ତିହିଡ଼ି,୨୨ା୧୦(ସଞ୍ଜିତ ବଳ)ଭଦ୍ରକ ଜିଲା ତିହିଡ଼ି ବ୍ଲକ ଅଧୀନ କୋହ୍ଲ ପଞ୍ଚାୟତ ଓରଡ଼ା ଗ୍ରାମର ୩ଟି ୱାର୍ଡର ହିତାଧିକାରୀମାନଙ୍କୁ ୩ ମାସର ପିଡିଏସ୍ ଚାଉଳ ମିଳିନାହିଁ। ହିତାଧିକାରୀମାନେ ଦସ୍ତଖତ ଦେବା ଓ ଆଇସ୍କାନ କରାଯିବାର ୧୫ ଦିନ ପରେ ବି ଚାଉଳ ମିଳି ନ ଥିବାରୁ ଶନିବାର ସକାଳେ ସେମାନେ ବଣ୍ଟନ କେନ୍ଦ୍ର ସାମ୍ନାରେ ହୋହଲ୍ଲା କରିଛନ୍ତି। ପ୍ରକାଶ ଯେ, ରିଟେଲର ଓରଡ଼ା ଗ୍ରାମର ୧୩ଟି ୱାର୍ଡ ମଧ୍ୟରୁ ୧୦ ୱାର୍ଡରେ ଅକ୍ଟୋବର, ନଭେମ୍ବର ଓ ଡିସେମ୍ବର ମାସର ଚାଉଳ ବଣ୍ଟନ କରିଥିବା ବେଳେ ୯, ୧୦ ଓ ୧୧ନମ୍ବର ୱାର୍ଡର ୨ଶହରୁ ଊର୍ଦ୍ଧ୍ୱ ହିତାଧିକାରୀ ଦସ୍ତଖତ ଓ ଆଇସ୍କାନ ପରେ ଚାଉଳ ପାଇବାରୁ ବଞ୍ଚତ୍ତ ହୋଇଥିଲେ। ଶନିବାର ଚାଉଳ ମିଳୁଥିବା ଖବର ପାଇବା ପରେ ଶତାଧିକ ହିତାଧିକାରୀ ବଣ୍ଟନ କେନ୍ଦ୍ର ନିକଟରେ ପହଞ୍ଚତ୍ଥିଲେ। ତେବେ ଅଳ୍ପ କେତେକ ହିତାଧିକାରୀଙ୍କୁ ବଣ୍ଟନ ପରେ ଚାଉଳ ସରିଯିବାରୁ ଏଥିରେ ଅସନ୍ତୋଷ ପ୍ରକାଶ କରି ହିତାଧିକାରୀମାନେ ହୋହଲ୍ଲା କରିଥିଲେ। ବିଡିଓ ଜ୍ୟୋତିର୍ମୟ କର ପୂଜା ଛୁଟି ପରେ ଚାଉଳ ବଣ୍ଟନ ଦିଗରେ ପଦକ୍ଷେପ ନିଆଯିବ ବୋଲି ଟେଲିଫୋନ ଯୋଗେ ହିତାଧିକାରୀଙ୍କୁ ପ୍ରତିଶ୍ରୁତି ଦେବା ପରେ ପରିସ୍ଥିତି ଶାନ୍ତ ପଡ଼ିଥିଲା। ସୂଚନାଥାଉ କି, ପ୍ରକାଶ ଚନ୍ଦ୍ର ଜେନା, ଦୁର୍ଯ୍ୟୋଧନ ବାରିକ, ରାଜେନ୍ଦ୍ର ମହାଳିକ, ଗୌତମ ମୁଦୁଲି, ନରସିଂହ ବାରିକ, ରଶ୍ମିତା ବାରିକ, କୁମୁଦ ପରିଡ଼ା, ହନୁମାନ ସାମଲ, ନିତ୍ୟାନନ୍ଦ ଦାସ ପ୍ରମୁଖ ହିତାଧିକାରୀ ଚାଉଳ ନ ପାଇବାରୁ ଗତ ୧୬ ତାରିଖରେ ବିଡିଓଙ୍କ ନିକଟରେ ଅଭିଯୋଗ କରିଥିଲେ।
