ଆଦିସ ଆବା,୨୦।୨ : ଆଫ୍ରିକୀୟ ୟୁନିଅନ ଇସ୍ରାଏଲର ପର୍ଯ୍ୟବେକ୍ଷକ ମାନ୍ୟତା ରଦ୍ଦ କରିଛି। ଯାହା ପରେ ଇସ୍ରାଏଲକୁ ଆଫ୍ରିକୀୟ ୟୁନିଅନ ବୈଠକକୁ ନିମନ୍ତ୍ରଣ କରାଯାଇ ନାହିଁ। ଏଥି ସହିତ ଆଫ୍ରିକୀୟ ୟୁନିଅନର ଏହି ନିଷ୍ପତ୍ତିରେ କ୍ରୋଧିତ ହୋଇ ଇସ୍ରାଏଲ ଇରାନ ବିରୁଦ୍ଧରେ ଷଡଯନ୍ତ୍ର କରିଥିବା ଅଭିଯୋଗ ଆଣିଛି। ଇସ୍ରାଏଲ କହିଛି ଯେ ଆଲଜେରିଆ ଏବଂ ଦକ୍ଷିଣ ଆଫ୍ରିକା ସହାୟତାରେ ଇରାନ ଏହାର ପର୍ଯ୍ୟବେକ୍ଷକ ମାନ୍ୟତା ରଦ୍ଦ କରିଛି।
୨୦୨୧ ମସିହାରେ ଆଫ୍ରିକୀୟ ୟୁନିଅନ କମିଶନର ମୁଖ୍ୟ ମୋସା ଫାକି ମହାମତ ଇସ୍ରାଏଲକୁ ଆଫ୍ରିକୀୟ ୟୁନିଅନରେ ପର୍ଯ୍ୟବେକ୍ଷକ ମାନ୍ୟତା ଦେଇଥିଲେ। ତେବେ ଆଫ୍ରିକୀୟ ୟୁନିଅନର ଅନେକ ସଦସ୍ୟ ଦେଶ ଯେପରିକି ପ୍ରିଟୋରିଆ ଏହି ନିଷ୍ପତ୍ତିକୁ ବିରୋଧ କରିଥିଲେ। ଏହା ଇସ୍ରାଏଲ ପାଇଁ ଏକ ପ୍ରମୁଖ କୂଟନୈତିକ ସଫଳତା ଭାବରେ ବିବେଚନା କରାଯାଉଥିଲା। ଆଫ୍ରିକୀୟ ୟୁନିଅନ ହେଉଛି ୫୫ଟି ଦେଶର ଏକ ସଂଗଠନ। ଏଥିମଧ୍ୟରେ ଅନେକ ମୁସଲମାନ ଦେଶ ରହିଛନ୍ତି। ଏହାର ୪୬ ସଦସ୍ୟ ରାଷ୍ଟ୍ର ସହିତ ଇସ୍ରାଏଲର କୂଟନୈତିକ ସମ୍ପର୍କ ରହିଛି।
ଗତ ବର୍ଷ ଆଫ୍ରିକୀୟ ୟୁନିଅନର ବୈଠକରେ ପର୍ଯ୍ୟବେକ୍ଷକ ମାନ୍ୟତାରୁ ଇସ୍ରାଏଲକୁ ହଟାଇବାକୁ ଦାବି କରାଯାଇଥିଲା। ଏହା ସହିତ ସଦସ୍ୟ ଦେଶର ମୁଖ୍ୟମାନଙ୍କର ଏକ କମିଟି ଗଠନ କରି ଏହି ପ୍ରସଙ୍ଗରେ ଆଲୋଚନା କରିବାକୁ ଦାବି ହୋଇଥିଲା। ତେବେ ଏହାକୁ ଆଫ୍ରିକୀୟ ୟୁନିଅନ ପ୍ରତ୍ୟାଖ୍ୟାନ କରିଥିଲା। ବର୍ତ୍ତମାନ ଆଫ୍ରିକୀୟ ୟୁନିୟନ କମିଶନର ମୁଖ୍ୟ ଇସ୍ରାଏଲର ମାନ୍ୟତାକୁ ଶେଷ କରି ଫାକି କହିଛନ୍ତି ଯେ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଇସ୍ରାଏଲର ପର୍ଯ୍ୟବେକ୍ଷକ ମାନ୍ୟତାକୁ ସ୍ଥଗିତ ରଖାଯାଇଛି। କମିଟି ଏହା ଉପରେ ଆଲୋଚନା କରିବ ଓ ନିଷ୍ପତ୍ତି ନେବ। ଏହି କାରଣରୁ ଇସ୍ରାଏଲକୁ ସଂଘର ବୈଠକକୁ ନିମନ୍ତ୍ରଣ କରାଯାଇ ନାହିଁ।
