ନୂଆଦିଲ୍ଲୀ,୧୬।୮: ଟିଭି, ଫିଲ୍ମ ଏବଂ OTTରେ କାମ କରୁଥିବା ଅଭିନେତ୍ରୀ ଅନ୍ତରା ବାନାର୍ଜୀଙ୍କୁ ଗିରଫ କରିଛି ପୋଲିସ । ୩୧ ବର୍ଷୀୟ ଅଭିନେତ୍ରୀଙ୍କ ବିରୋଧରେ ଅରାବଳୀ ଏକ୍ସପ୍ରେସ୍ରେ RPF ଯବାନଙ୍କ ସହ ଝଗଡ଼ା ଓ ହଙ୍ଗାମା କରିଥିବା ଅଭିଯୋଗ ରହିଛି । ଘଟଣାଟି ଅଗଷ୍ଟ ୧୨ ତାରିଖର ବୋଲି ରିପୋର୍ଟରେ କୁହାଯାଇଛି ।
ମିଡିଆ ରିପୋର୍ଟ ଅନୁସାରେ, ଅନ୍ତରା ଶୁଟିଂ କାମରେ ସୁରତ ଯାଉଥିଲେ । ତାଙ୍କ ପାଖରେ ସ୍ଲିପର୍ କ୍ଲାସ୍ର ଟିକେଟ୍ ଥିବା ସତ୍ତ୍ୱେ ସେ ଏକ ସଂରକ୍ଷିତ AC କୋଚ୍ରେ ଚଢ଼ିଥିବା ଅଭିଯୋଗ ହୋଇଛି। ନିଜ ସିଟ୍ ଖାଲି କରିବାକୁ ଅନ୍ୟ ଜଣେ ଯାତ୍ରୀ କହିବା ପରେ ବିବାଦ ଆରମ୍ଭ ହୋଇଥିଲା। ବୋରିଭଲି ଓ ଦହାଣୁ ମଧ୍ୟରେ ରାତି ପ୍ରାୟ ୯ଟା ୩୦ରୁ ୧୦ଟା ୫୦ ମଧ୍ୟରେ ଟ୍ରେନ୍ରେ ହଙ୍ଗାମା ହୋଇଥିବା କୁହାଯାଉଛି । ଯାତ୍ରୀ ଟିଟିଙ୍କୁ ଡାକି ଅଭିନେତ୍ରୀଙ୍କୁ ସିଟ୍ ଖାଲି କରିବାକୁ କହିଥିଲେ । ଏହାପରେ ଟିକେଟ୍ କଲେକ୍ଟର ହରିକେଶ ତ୍ରିପାଠୀ RPFକୁ ସୂଚନା ଦେଇଥିଲେ। ଘଟଣାସ୍ଥଳରେ RPFର ଆସିଷ୍ଟାଣ୍ଟ ସବ୍-ଇନ୍ସପେକ୍ଟର ୟାମିନୀକାନ୍ତ ମିଶ୍ର ଓ କନଷ୍ଟେବଲ୍ ରାଜେଶ କୁମାର ପହଞ୍ଚିଥିଲେ । ଅଭିଯୋଗ ଅନୁସାରେ, ଏହି ସମୟରେ ଅନ୍ତରା ଯବାନଙ୍କୁ ଗାଳିଗୁଲଜ କରିବା ସହ ହିଂସାତ୍ମକ ହୋଇଥିଲେ।
ଝଗଡ଼ା ସମୟରେ ଅଭିନେତ୍ରୀ ନିଜ ପୋଷାକ ଖୋଲିଦେଇଥିବା ଏବଂ ରେଜର୍ ବ୍ଲେଡ୍ ଦେଖାଇ ଅଧିକାରୀଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ଏହି ଘଟଣାରେ ଅନ୍ତରା ମଧ୍ୟ ଆହତ ହୋଇଥିବା କୁହାଯାଇଛି। ରିପୋର୍ଟ ଅନୁସାରେ, ସେ ଟ୍ରେନ୍ର AC କୋଚ୍ର କାଚ ଭାଙ୍ଗି ସେଠାରୁ ଖସିଯିବାକୁ ମଧ୍ୟ ଚେଷ୍ଟା କରିଥିଲେ। ପରେ RPF ତାଙ୍କୁ ଦହାଣୁ ରେଳ ଷ୍ଟେସନ୍ରେ ଓହ୍ଲାଇ ସରକାରୀ ରେଳ ପୋଲିସକୁ ହସ୍ତାନ୍ତର କରିଥିଲା।
ଅଭିଯୋଗ ଅନୁସାରେ, ଏହି ହଙ୍ଗାମାରେ ପୋଲିସର ୟୁନିଫର୍ମ ଓ ମୋବାଇଲ୍ ଫୋନ୍ ମଧ୍ୟ କ୍ଷତିଗ୍ରସ୍ତ ହୋଇଥିଲା। ପରବର୍ତ୍ତୀ ଦିନ ସକାଳେ ବୋରିଭଲି ରେଳ ପୋଲିସ ଅନ୍ତରା ବାନାର୍ଜୀଙ୍କୁ ହେପାଜତକୁ ନେଇଥିବା ରିପୋର୍ଟରେ କୁହାଯାଇଛି।
