ପାରାଦୀପ,୧୦।୧୦(ସ୍ବ.ପ୍ର.): ପାରାଦୀପ ବନ୍ଦର ଅଥରିଟିର ଲେବର ଟ୍ରଷ୍ଟି (ପରିବର୍ତ୍ତିତ ନାମ ବୋର୍ଡ ସଦସ୍ୟ) ପାଇଁ ୩୧ ମାସ ପରେ ୨୮ ତାରିଖରେ ନିର୍ବାଚନ ହେବ। ଏହି ନିର୍ବାଚନ ବାଲଟ୍ ପେପର ଜରିଆରେ ହେବ। ଉକ୍ତ ଦିନ ଫଳାଫଳ ପ୍ରକାଶ ପାଇବ। ଏ ନେଇ କେନ୍ଦ୍ର ସରକାରଙ୍କ ଶ୍ରମ ଓ ରୋଜଗାର ମନ୍ତ୍ରଣାଳୟ ପକ୍ଷରୁ ଅକ୍ଟୋବର ୭ରେ ବିଜ୍ଞପ୍ତି ପ୍ରକାଶ ପାଇଥିଲା। ନିର୍ବାଚନ ସମ୍ପର୍କିତ ପ୍ରକ୍ରିୟା ସମ୍ପର୍କରେ ୧୨ ଟ୍ରେଡ୍ ୟୁନିୟନ ଓ ପୋର୍ଟ ଅଥରିଟିଙ୍କୁ ନୋଟିସ ଜାରି କରାଯାଇଛି।
ଅକ୍ଟୋବର ୧୨ରେ ଭୋଟର ଲିଷ୍ଟ ଘୋଷଣା, ୧୪ରୁ ୧୭ ତାରିଖ ମଧ୍ୟରେ ନାମାଙ୍କନ ପତ୍ର ଦାଖଲ, ୧୯ରେ ପ୍ରତ୍ୟାହାର ଓ ୨୦ରେ ଚୂଡ଼ାନ୍ତ ତାଲିକା ପ୍ରକାଶ ପାଇବ। ପରବର୍ତ୍ତୀ ୭ ଦିନ ପ୍ରଚାର ଓ ୨୮ରେ ନିର୍ବାଚନ ହେବ। ଏହି ନିର୍ବାଚନକୁ ଡେପୁଟି ଚିଫ୍ ଲେବର କମିଶନର ଭୁବନେଶ୍ୱର ପରିଚାଳନା କରିବ। ଚଳିତ ନିର୍ବାଚନରେ ବନ୍ଦରର ୩୯୩ ଜଣ ଭୋଟର ମତଦାନ କରିବେ। ୧୨ଟି ୟୁନିୟନ୍ ନିର୍ବାଚନ ଲଢ଼ିବେ। ଯେଉଁ ଦୁଇଟି ୟୁନିୟନ ସର୍ବାଧିକ ଭୋଟ ପାଇବେ ତାଙ୍କୁ ବିଜୟୀ ଘୋଷଣା କରାଯିବ। ପରେ ସେହି ୟୁନିୟନ ତା’ର ବୋର୍ଡ ସଦସ୍ୟ ବାଛି ଅଥରିଟି ବୋର୍ଡକୁ ଜଣାଇବେ। ଚଳିତଥର ଯିଏ ବି ବୋର୍ଡ ସଦସ୍ୟ ହେବ ସେ ବନ୍ଦର କର୍ମଚାରୀ ହୋଇଥିବା ବାଞ୍ଛନୀୟ ବୋଲି ନିୟମ ରହିଛି। ପୂର୍ବରୁ ଲେବର ଟ୍ରଷ୍ଟି ୨ ବର୍ଷ ଥିବାବେଳେ ଏବେ ୩ ବର୍ଷ କରାଯାଇଛି। ମେଜର ପୋର୍ଟ ଆଇନ ୧୯୬୩କୁ କେନ୍ଦ୍ର ସରକାର ୨୦୨୧ରେ ବଦଳାଇ ମେଜର ପୋର୍ଟ ଅଥରିଟି ଆଇନ କରିଛନ୍ତି। ଉକ୍ତ ଆଇନ ଦ୍ୱାରା ଅନେକ ପରିବର୍ତ୍ତନ ଚଳିତ ନିର୍ବାଚନ ପାଇଁ ହୋଇଛି। ଏଥର ଯେଉଁ ୧୨ ୟୁନିୟନ ନିର୍ବାଚନ ପାଇଁ ଯୋଗ୍ୟ ହୋଇଛନ୍ତି ସେମାନେ ହେଲେ ବନ୍ଦର ମଜଦୁର ସଂଘ, ବି.