ଭୁବନେଶ୍ୱର,୨୪।୪ (ବ୍ୟୁରୋ): ଗାଡ଼ି ପାର୍କିଂକୁ ନେଇ ଯୁବକଙ୍କୁ ରାସ୍ତାରୁ ଉଠାଇ ମରଣାନ୍ତକ ଆକ୍ରମଣ ଘଟଣାରେ ଫେରାର ଥିବା ମୁଖ୍ୟ ଅଭିଯୁକ୍ତଙ୍କୁ ୮ ବର୍ଷ ପରେ ରବିବାର ଶହୀଦନଗର ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତ ଜଣଙ୍କ ହେଲେ ଗଣେଶ ରାଓ। ଜାମିନ ନ ମିଳିବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ଏହି ଘଟଣାରେ ପୂର୍ବରୁ ଜଣେ ଅଭିଯୁକ୍ତ ଗିରଫ ହୋଇଥିବା ବେଳେ ଅନ୍ୟ ଜଣଙ୍କର ୨୦୧୬ରେ କୌଣସି କାରଣରୁ ମୃତ୍ୟୁ ଘଟିଥିଲା ।
ସୂଚନାଯୋଗ୍ୟ, ୨୦୧୪ ଅଗଷ୍ଟ ୩୧ରେ ଅଭିଯୋଗକାରୀ ସୁଧାଂଶୁ ଭୂଷଣ ବନ୍ଧୁମାନଙ୍କ ସହିତ ଶହୀଦନଗର ଯାତ୍ରା ଦେଖିବା ନିମନ୍ତେ ଯାଇଥିବା ବେଳେ ସେଠାରେ ନିଜ ଗାଡ଼ିକୁ ରାସ୍ତା ଉପରେ ଛିଡ଼ା କରି ତା’ ଉପରେ ବସିଥିଲେ। ଏହି ସମୟରେ ଅଭିଯୁକ୍ତ ଏବଂ ତାଙ୍କ ସହଯୋଗୀମାନେ ସେଠାରେ ପହଞ୍ଚି ସୁଧାଂଶୁଙ୍କୁ ଖରାପ ଭାଷାରେ ଗାଳି କରିଥିଲେ। ସେ ଏହାକୁ ବିରୋଧ କରିବାରୁ ଅଭିଯୁକ୍ତମାନେ ତାଙ୍କୁ ପେଲାଠେଲା କରି ସେଠାରୁ ପଳାଇ ଯାଇଥିଲେ। ପରେ ଘରକୁ ଫେରିବା ସମୟରେ ଅଭିଯୁକ୍ତ ଓ ତାଙ୍କ ସହଯୋଗୀମାନେ ତାଙ୍କୁ ପଣ୍ଡା ଶୋ’ରୁମ ନିକଟରେ ଅଟକାଇବା ସହିତ ମରଣାନ୍ତକ ଆକ୍ରମଣ କରିଥିଲେ। ଏପରିକି ରାଗ ଶାନ୍ତ ନହେବାରୁ ସେଠାରୁ ଜୋରଜବରଦସ୍ତ ଉଠାଇ ନେଇ ଇମ୍ଫା ପାର୍କ ଓ ଆଇଡିବିଆଇ ପେଟ୍ରୋଲ ପମ୍ପ ନିକଟରେ ପୁନର୍ବାର ମରଣାନ୍ତକ ଆକ୍ରମଣ କରିଥିଲେ। ଏହି ଆକ୍ରମଣରେ ସୁଧାଂଶୁ ଅଚେତ ହୋଇଯିବା ଦେଖି ଅଭିଯୁକ୍ତମାନେ ତାଙ୍କୁ ସେଠାରେ ଫୋପାଡି ଦେଇ ଫେରାର ହୋଇଯାଇଥିଲେ।
