ନୂଆଦିଲ୍ଲୀ,୧।୧୦ : ଆଫଗାନିସ୍ତାନ ଦୂତାବାସ ଅକ୍ଟୋବର ୧ ଠାରୁ ଭାରତରେ ଏହାର କାର୍ଯ୍ୟ ସମ୍ପୂର୍ଣ୍ଣ ବନ୍ଦ କରିବାକୁ ଘୋଷଣା କରିଛି। ରବିବାର ଦିନ ଦୂତାବାସ ଦ୍ୱାରା ଜାରି ଏକ ସରକାରୀ ବିବୃତ୍ତିରେ କୁହାଯାଇଛି ସରକାରଙ୍କ ସମର୍ଥନ ଅଭାବରୁ ଏବଂ ଆଫଗାନିସ୍ତାନର ସ୍ବାର୍ଥ ପାଇଁ ତାଲିବାନ ସରକାର ଆଶା ପୂରଣ କରିବାରେ ବିଫଳ ହୋଇଛନ୍ତି। ଏହି କାରଣରୁ ଭାରତରେ ଆଫଗାନିସ୍ତାନ ଦୂତାବାସ ଏହାର କାର୍ଯ୍ୟକୁ ସମ୍ପୂର୍ଣ୍ଣ ବନ୍ଦ କରି ଦେଉଛି। ଆଫଗାନିସ୍ତାନର ଅଧିକାରୀମାନେ କହିଛନ୍ତି ଦୂତାବାସ ଆୟୋଜକ ସରକାରଙ୍କ ସମର୍ଥନ ଗ୍ରହଣ କରୁନାହିଁ, ଯାହା ଆମ କାର୍ଯ୍ୟରେ ବାଧା ସୃଷ୍ଟି କରୁଛି।
ସରକାରୀ ବିବୃତ୍ତିରେ କୁହାଯାଇଛି, ନୂଆଦିଲ୍ଲୀରେ ଆଫଗାନିସ୍ତାନର ଦୂତାବାସ ଏହାର କାର୍ଯ୍ୟ ବନ୍ଦ କରିବାକୁ ଏହି ନିଷ୍ପତ୍ତି ନେଇଛି। ଏହା ଅତ୍ୟନ୍ତ ଦୁଃଖଦାୟକ। ଆଫଗାନିସ୍ତାନ ଏବଂ ଭାରତ ସମ୍ପର୍କ ନିଷ୍ପତ୍ତି ବହୁ ସତର୍କତା ସହିତ ନିଆଯାଇଛି। ଉଭୟଙ୍କ ମଧ୍ୟରେ ଥିବା ଐତିହାସିକ ସମ୍ପର୍କ ଏବଂ ଦୀର୍ଘମିଆଦୀ ସହଭାଗିତାକୁ ଧ୍ୟାନରେ ରଖି ବିଚାର ବିମର୍ଷ ପରେ ଏଭଳି କରାଯାଇଛି।
ଏହା ସହିତ ଆଫଗାନିସ୍ତାନ ଦୂତାବାସ ମଧ୍ୟ ନିଜ ବିବୃତ୍ତିରେ ଏହି କାର୍ଯ୍ୟକୁ ସଠିକ ଭାବରେ ପରିଚାଳନା ନ କରିବାର କାରଣ ଦର୍ଶାଇଛି। ଏହି ଦୁର୍ଭାଗ୍ୟଜନକ ନିଷ୍ପତ୍ତି ପାଇଁ ଏହା ହେଉଛି ମୁଖ୍ୟ କାରଣ ବୋଲି ବିବୃତ୍ତିରେ କୁହାଯାଇଛି। ଏହା ସହିତ ଦୂତାବାସ ଅଭିଯୋଗ କରିଛି ଏହାର ଆୟୋଜକ ଦେଶରୁ ଗୁରୁତ୍ୱପୂର୍ଣ୍ଣ ସହଯୋଗର ଅଭାବ ରହିଛି, ଯେଉଁଥିପାଇଁ ଏହା ଏହାର କାର୍ଯ୍ୟକୁ ପ୍ରଭାବଶାଳୀ ଭାବେ କାର୍ଯ୍ୟକାରୀ କରିବାକୁ ସକ୍ଷମ ନୁହେଁ।
