହି ଚାଷକରି ମତ୍ସ୍ୟଜୀବୀମାନେ ରୋଜଗାର କରିବା ପାଇଁ ସୁଯୋଗ ପାଇବେ ବୋଲି ସାମୁଦ୍ରିକ ମତ୍ସ୍ୟ ଅଧିକାରୀ ମନୋରଞ୍ଜନ ମହାପାତ୍ର କହିଛନ୍ତି।
