କଳିଙ୍ଗନଗର,୧୮ା୨(ଡି.ଏନ୍.ଏ.): କଳିଙ୍ଗନଗର ଶିଳ୍ପାଞ୍ଚଳର ଖୁରୁଣ୍ଟି ଛକ ଗୋଲେଇ ନିର୍ମାଣରେ ଆହେତୁକ ବିଳମ୍ବ ହେଉଛି l ଠିକା ସଂସ୍ଥାର ମନମୁଖୀ କାର୍ଯ୍ୟ ପାଇଁ ବର୍ଷାଧିକ କାଳ ଯାତ୍ରୀ ବହୁ ହିନସ୍ତା ଭୋଗୁଛନ୍ତି l ଏପରିକି ଠିକା ସଂସ୍ଥା ମୂଖ୍ୟ ରାସ୍ତାରେ ଅଧାପନ୍ତରିଆ କାମ କରି ଅନେକ ଦିନ ହେବ କାମ ବନ୍ଦ ରଖୁଥିବାରୁ ମୁଖ୍ୟ ରାସ୍ତାରେ ଯେ କୌଣସି ଗାଡି ଯାତାୟତ କରିବା ମାତ୍ରେ ଧୂଳିଝଡ଼ ସୃଷ୍ଟି ହେଉଛି l ବାଇକ୍ ଓ ସାଇକଲରେ ଯାତାୟତ କରୁଥିବା ଲୋକେ ଧୂଳିରେ ଅଣନିଃଶ୍ବାସୀ ହେଉଛନ୍ତି l ଏଥିଯୋଗୁଁ ପ୍ରତ୍ୟହ ଛୋଟ ବଡ ଦୁର୍ଘଟଣା ମଧ୍ୟ ଘଟୁଛି l
ସୂଚନା ଅନୁଯାୟୀ, ଖୁରୁଣ୍ଟି ଛକଠାରୁ ରାବଣା ପର୍ଯ୍ୟନ୍ତ ରହିଥିବା ଗୋପବନ୍ଧୁ ମାର୍ଗ କମନ କରିଡର ରାସ୍ତାରେ ପ୍ରତ୍ୟହ ବହୁ ସଂଖ୍ୟକ ଭାରିଯାନ ଯାତାୟତ କରୁଛନ୍ତି l ଏହି ରାସ୍ତାର ଖୁରୁଣ୍ଟି ଛକ ନିକଟରେ ପୂର୍ତ୍ତ ବିଭାଗ ରାସ୍ତା ସଂଯୋଗରେ ଭିଡ଼ ଓ ଟ୍ରାଫିକ ନିୟନ୍ତ୍ରଣ ପାଇଁ ଏକ ଗୋଲେଇ ନିର୍ମାଣ କରିବା ପାଇଁ ଯୋଜନା ହୋଇଥିଲା l ଦୁଇ ବର୍ଷ ତଳୁ ଏନେଇ ଅର୍ଥ ବରାଦ ହୋଇଥିବା ବେଳେ ଗତବର୍ଷ ଠାରୁ ଏଠାରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା l କୌଣସି ଅସୁବିଧା ନ ଥିଲେ ମଧ୍ୟ କାମ ନେଇଥିବା ଥିବା ଠିକା ସଂସ୍ଥା ଏବିଏସ ନିର୍ମଣ କାର୍ଯ୍ୟ ବିଳମ୍ବ କରୁଥିବା ଅଭିଯୋଗ ହେଉଛି l ପୁରୁଣା ରାସ୍ତାକୁ ସାମାନ୍ୟ ଉନ୍ନତିକରଣ କରି ନୂତନ ନିର୍ମାଣ ଚାଲୁଥିବା ବେଳେ କାମ ଅତ୍ୟନ୍ତ ନିମ୍ନମାନର ହେଉଥିବା ଅଭିଯୋଗ ହେଉଛି l ମୁଖ୍ୟ ରାସ୍ତାରେ କ୍ରସର ଗୁଣ୍ଡ ଓ ଚିପସ୍ ବିଛାଇବା ପରେ ତୁରନ୍ତ କାମ ଶେଷ ନ କରି ଠିକା ସଂସ୍ଥା ଛାଡ଼ି ଦେଉଥିବାରୁ ଲୋକେ ଯିବା ଆସିବା ବେଳେ ସମସ୍ୟା ଭୋଗୁଛନ୍ତି l ଅନ୍ୟପକ୍ଷରେ ଧୂଳି ଉଡ଼ିବା ସମ୍ଭାବନା ଥିବା ସ୍ଥାନରେ ପାଣି ସିଞ୍ଚନ କରିବା ନିୟମ ରହିଥିଲେ ମଧ୍ୟ ଏହାକୁ ଠିକା ସଂସ୍ଥା ଆଦୌ ପାଳନ କରୁ ନ ଥିବା ଅଭିଯୋଗ ହେଉଛି l ସମ୍ପୃକ୍ତ ଠିକା ସଂସ୍ଥା କାର୍ଯ୍ୟ କରିବା ସମୟରେ ଟ୍ରାଫିକ ନିୟନ୍ତ୍ରଣ ପାଇଁ କୌଣସି ଲୋକଙ୍କୁ ନିଯୁକ୍ତ କରୁ ନ ଥିବାରୁ ଏଠାରେ ଅଧିକାଂଶ ସମୟରେ ଟ୍ରାଫିକ ସମସ୍ୟା ସୃଷ୍ଟି ହେଉଛି l ଅଧିକାଂଶ ସମୟରେ ଏକ ସ୍ଥାନୀୟ କାରଖାନାର ସୁରକ୍ଷା କର୍ମୀ ଗାଡ଼ି ନିୟନ୍ତ୍ରଣ କରୁଥିବା ଦେଖିବାକୁ ମିଳୁଛି l ଶିଳ୍ପାଞ୍ଚଳର ଏହା ବ୍ୟସ୍ତ ବହୁଳ ରାସ୍ତା ହୋଇଥିବା ସ୍ଥଳେ ଠିକାଦାରଙ୍କ ଏପରି ବେପରୁୱା ମନୋଭାବକୁ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିଛନ୍ତି ା
ଅନ୍ୟପଟେ ଏହି ଠିକା ସଂସ୍ଥା ମିଲିଟାରୀ ଛକଠାରୁ ଡୁବୁରୀ ପର୍ଯ୍ୟନ୍ତ ରହିଥିବା ପୂର୍ତ୍ତ ରାସ୍ତା ନିର୍ମାଣ ଦାୟିତ୍ୱ ମଧ୍ୟ ରହିଛି l ଗତ ଦୁଇ ବର୍ଷ ତଳେ ଏହାର ନିର୍ମାଣ ଅବଧି ଶେଷ ହୋଇଥିଲେ ମଧ୍ୟ ରାସ୍ତା କାମ ଏଯାବତ ଶେଷ ହୋଇ ପାରିନାହିଁ l ଗୋଲେଇ ଛକ ନିର୍ମାଣ ବିଳମ୍ବର କାରଣ ସମ୍ପର୍କରେ ବିଭାଗୀୟ ଉପଖଣ୍ଡ ଅଧିକାରୀ ପ୍ରଶାନ୍ତ କୁମାର ଦାସଙ୍କୁ ପଚାରିବାରେ ସେ କାମ ଚାଲିଛି, ଶୀଘ୍ର ସରିବ ବୋଲି କହିଛନ୍ତି ା