ନ୍ୟୁଜ ଏଜେନ୍ସି ରଏଟର୍ସ ଆଫଗାନିସ୍ତାନ ଦୂତାବାସର ତିନିଜଣ ଅଧିକାରୀଙ୍କ ଉଦ୍ଦେଶ୍ୟରେ କହିଛି ଆଫଗାନିସ୍ତାନ ଦୂତାବାସର ରାଷ୍ଟ୍ରଦୂତ ତଥା ଅନ୍ୟ ବରିଷ୍ଠ କୂଟନୀତିଜ୍ଞମାନେ ଭାରତ ଛାଡି ଆମେରିକାରେ ଆଶ୍ରୟ ନେବା ପରେ ଏହି ପଦକ୍ଷେପ ଗ୍ରହଣ କରାଯାଇଛି। ଏଠାରେ କର୍ମଚାରୀଙ୍କ ଅଭାବ ଦେଖାଦେଇଥିଲା। ଦୂତାବାସର ଅଧିକାରୀ କହିଛନ୍ତି ଅତି କମରେ ପାଞ୍ଚ ଜଣ ଆଫଗାନିସ୍ତାନ କୂଟନୀତିଜ୍ଞ ଭାରତ ଛାଡିଛନ୍ତି। ତେବେ ଆଫଗାନିସ୍ତାନ ଦୂତାବାସ ପରିସରରେ ଆଫଗାନିସ୍ତାନ ପତାକା ରଖିବାକୁ ଦାବି କରିଛି।
ନୂଆଦିଲ୍ଲୀରେ ଆଫଗାନିସ୍ତାନ ଦୂତାବାସ କାର୍ଯ୍ୟ ବନ୍ଦ କରିବା ଏହା ପ୍ରଥମ ଘଟଣା ନୁହେଁ। ଏହାପୂର୍ବରୁ ୨୦୨୧ ମସିହାରେ ଆଫଗାନିସ୍ତାନ ଦୂତାବାସ ମଧ୍ୟ ବନ୍ଦ ରହିଥିଲା। ତା’ପରେ ତାଲିବାନ ସରକାର ଆଫଗାନିସ୍ତାନରେ କ୍ଷମତାକୁ ଆସିବା ପରେ ଦୂତାବାସକୁ ବନ୍ଦ କରିବାକୁ ପଡିଥିଲା। ଭାରତରେ ଆଫଗାନିସ୍ତାନର ଦୂତାବାସ ବର୍ତ୍ତମାନ ରାଷ୍ଟ୍ରଦୂତ ଫରିଦ ମାମୁଣ୍ଡଜେଙ୍କ ନେତୃତ୍ୱରେ ଥିଲା। ୨୦୨୧ ମସିହାରେ ଆଫଗାନିସ୍ତାନ ଦୂତାବାସ ବନ୍ଦ ହେବା ସତ୍ତ୍ୱେ ଭାରତ ସରକାର ଭିସା ଜାରି କରିବା ଏବଂ ବାଣିଜ୍ୟ ମାମଲା ପରିଚାଳନା କରିବା ପାଇଁ ବହିଷ୍କୃତ ଆଫଗାନିସ୍ତାନ ରାଷ୍ଟ୍ରପତି ଆଶ୍ରାଫ ଘାନିଙ୍କ ଦ୍ୱାରା ନିଯୁକ୍ତ ରାଷ୍ଟ୍ରଦୂତ ତଥା ମିଶନ କର୍ମଚାରୀଙ୍କୁ ନିଯୁକ୍ତ କରିଥିଲେ।
