ଓ୍ବାଶିଂଟନ,୧୬।୨ : ସାରା ବିଶ୍ୱରେ ଆତଙ୍କ ବିସ୍ତାର କରୁଥିବା ଆତଙ୍କବାଦୀ ସଂଗଠନ ଅଲ-କାଏଦା ଏହାର ନୂତନ ମୁଖ୍ୟ ଚୟନ କରିଛି। ଗତ ବର୍ଷ ଜୁଲାଇରେ ଆମେରିକା ଦ୍ୱାରା ଡ୍ରୋନ ଷ୍ଟ୍ରାଇକରେ ଅଲ-କାଏଦା ମୁଖ୍ୟ ଆୟମାନ ଅଲ-ଜାବାହିରିଙ୍କୁ ହତ୍ୟା କରାଯିବା ପରେ ସୈଫ ଅଲ-ଆଦେଲଙ୍କୁ ନୂତନ ଦାୟିତ୍ୱ ଦିଆଯାଇଛି। ଆମେରିକାର ବୈଦେଶିକ ବିଭାଗ ଏ ସମ୍ପର୍କରେ ସୂଚନା ଦେଇଛି। ସୈଫ ଇରାନରେ ଲୁଚି ରହିଛି ଆତଙ୍କବାଦୀ କାର୍ଯ୍ୟକଳାପ ଜାରି ରଖିଛନ୍ତି। ମିଳିତ ଜାତିସଂଘ ପକ୍ଷରୁ ମଧ୍ୟ ଏ ସମ୍ପର୍କରେ ଏକ ରିପୋର୍ଟ ଜାରି କରାଯାଇଛି।
ସେ ୩୦ ବର୍ଷ ବୟସ୍କ ଥିବା ସମୟରେ ସୋମାଲିଆର ମୋଗାଦିସୁରେ ୧୯୯୩ରେ ଅପରେଶନ ବ୍ଲାକ ହକ ଡାଉନ କରିଥିଲେ। ଏହି ଅପରେଶନରେ ୧୯ ଜଣ ଆମେରିକୀୟ ସୈନିକ ନିହତ ହୋଇଥିଲେ। ଏହା ପରେ ସୈନିକମାନଙ୍କ ମୃତଦେହକୁ ରାସ୍ତାରେ ଟାଣି ନିଆଯାଇଥିଲା। ୨୦୧୧ ରେ ଓସାମା ବିନ ଲାଡେନଙ୍କ ହତ୍ୟା ପରଠାରୁ ସୈଫ ଅଲ-କାଏଦା ମଧ୍ୟରେ ଏକ ପ୍ରମୁଖ ରଣନୀତିଜ୍ଞ ହୋଇପାରିଥିବା ଗୁପ୍ତଚର ସଂସ୍ଥା ରିପୋର୍ଟରେ ଦର୍ଶାଯାଇଛି।
ସେ ମିଶରର ସେନାର ଜଣେ ପୂର୍ବତନ ଅଧିକାରୀ ଭାବରେ କାର୍ଯ୍ୟ କରିଛନ୍ତି। ସେ ନିଜକୁ ‘ନ୍ୟାୟର ଖଣ୍ଡା’ ବୋଲି ମଧ୍ୟ କହିଥାନ୍ତି। ଏଫବିଆଇ ତାଙ୍କୁ ମୋଷ୍ଟ ୱାଣ୍ଟେଡ ତାଲିକାରେ ରଖିଛି ଏବଂ ତାଙ୍କ ମୁଣ୍ଡ ଉପରେ ୧୦ ମିଲିୟନ ଡଲାରର ପୁରସ୍କାର ଘୋଷଣା କରାଯାଇଛି।
