ମୋରଡ଼ା,୨୮ା୩(ସ୍ମାରକ ମାଜୀ): ରାସ୍ତା ପ୍ରଶସ୍ତିକରଣକୁ ନେଇ ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅଧୀନ ଗଡ଼ିଆ ଗ୍ରାମରେ ଉତ୍ତେଜନା ଦେଖିବାକୁ ମିଳିଛି। ଏନେଇ ଗ୍ରାମବାସୀ ନିର୍ମାଣ କାର୍ଯ୍ୟ ବନ୍ଦ କରିଛନ୍ତି।
ସୂଚନାନୁଯାୟୀ, ପୂର୍ତ୍ତବିଭାଗ ଅଧୀନରେ ହାଣ୍ଡିଭଙ୍ଗାଠାରୁ କୁଜିଡ଼ିହି ପର୍ଯ୍ୟନ୍ତ ରାସ୍ତା ନିର୍ମାଣ ସହିତ ରାସ୍ତାକଡ଼ରେ ଡ୍ରେନ୍ ନିର୍ମାଣ କାର୍ଯ୍ୟ ଚାଲୁଛି। ତେବେ ଗଡିଆ ବଜାରରେ ଥିବା ସରକାରୀ ଜାଗାକୁ ଅବରୋଧ କରାଯାଇ ଦୋକାନ ଗୃହ ନିର୍ମାଣ ହେବା ଫଳରେ ରାସ୍ତାର ପ୍ରଶସ୍ତିକରଣରେ ବାଧା ସୃଷ୍ଟି ହେଉଛି। ତେଣୁ ଗଡ଼ିଆଛକ ସ୍ଥାନ ପୂର୍ବରୁ ୭ ମିଟର ଓସାରର କ୍ୟାରେଜ ଓ୍ବେ ପରେ ମାଟି ପଡ଼ିବା ପରେ ବର୍ଷାଜଳ ନିଷ୍କାସନ ପାଇଁ ଡ୍ରେନ ନିର୍ମାଣ ହେବା ବଦଳରେ ପିଚୁ ରାସ୍ତାକୁ ଲାଗି ଡ୍ରେନ୍ ନିର୍ମାଣ ହେଉଛି। ଫଳରେ ରାସ୍ତାର ପ୍ରଶସ୍ତିକରଣ କମ୍ ହେଉଛି। ଏନେଇ ଗ୍ରାମବାସୀ ପୂର୍ବରୁ ବାରିପଦା ପୂର୍ତ୍ତବିଭାଗକୁ ଏକ ଅଭିଯୋଗ ପତ୍ର ଜଣାଇଥିଲେ। କିନ୍ତୁ କାର୍ଯ୍ୟ କରୁଥିବା ଠିକାଦାର ସଂସ୍ଥା ଆଖି ବୁଜି ଦେଇ ଅଳ୍ପ କିଛି ଦୂର ରାସ୍ତାକୁ ଓସରିଆ କରି ଡ୍ରେନ୍ ନିର୍ମାଣ କରିଥିବା ବେଳେ ଗଡ଼ିଆ ବଜାର ଦେଇ ଯାଇଥିବା ରାସ୍ତାକୁ ଲଗେଇ ଡ୍ରେନ ନିର୍ମାଣ କରିଛି। ଫଳରେ ଭବିଷ୍ୟତରେ ଦୁର୍ଘଟଣା ହେବାର ଆଶଙ୍କା ସୃଷ୍ଟି ହୋଇଛି। ଏହାକୁ ବିରୋଧ କରି ଗଡ଼ିଆ ସରପଞ୍ଚ ବାସନ୍ତୀ ଟୁଡୁ,ପୂର୍ବତନ ସରପଞ୍ଚ ଦେବେନ୍ଦ୍ର ଟୁଡୁ, ପୂର୍ବତନ ସମିତି ସଭ୍ୟ ମାତାଲ ଟୁଡୁ,ସୁବ୍ରତ ମହାକୁଡ଼,ରଜନୀ ଦିଗାର ଏବଂ ଅନ୍ୟ ଗ୍ରାମବାସୀ କାର୍ଯ୍ୟ ନିର୍ମାଣ କରୁଥିବା ଠିକାଦାର ସଂସ୍ଥାର ସାଇଟ୍ ଇଞ୍ଜିନିୟର ଅବିନାଶ ନାଏକଙ୍କୁ ଅଟକ ରଖିବା ସହିତ କାର୍ଯ୍ୟକୁ ବନ୍ଦ କରିଥିଲେ। ଏନେଇ ପୂର୍ତ୍ତବିଭାଗର ଏସ୍ଡିଓ ଗୌରୀଚରଣ ଗିରିଙ୍କୁ ପଚାରିବାରୁ ମୋରଡ଼ା ତହସିଲଦାରଙ୍କୁ ଏବାବଦରେ ଜଣାଇ ସମସ୍ତ ଦୋକାନ ଗୃହକୁ ଭଙ୍ଗା ଯାଇ ରାସ୍ତାକୁ ସଠିକ୍ ଭାବେ ଓସାରିଆ କରାଯାଇ ଡ୍ରେନ ନିର୍ମାଣ କରାଯିବ ବୋଲି କହିଛନ୍ତି।
