ପୁରୀ ଅଫିସ, ୨୮ା୧୦:ହେତୁବାଦୀମାନେ ଗତ ମଙ୍ଗଳବାର ସୂର୍ଯ୍ୟୋପରାଗ ସମୟରେ ଚିକେନ୍ ବିରିୟାନୀ ଖାଇବା ସହ ବ୍ରାହ୍ମଣ ସମାଜକୁ ଆପେକ୍ଷ କରିଥିବା ଅଭିଯୋଗରେ ଅଖିଳ ଭାରତ ହିନ୍ଦୁ ମହାସଭା ପକ୍ଷରୁ ଗୁରୁବାର ପୁରୀ ଟାଉନ ଥାନାରେ ହେତୁବାଦୀ ସଙ୍ଗଠନ ବିରୋଧରେ ଏତଲା ଦିଆଯାଇଛି। ମହାସଭାର ରାଜ୍ୟ ସଭାପତି ସୂର୍ଯ୍ୟନାରାୟଣ ରଥଙ୍କ ନେତୃତ୍ୱରେ ଏହି ଏତଲା ଦିଆଯିବା ସହ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଛି। ଏତଲାରେ ଦର୍ଶାଯାଇଛି, ନିଜକୁ ହେତୁବାଦୀ କହୁଥିବା କେତେଜଣ ବ୍ୟକ୍ତି ସୂର୍ଯ୍ୟୋପରାଗ ସମୟରେ ଚିକେନ ବିରିୟାନୀ ଖାଉଥିବା ଟିଭିରେ ଦେଖିବାକୁ ମିଳିଥିଲା। ସେମାନେ ସୂର୍ଯ୍ୟୋପରାଗ ନୀତି ନିୟମକୁ ଅନ୍ଧବିଶ୍ୱାସ ବୋଲି କହିଥିଲେ। ଏପରିକି ଜଣେ ହେତୁବାଦୀ ଟିଭିରେ ବିତର୍କରେ ଭାଗ ନେଇଥିବାବେଳେ ପ୍ରତିପକ୍ଷଙ୍କ ପ୍ରତି ଅଶାଳୀନ ବ୍ୟବହାର ସହ ବ୍ରାହ୍ମଣ ଜାତିକୁ ଆକ୍ଷେପ କରିଥିଲେ। ଏହି ମନ୍ତବ୍ୟ ଓ ଆଚରଣ ସମଗ୍ର ବ୍ରାହ୍ମଣ ଜାତିକୁ ଅପମାନିତ କରିବା ସହ ଧର୍ମ ଉପରେ ବିଶ୍ୱାସ ରଖୁଥିବା ସମଗ୍ର ହିନ୍ଦୁ ସମାଜକୁ ବ୍ୟଥିତ କରିଛି। ଏଣୁ ଘଟଣାର ତଦନ୍ତ କରି ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଅଖିଳ ଭାରତ ହିନ୍ଦୁ ମହାସଭା ପକ୍ଷରୁ ଦାବି କରାଯାଇଛି।
