ନୂଆଦିଲ୍ଲୀ, ୧୩ା୫ (ପି.ଟି.): ଆଦାନୀ ଗ୍ରୁପ୍ ଷ୍ଟକ୍ ମୂଲ୍ୟରେ ଜାଲିଆତି କରିବା ସହ ନିୟାମକକୁ ତଥ୍ୟ ପ୍ରଦାନ କରି ନ ଥିବା ଅଭିଯୋଗ ଉପରେ ତଦନ୍ତ ଶେଷ କରିବା ଲାଗି ସେବିକୁ ଅଧିକ ୩ ମାସ ସମୟ ମିଳିପାରେ। ସୁପ୍ରିମକୋର୍ଟ ଏହା ଉପରେ ବିଚାର କରୁଥିବା ଶୁକ୍ରବାର କହିଛନ୍ତି। ଆଦାନୀ-ହିଣ୍ଡେନ୍ବର୍ଗ ବିବାଦକୁ ନେଇ ଦାଏର ଏକାଧିକ ପିଆଇଏଲ୍ ଏବଂ ବଜାର ନିୟନ୍ତ୍ରକ ସେବିର ଆବେଦନ ଉପରେ ସୋମବାର ସୁପ୍ରିମକୋର୍ଟ ନିଷ୍ପତ୍ତି ନେବେ ବୋଲି କହିଛନ୍ତି। ଅଦାଲତଙ୍କ ଦ୍ୱାରା ନିଯୁକ୍ତ ଜଷ୍ଟିସ୍(ଅବସରପ୍ରାପ୍ତ) ଏ.ଏମ୍. ସାପ୍ରେ କମିଟି ରିପୋର୍ଟ ମିଳିଥିବା ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଖଣ୍ଡପୀଠ କହିଛନ୍ତି। ଷ୍ଟକ୍ ଜାଲିଆତି ଅଭିଯୋଗର ତଦନ୍ତ ଶେଷ କରିବା ଲାଗି ସେବି ୬ ମାସ ସମୟ ମାଗିଥିଲା। ତେବେ ଏହାକୁ ଆଉ ୩ ମାସ ସମୟ ଦିଆଯାଇପାରେ ବୋଲି ଖଣ୍ଡପୀଠ ସଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ କହିଛନ୍ତି। ସେବି ତରଫରୁ କୌଣସି ନିୟାମକଗତ ବିଫଳତା ସମ୍ପର୍କରେ କୋର୍ଟ କିଛି କହିନାହାନ୍ତି। ଅଭିଯୋଗ କଲାବେଳେ ଏହା ଷ୍ଟକ୍ ବଜାର ଭାବାବେଗକୁ ପ୍ରଭାବିତ କରିବା ଆଶଙ୍କା ଥିବାରୁ ସତର୍କ ରହିବାକୁ ଖଣ୍ଡପୀଠ ଅଭିଯୋଗକାରୀ ଜୟା ଠାକୁରଙ୍କ ଓକିଲଙ୍କୁ କହିଥିଲେ।
