କରାଚି,୨୭।୫(ପି.ଟି.): ବିବାଦୀୟ ପାକିସ୍ତାନ ବ୍ୟାଟ୍ସମ୍ୟାନ ଉମର ଆକମଲ ପାକିସ୍ତାନ କ୍ରିକେଟ ବୋର୍ଡ (ପିସିବି)କୁ ୪.୫ ମିଲିୟନ ଅର୍ଥାତ ୪୫ ଲକ୍ଷ ଟଙ୍କା ଜରିମାନା ଦେଇଛନ୍ତି। ପିସିବିର ଆଣ୍ଟି କରପ୍ଶନ ରିହାବିଲିଟେଶନ ପ୍ରୋଗ୍ରାମ୍ରେ ସାମିଲ ହେବାକୁ ସେ ଏହି ପରିମାରଣ ଅର୍ଥ ପ୍ରଦାନ କରିଛନ୍ତି। ଗତ ଫେବୃୟାରୀରେ କୋର୍ଟ ଅଫ୍ ଆର୍ବିଟ୍ରେଶନ ଫର ସ୍ପୋଟର୍ସ (କାସ) ଆକମଲଙ୍କ ଉପରେ ଏହି ଜରିମାନା ଧାର୍ଯ୍ୟ କରିଥିଲା। ସେ ଏହି ଅର୍ଥ ଦେଇଛନ୍ତି ବୋଲି ପିସିବି ସୂତ୍ରରୁ ଜଣାଯାଇଛି। ଫଳରେ ସେ ଏବେ ରିହାମ ପ୍ରୋଗ୍ରାମ୍ରେ ସାମିଲ ହୋଇପାରିବେ ବୋଲି ପିସିବି ତରଫରୁ କୁହାଯାଇଛି। ଏହି ପ୍ରୋଗ୍ରାମରେ ସାମିଲ ହେବାକୁ କିଛି ସମୟ ଆବଶ୍ୟକ ହେବ। ଫଳରେ ଆକମଲ ପୁଣିଥରେ ତାଙ୍କ କ୍ରିକେଟ କ୍ୟାରିୟର ଆରମ୍ଭ କରିବାରେ ବିଳମ୍ବ ହେବ।
ପୂର୍ବରୁ ୪୫ ଲକ୍ଷ ଟଙ୍କା କିସ୍ତିରେ ଦେବାକୁ ଆକମଲ ଅନୁରୋଧ କରିଥିଲେ। ତେବେ ପିସିବି ଏହାକୁ ପ୍ରତ୍ୟାଖ୍ୟାନ କରିଥିଲା। ଦୁର୍ନୀତି ଆଚରଣବିଧି ଉଲ୍ଲଂଘନ କରିବା ଅଭିଯୋଗରେ ଆକମଲ ୨୦୨୦ ଫେବୃୟାରୀରୁ ବାସନ୍ଦ ହୋଇଛନ୍ତି। ଚଳିତ ମାସ ସେ ୩୧ ବର୍ଷରେ ପଦାର୍ପଣ କରିବେ। ସେ ୨୦୧୯ ନଭେମ୍ବରରୁ ପାକିସ୍ତାନ ପାଇଁ ଖେଳିନାହାନ୍ତି। ପୂର୍ବରୁ କାସ୍ ଆକମଲଙ୍କ ୧୮ ମାସର ବାସନ୍ଦକୁ ୧୨ ମାସକୁ କମାଇ ଦେଇଥିଲେ। କିନ୍ତୁ ୪୫ ଲକ୍ଷ ଟଙ୍କା ଜରିମାନା ଦେବାକୁ କହିଥିଲେ। ଗତ ଫେବୃୟାରୀରେ ପିସିବି ଓ ଆକମଲଙ୍କ ବିବାଦର ଶୁଣାଣି କରିଥିଲା କାସ୍। ୧୨ ମାସ ବାସନ୍ଦ କାଟି ସାରିଥିବାରୁ ଉମର ପୁଣି ଥରେ କ୍ରିକେଟକୁ ଫେରିବା ପଥ ପରିଷ୍କାର ହୋଇଛି।
