ଢେଙ୍କାନାଳ ଅଫିସ, ୧୧।୧ଚାଷୀ ନିଜର ଉତ୍ପାଦିତ ସବୁଜ ପରିବା ଉଚିତ ମୂଲ୍ୟରେ ବିକିପାରିବେ। ଗୋଦାମ ଘରେ ସୁବିଧାରେ ରଖାଯାଇପାରିବ ଉତ୍ପାଦିତ ଚାଉଳ। ଏଭଳି ମହତ୍ ଉଦ୍ଦେଶ୍ୟ ନେଇ ଢେଙ୍କାନାଳ ଆଞ୍ଚଳିକ ନିୟନ୍ତ୍ରିତ ବଜାର କମିଟି ପକ୍ଷରୁ ୫୫ନଂ. ଜାତୀୟ ରାଜପଥ ପାର୍ଶ୍ୱ ମହିଷାପାଟ ନିକଟରେ ୫ବର୍ଷ ତଳେ ନିର୍ମାଣ କରାଯାଇଥିଲା ମାର୍କେଟ ୟାର୍ଡ। ୮୫ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି ବୃହତ୍ ବ୍ୟବସାୟିକ କେନ୍ଦ୍ର ଉଦ୍ଘାଟନର ପାଖାପାଖି ମାସକ ଭିତରେ ଲକ୍ଷ୍ୟଭ୍ରଷ୍ଟ ହୋଇଯାଇଛି। ପରିଚାଳନା ଅଭାବରୁ ଏଠାରେ ବ୍ୟବସାୟ ବନ୍ଦ ହୋଇଯାଇଥିବାବେଳେ ୫୦୦ ମେଟ୍ରିକ ଟନ୍ କ୍ଷମତା ବିଶିଷ୍ଟ ଗୋଦାମ ଗୃହ ମାସିକ ୧୯, ୬୦୦ ଟଙ୍କା ଭଡ଼ାରେ ଲାଗିଛି।
ଆଞ୍ଚଳିକ ବଜାରର ପରିବା ଚାଷୀ, ବ୍ୟବସାୟୀଙ୍କ ସୁବିଧା ଦୃଷ୍ଟିରୁ ମହିଷାପାଟରେ ୨୦୧୭ ଜୁଲାଇ ୧୨ରେ ଉଦ୍ଘାଟିତ ହୋଇଥିଲା ମାର୍କେଟ ୟାର୍ଡ। ୧ ଏକର ୪ ଡେସିମିଲ ଅଞ୍ଚଳରେ ପରିବ୍ୟାପ୍ତ ଏହି ବ୍ୟବସାୟିକ ପ୍ରତିଷ୍ଠାନ ନିର୍ମାଣରେ ଆଞ୍ଚଳିକ ବଜାର ନିୟନ୍ତ୍ରିତ କମିଟିର ୪୦ ଲକ୍ଷ ଏବଂ ତ୍ରୟୋଦଶ ଅର୍ଥ କମିଶନର ୪୫ ଲକ୍ଷ ଟଙ୍କା ବିନିଯୋଗ ହୋଇଥିଲା। ଅନୁଦାନ ଅର୍ଥରେ ମାର୍କେଟ୍ ୟାର୍ଡକୁ ବାଦ୍ଦେଲେ ୫୦୦ ମେଟ୍ରିକ ଟନ୍ କ୍ଷମତା ବିଶିଷ୍ଟ ଗୋଦାମ ଗୃହ, କାର୍ଯ୍ୟାଳୟ ଏବଂ ବିଶ୍ରାମ ଗୃହ ନିର୍ମାଣ ହୋଇଥିଲା। ଉଦ୍ଘାଟନର ମାସେ ଦୁଇମାସ ଯାଏ ଏଠାକୁ ଉଭୟ ଚାଷୀ ଓ ବେପାରୀ ଆସୁଥିଲେ। ସହରବାସୀ ମଧ୍ୟ ମାର୍କେଟ୍ ୟାର୍ଡ ମୁହଁା ହୋଇ ସତେଜ ପନିପରିବା କିଣି ନେଉଥିଲେ। ହେଲେ ଏହି ବୃହତ୍ ଅନୁଷ୍ଠାନରେ ପାନୀୟ ଜଳ, କ୍ୟାଣ୍ଟିନ ଏବଂ ଶୌଚାଳୟ ଭଳି ଆନୁଷଙ୍ଗିକ ବ୍ୟବସ୍ଥା କରାଯାଇ ନ ଥିଲା। ସମସ୍ୟା ବିଷୟରେ ଜାଣି ସୁଦ୍ଧା ଏହାର ସମାଧାନ ଦିଗରେ ତତ୍କାଳ କୌଣସି ପଦକ୍ଷେପ ନିଆଗଲାନାହିଁ। ଫଳରେ ଧୀରେ ଧୀରେ ଚାଷୀ, ଗ୍ରାହକ ଏଠାରୁ ମୁହଁ ଫେରାଇବା ଆରମ୍ଭ କଲେ ଏବଂ ଉଦ୍ଘାଟନ ମାତ୍ର କିଛି ଦିନ ମଧ୍ୟରେ ଏହା ସମ୍ପୂର୍ଣ୍ଣ ବନ୍ଦ ହୋଇଯାଇ ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଗଲା। ଏହାପରେ ଏକ ଠିକା ବ୍ୟବସାୟ ପ୍ରତିଷ୍ଠାନକୁ ମାସିକ ୧୯,୬୦୦ ଟଙ୍କାରେ ଗୋଦାମ ଘର ଭଡ଼ାରେ ଦିଆଯାଇଥିବାବେଳେ ମାର୍କେଟ ୟାର୍ଡ ପରିତ୍ୟକ୍ତ ଅବସ୍ଥାରେ ପଡ଼ିଛି।
ଏ ସଂକ୍ରାନ୍ତରେ ଢେଙ୍କାନାଳ ଆଞ୍ଚଳିକ ନିୟନ୍ତ୍ରିତ ବଜାର କମିଟି ସମ୍ପାଦକ ସୁବ୍ରତ କୁମାର ଦଳେଇ କୁହନ୍ତି, ପରିବା ବ୍ୟବସାୟୀ ଓ ଚାଷୀ ନ ଆସିବାରୁ ମାର୍କେଟ ୟାର୍ଡ ଏବଂ ଗୋଦାମ ବନ୍ଦ ହୋଇଯାଇଥିଲା। ଏହାକୁ ଏକ ଠିକା ବ୍ୟବସାୟୀ ସଂସ୍ଥାକୁ ଭଡ଼ାରେ ଦିଆଯାଇଛି। ଖୁବ୍ଶୀଘ୍ର ଏଠାରେ ଇ-ନ୍ୟାଶନାଲ ଏଗ୍ରିକଲଚର ମାର୍କେଟିଂ (ଇ-ନାମ) ପ୍ରକଳ୍ପ କରାଯିବ। ଏହା ପରିସରରେ ଏକ ୱେବ୍ରିଜ୍ କରାଯିବାକୁ ଯୋଜନା ରହିଥିବା ଆର୍ଏମ୍ସି ସମ୍ପାଦକ ସୂଚନା ଦେଇଛନ୍ତି।
