ନୂଆଦିଲ୍ଲୀ,୧୧।୧୧(ପି.ଟି.):ଦିଲ୍ଲୀ- ଜାତୀୟ ରାଜଧାନୀ ଅଞ୍ଚଳ(ଏନ୍ସିଆର୍)ରେ ବାୟୁ ଗୁଣବତ୍ତା ଅଧିକରୁ ଅଧିକ ଖରାପ ହେବାରେ ଲାଗିଛି। ପ୍ରଦୂଷିତ ବାୟୁ ଗର୍ଭାବସ୍ଥା ଉପରେ ନକାରାତ୍ମକ ପ୍ରଭାବ ପକାଇଥାଏ ବୋଲି ସ୍ବାସ୍ଥ୍ୟ ବିଶେଷଜ୍ଞମାନେ ମତ ଦେଇଛନ୍ତି। ଫଳରେ ସମୟ ପୂର୍ବରୁ ସନ୍ତାନ ପ୍ରସବ, କମ୍ ଓଜନର ଶିଶୁ ଜନ୍ମ, ମୃତ ସନ୍ତାନ ଜନ୍ମ କିମ୍ବା ପିଲାଙ୍କଠାରେ ଜନ୍ମରୁ ଅସ୍ବାଭାବିକ ଲକ୍ଷଣ ଆଦି ସମ୍ଭାବନା ରହିଥାଏ। ସେଥିପାଇଁ ରାଜଧାନୀ ଅଞ୍ଚଳରେ ଗର୍ଭଧାରଣ କରିଥିବା ମହିଳାମାନେ ଯଥାସମ୍ଭବ ଘରେ ରହିବା ଲାଗି ଡାକ୍ତରମାନେ ପରାମର୍ଶ ଦେଇଛନ୍ତି। ଦୂଷିତ ବାୟୁ ଗର୍ଭବତୀ ମହିଳାଙ୍କ ସମେତ ୬୦ ବର୍ଷରୁ ଊର୍ଦ୍ଧ୍ୱ ବ୍ୟକ୍ତି, ୫ ବର୍ଷରୁ କମ୍ ଶିଶୁଙ୍କ ପାଇଁ ବିପଜ୍ଜନକ ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ପକ୍ଷରୁ ସତର୍କ କରାଯାଇଛି।
ଭାରତର ବର୍ଜ୍ୟବସ୍ତୁ ପୁନଃଚକ୍ରଣ କାରଖାନା ନିକଟରେ ବ୍ୟାପକ ପରିମାଣରେ ମିଥେନ୍ ଆସ୍ତରଣ ଦେଖାଯାଉଥିବା ନିକଟରେ ଏକ ହାଇ-ରିଜୋଲ୍ୟୁଶନ ସାଟେଲାଇଟ୍ ଚିତ୍ରରୁ ଜଣାପଡ଼ିଛି। ଏହି ଗ୍ୟାସ୍ ହୃଦ୍ରୋଗ ସହ ଫୁସ୍ଫୁସ୍ ସମସ୍ୟା, ଚର୍ମରୋଗ ସୃଷ୍ଟି କରିଥାଏ। ଶ୍ୱାସକ୍ରିୟାରେ କ୍ଷତିକାରକ ସାମଗ୍ରୀ ନେବା ଦ୍ୱାରା ଦୀର୍ଘ ତଥା ବିପଜ୍ଜନକ ରୋଗ ସୃଷ୍ଟି ଲାଗି ଅନୁକୂଳ ସ୍ଥିତି ସୃଷ୍ଟି କରିଥାଏ ବୋଲି ହାଇଦ୍ରାବାଦ ୟଶୋଦା ହସ୍ପିଟାଲର ବିଶେଷଜ୍ଞ ଡାକ୍ତର ବିଶ୍ୱେଶ୍ୱରନ ବାଲ୍ସୁବ୍ରମଣ୍ୟନ୍ କହିଛନ୍ତି। ଗର୍ଭବତୀ ମହିଳା ବାହାରକୁ ଯିବାକୁ ହେଲେ ଏନ୍-୯୫ ମାସ୍କ ପିନ୍ଧିବା ଲାଗି ସେ ସୁପାରିସ କରିଛନ୍ତି।
ବାୟୁ ପ୍ରଦୂଷଣ ଏକ ନୀରବ ଘାତକ। ଦିଲ୍ଲୀ-ଏନ୍ସିଆର୍ ବାୟୁରେ ବିଷାକ୍ତ ପଦାର୍ଥ ସ୍ତର ବଢ଼ୁଥିବାରୁ ଗର୍ଭବତୀଙ୍କ ପାଇଁ ବିପଦ ବୃଦ୍ଧି ପାଇଛି। ଏହାଦ୍ୱାରା ସ୍ବଳ୍ପମିଆଦୀ ଏବଂ ଦୀର୍ଘମିଆଦୀ ରୋଗ ସୃଷ୍ଟି ହୋଇଥାଏ। ଏପରିକି ଗର୍ଭସ୍ଥ ଶିଶୁ ମଧ୍ୟ ଏଥିରୁ ମୁକ୍ତ ନୁହନ୍ତି ବୋଲି ଗବେଷଣାରୁ ସ୍ପଷ୍ଟ ହୋଇଛି। ଏହା ଗର୍ଭାଶୟକୁ ପ୍ରଭାବିତ କରିବା ସହ ଶିଶୁ ବିକାଶରେ ବାଧା ସୃଷ୍ଟି କରିଥାଏ। ବିଷାକ୍ତ ବାୟୁ ଯୋଗୁ ଗର୍ଭନଷ୍ଟ ହୋଇପାରେ ବୋଲି ଉଜାଲା ସିଗ୍ନସ୍ ଗ୍ରୁପ୍ ଅଫ୍ ହସ୍ପିଟାଲ୍ସର ଓବ୍ଷ୍ଟେଟ୍ରିକ୍ସ ଗାଇନାକୋଲୋଜି ବିଭାଗ ମୁଖ୍ୟ ଡ. ଆକ୍ତା ବଜାଜ କହିଛନ୍ତି।
