ମୁମ୍ବାଇ,୧୮।୨: ଟେଷ୍ଟ କ୍ୟାରିୟରର ଉପରେ ପ୍ରଶ୍ନବାଚୀ ସୃଷ୍ଟି ହୋଇଥିବା ବେଳେ ଭାରତୀୟ ବ୍ୟାଟର ଅଜିଙ୍କ୍ୟ ରାହାନେ ଚଳିତ ଘରୋଇ ସିଜନର ପ୍ରଥମ ମ୍ୟାଚ୍ରେ ଶତକ ହାସଲ କରିଛନ୍ତି। ଅହମ୍ମଦାବାଦରେ ସୌରାଷ୍ଟ୍ର ବିପକ୍ଷ ମ୍ୟାଚ୍ରେ ଗୁରୁବାର ଠାରୁ ଆରମ୍ଭ ହୋଇଥିବା ମ୍ୟାଚ୍ରେ ରାହାନେଙ୍କ ଅପରାଜିତ ଶତକ ବଳରେ ପ୍ରଥମ ଦିନ ଶେଷ ସୁଦ୍ଧା ମୁମ୍ବାଇ ୩ ଉଇକେଟ ୨୬୩ ରନ୍ କରିଛି। ଏଲାଇଟ୍ ଗ୍ରୁପ୍ ଡି’ର ଏହି ମ୍ୟାଚ୍ରେ ରାହାନେଙ୍କ ଭଳି ଅପରାଜିତ ୧୨୧ ରନ୍ର ଶତକୀୟ ପାଳି ଖେଳିଛନ୍ତି ସର୍ଫାରାଜ ଖାନ। ହେଲେ ୩୩ ବର୍ଷୀୟ ରାହାନେଙ୍କ ପ୍ରଦର୍ଶନ ଉପରେ ସଭିଙ୍କ ନଜର ଥିଲା।
ସେ ୨୧୨ତମ ବଲରେ ଶତକ ହାସଲ କରିଥିଲେ। ତାଙ୍କ ପାଳିରେ ସାମିଲ ଥିଲା ୧୪ ଚୌକା ଓ ୨ ଛକା। ଦକ୍ଷିଣ ଆଫ୍ରିକା ଗସ୍ତରେ ସମ୍ପୂର୍ଣ୍ଣ ବିଫଳ ହୋଇଥିବା ରାହାନେ ଆରମ୍ଭରୁ ଡିଫେନ୍ସିଭ ଟେକନିକ୍ ଆପଣେଇଥିଲେ। ବରିଷ୍ଠ ବ୍ୟାଟର ୬ଟି ଇନିଂସରେ ମାତ୍ର ୧୩୬ ରନ୍ କରିବାକୁ ସକ୍ଷମ ହୋଇଥିଲେ। ଏଥିଯୋଗୁ ମାର୍ଚ୍ଚ ପ୍ରଥମ ସପ୍ତାହରେ ଶ୍ରୀଲଙ୍କା ବିପକ୍ଷରେ ହେବାକୁ ଥିବା ଘରୋଇ ଟେଷ୍ଟ ସିରିଜ୍ରେ ତାଙ୍କୁ ସୁଯୋଗ ନ ମିଳିବାର ସମ୍ଭାବନା ସୃଷ୍ଟି ହୋଇଛି। ଏଣୁ ଚଳିତ ରଣଜୀ ଟ୍ରଫିରେ ରାହାନେଙ୍କ ପାଇଁ ପ୍ରଦର୍ଶନ କରିବା ନିହାତି ଆବଶ୍ୟକ ହୋଇ ପଡ଼ିଛି।
