ବାଲେଶ୍ୱର ଅଫିସ, ୧୧।୧ ବାଲେଶ୍ୱର ଓ ବାରିପଦା ବସ୍ ମାଲିକ ସଂଘ ମଧ୍ୟରେ ତିକ୍ତତା ଯୋଗୁ ଗତ ୮ତାରିଖରୁ ବସ୍ ଚଳାଚଳ ବନ୍ଦ ଥିଲା। ସୋମବାର ଉଭୟ ଆର୍ଟିଓ, ବସ୍ ମାଲିକ ସଂଘ, ପୋଲିସ ମିଳିତ ଭାବେ ଆଲୋଚନା କରି ସମସ୍ୟାର ସମାଧାନ କରିବା ପରେ ବସ୍ ଚଳାଚଳ ସ୍ବାଭାବିକ ହୋଇଛି।
ବାରିପଦାରୁ ଭାୟା ଉଦଳା ଦେଇ ବାଲେଶ୍ୱର ଆସୁଥିବା ଓମ୍ ମୋଟର୍ସକୁ ବାଲେଶ୍ୱର ବସ୍ଷ୍ଟାଣ୍ଡରୁ ଛାଡ଼ିବା ପାଇଁ ଅପରାହ୍ନ ୧ଟା ୧୬ମିନିଟ୍ ସରକାରୀ ସମୟ ଧାର୍ଯ୍ୟ ହୋଇଥିବା ବେଳେ ବାଲେଶ୍ୱର ସଂଘ ୨ଟା ୧୦ମିନିଟ୍ ସମୟ ଦେଇଥିଲା। ବେଳେ ବେଳେ ପୁଣି ତାକୁ ଆହୁରି ୨୦ମିନିଟ୍ ବିଳମ୍ବରେ ଛଡ଼ାଯାଏ। ଏ ସମ୍ପର୍କରେ ବାରିପଦା ବସ୍ ମାଲିକ ସଂଘ ପକ୍ଷରୁ ଉଭୟ ବାଲେଶ୍ୱର, ବାରିପଦା ଆର୍ଟିଓ, ବାଲେଶ୍ୱର ସଂଘକୁ ଲିଖିତ ଜଣାଇଥିଲେ। ଗତ ଡିସେମ୍ବର ୨୭ରେ ବାଲେଶ୍ୱର ବସ୍ଷ୍ଟାଣ୍ଡ ପରିସରରେ ଉଭୟ ସଂଘକୁ ନେଇ ଏକ ବୈଠକ ବସିଥିଲା। ଏହାକୁ ଠିକ୍ କାର୍ଯ୍ୟକାରୀ କରିବା ପାଇଁ ବାଲେଶ୍ୱର ସଂଘ ଜାନୁୟାରୀ ୧ ତାରିଖ ପର୍ଯ୍ୟନ୍ତ ସମୟ ନେଇଥିଲା। ମାତ୍ର ୮ତାରିଖ ସୁଦ୍ଧା ଓମ୍ ମୋଟର୍ସକୁ ସରକାରୀ ଧାର୍ଯ୍ୟ ସମୟରେ ନ ଛାଡ଼ି ୨ଟା ୪୫ମିନିଟ୍ର ସମୟ ଦେଇଥିଲା। ଏହାକୁ ନ ମାନିଲେ ବସ୍ଟିକୁ ବାଲେଶ୍ୱର ବସ୍ଷ୍ଟାଣ୍ଡରୁ ବାହାର କରିଦେବା ପାଇଁ ଏବଂ ଚଲାଇବାକୁ ନ ଦେବା ନିମନ୍ତେ ଚେତାବନୀ ଦେଇଥିଲା। ସମାନ ଭାବେ ବାରିପଦା ବସ୍ଷ୍ଟାଣ୍ଡରେ ବାଲେଶ୍ୱର ମାଲିକଙ୍କ ବସ୍ଗୁଡ଼ିକୁ ପୂରାଇ ଦିଆଯାଇ ନ ଥିଲା। ଏହାକୁ ନେଇ ବାଲେଶ୍ୱର ବସ୍ ମାଲିକ ସଂଘ ପକ୍ଷରୁ ଗତ ୮ ତାରିଖରେ ବାଲେଶ୍ୱର ବସ୍ଷ୍ଟାଣ୍ଡରେ ଟାଟାରୁ ଭୁବନେଶ୍ୱର ଯାଉଥିବା ମିନିବସ୍କୁ ଅଟକାଇ ବସ୍ କର୍ମଚାରୀଙ୍କୁ ଆକ୍ରମଣ କରିଥିଲେ। ଏନେଇ ସହଦେବଖୁଣ୍ଟା ମଡ଼େଲ ଥାନାରେ ଏକ ମାମଲା ରୁଜୁ ହୋଇଥିଲା। ସେହିପରି ବାରିପଦା ବସ୍ଷ୍ଟାଣ୍ଡର ବାଲେଶ୍ୱର ମାଲିକ ସଂଘର ଆର୍ଯ୍ୟନ୍ ବସ୍କୁ ଅଟକାଇ କର୍ମଚାରୀଙ୍କ ସହ ଗଣ୍ଡଗୋଳ କରିଥିଲେ। ଫଳରେ ୨ଦିନ ଧରି ଉଭୟ ଜିଲାରେ ବସ୍ ଚଳାଚଳ ବନ୍ଦ ରହିଥିଲା।