ଆର. ଆମ୍ବେଡ୍କର ୱାର୍କର୍ସ ୟୁନିୟନ, ବନ୍ଦର ଶ୍ରମିକ କର୍ମଚାରୀ ୟୁନିୟନ, ବନ୍ଦର ଶ୍ରମିକ ୟୁନିୟନ, ବନ୍ଦର ଡକ୍ ଆଣ୍ଡ ଟ୍ରାନ୍ସପୋର୍ଟ ୱାର୍କର୍ସ ୟୁନିୟନ, ପାରାଦୀପ ଏରସମା ଶିଳ୍ପାଞ୍ଚଳ ୱାର୍କର୍ସ ୟୁନିୟନ, ପୋର୍ଟ ଆଣ୍ଡ ଡକ୍ କନଷ୍ଟ୍ରକ୍ଶନ ୱାର୍କର୍ସ ୟୁନିୟନ, ପୋର୍ଟ ଡକ୍ ଲେବର ୟୁନିୟନ, ପୋର୍ଟ ମଜଦୁର ସଂଘ, ପୋର୍ଟ ଶ୍ରମିକ ସଂଘ, ପୋର୍ଟ ୱାର୍କର୍ସ ୟୁନିୟନ, ଉତ୍କଳ ପୋର୍ଟ ଆଣ୍ଡ ଡକ୍ ୱାର୍କର୍ସ ୟୁନିୟନ।
ପୂର୍ବରୁ ପୋର୍ଟ ଲେବର ଟ୍ରଷ୍ଟି ନିର୍ବାଚନ ଦୁଇବର୍ଷ ପାଇଁ ହେଉଥିଲା। ସେଥିରେ ଦୁଇଟି ୟୁନିୟନର ଯେକୌଣସି ନେତା ଟ୍ରଷ୍ଟି ହେଉଥିଲେ। ଶେଷ ଲେବର ଟ୍ରଷ୍ଟିଙ୍କ କାର୍ଯ୍ୟକାଳ ୨୦୨୦ ମାର୍ଚ୍ଚ ୩୧ରେ ଶେଷ ହୋଇଥିଲା। ସେବେଠାରୁ ଉକ୍ତ ପଦବୀ ଖାଲିଥିଲା। ସେହିପରି କେନ୍ଦ୍ର ସରକାରଙ୍କ ପକ୍ଷରୁ ୪ ଜଣ ଅଦର ଇଣ୍ଟ୍ରେଷ୍ଟ ଟ୍ରଷ୍ଟି ପଠାଯାଏ। ଭାଜପା ସରକାର ପକ୍ଷରୁ ଯେଉଁ ୪ ଜଣ ଟ୍ରଷ୍ଟି ଥିଲେ ସେମାନଙ୍କ କାର୍ଯ୍ୟକାଳ ୨୦୧୯ ମାର୍ଚ୍ଚ ୩୧ରୁ ଶେଷ ହୋଇଛି। ତାଙ୍କ ସ୍ଥାନରେ ଏପର୍ଯ୍ୟନ୍ତ କାହାରିକୁ ସରକାର ଚୟନ କରିନାହାନ୍ତି। ଦଳର ଏକାଧିକ ରାଜନେତା ଏହି ପଦବୀ ପାଇଁ ଆଶାୟୀ ଥିବାରୁ ସରକାର କାହାକୁ ଚୟନ କରିନାହାନ୍ତି ବୋଲି ଦଳୀୟ ସୂତ୍ରରୁ ଜଣାପଡ଼ିଛି। ନୂଆ ଆଇନରେ ଅଦର ଇଣ୍ଟ୍ରେଷ୍ଟ ଟ୍ରଷ୍ଟି ପଦବୀ ୪ ଜାଗାରେ ୨ କରାଯାଇଛି। ଏହାସତ୍ତ୍ୱେ ଦଳ ପକ୍ଷରୁ ଏପର୍ଯ୍ୟନ୍ତ ବୋର୍ଡ ସଦସ୍ୟ ପାଇଁ କାହା ନାମ ଘୋଷଣା କରାଯାଇନାହିଁ। ଲେବର ଟ୍ରଷ୍ଟି ନିର୍ବାଚନ ପରେ ଅଦର ଇଣ୍ଟ୍ରେଷ୍ଟ ଟ୍ରଷ୍ଟିଙ୍କ ନାମ ଘୋଷଣା ହୋଇପାରେ ବୋଲି ଭାଜପାର ଜଣେ ବରିଷ୍ଠ ନେତା ସୂଚନା ଦେଇଛନ୍ତି।
