ଡୁଙ୍ଗୁରିପାଲି, ୪।୮(ଦୀନବନ୍ଧୁ ସୁନା): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ଆଞ୍ଚଳିକ ସମବାୟ ବାଣିଜ୍ୟ ସମିତି ଲିଃ ର ଏକ ପୁରାତନ ଗୋଦାମ ଗୃହକୁ ଦୀର୍ଘ ବର୍ଷ ଧରି ଜବରଦଖଲ କରି ରଖିଥିବା ବ୍ୟକ୍ତିଙ୍କୁ ମଙ୍ଗଳବାର ଜିଲା ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି। ମାନ୍ୟବର ହାଇକୋର୍ଟଙ୍କ ଆଦେଶ ଏବଂ ଜିଲା ପ୍ରଶାସନର ନିର୍ଦ୍ଦେଶକ୍ରମେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ପ୍ରାପ୍ତ ସୂଚନା ଅନୁଯାୟୀ, ଡୁଙ୍ଗୁରିପାଲି ଆଞ୍ଚଳିକ ସମବାୟ ବାଣିଜ୍ୟ ସମିତି ୧୯୬୨ ମସିହାରୁ ନିଜର ମାଲିକାନା ଜମିରେ କାର୍ଯ୍ୟ କରିଆସୁଛି ଏବଂ ଚାଷୀମାନଙ୍କୁ ବିଭିନ୍ନ ସେବା ଯୋଗାଇ ଦେଉଛି। ତେବେ ଡୁଙ୍ଗୁରିପାଲିର କିଶୋର କୁମାର ମେହେର ନାମକ ଜଣେ ବ୍ୟକ୍ତି ୨୦୦୮ ରୁ ୨୦୧୦ ପର୍ଯ୍ୟନ୍ତ ଦୁଇ ବର୍ଷ ପାଇଁ ମାସିକ ୧୮୦୦ ଟଙ୍କା ଭଡ଼ା ଚୁକ୍ତିରେ ସମିତିର ଗୋଦାମ ଗୃହ ନେଇଥିଲେ। ସେ ୨୦୧୧ ନଭେମ୍ବର ପର୍ଯ୍ୟନ୍ତ ଭଡ଼ା ଦେବା ପରେ ଆଜକୁ ପ୍ରାୟ ୧୬ ବର୍ଷ ହେବ ଚୁକ୍ତି ଖିଲାପ କରି ଗୋଦାମ ଗୃହରେ ବେଆଇନ ଭାବେ ତାଲା ପକାଇ ନିଜ ଅଧୀନରେ ରଖିଥିଲେ ଏବଂ ଲକ୍ଷ ଲକ୍ଷ ଟଙ୍କା ଭଡ଼ା ମଧ୍ୟ ବାକି ରଖିଥିଲେ ବୋଲି ସମିତିର ସମ୍ପାଦକ ସୁରେଶ ଚନ୍ଦ୍ର ପୁରୋହିତ ପ୍ରକାଶ କରିଛନ୍ତି।
ଏହି ଜବରଦଖଲ ହଟାଇବା ପାଇଁ ସମବାୟ ସମିତିର ବୋର୍ଡ ଅଫ୍ ଡାଇରେକ୍ଟର୍ସମାନେ ହାଇକୋର୍ଟଙ୍କ ଆଶ୍ରୟ ନେଇଥିଲେ। କୋର୍ଟଙ୍କ ନିର୍ଦ୍ଦେଶ ଅନୁଯାୟୀ ମଙ୍ଗଳବାର ରାମପୁର ଅତିରିକ୍ତ ତହସିଲଦାର ତଥା ମାଜିଷ୍ଟ୍ରେଟ୍ ଦାୟିତ୍ୱରେ ଥିବା ରୋହିତ ବାଗ, ସୋନପୁର ଡି.ଆର୍.ସି.ଏସ୍. (DRCS) ଭବାନୀ ଶଙ୍କର ଦାସ ଏବଂ ଡୁଙ୍ଗୁରିପାଲି ଥାନା ଅଧିକାରୀ ରୋଜାଲିନ ପଟେଲ ପ୍ରମୁଖଙ୍କ ଉପସ୍ଥିତିରେ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ଗୋଦାମ ଗୃହର ସଟରରେ ଲାଗିଥିବା ତାଲା କାଟି ଜେସିବି (JCB) ମେସିନ ସହାୟତାରେ ଏହି ଜବରଦଖଲକୁ ଉଚ୍ଛେଦ କରାଯାଇଛି। ଏହି ସମୟରେ ବ୍ଯାପକ ପୋଲିସ ଫୋର୍ସ ଏବଂ ସମିତିର ବୋର୍ଡ ଡାଇରେକ୍ଟର୍ସମାନେ ଉପସ୍ଥିତ ଥିଲେ।
