ଭୁବନେଶ୍ବର,୧୭ା୩(ବ୍ୟୁରୋ): ରାଜ୍ୟରେ ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ହ୍ରାସ କରିବା ପାଇଁ ବାଣିଜ୍ୟ ଏବଂ ପରିବହନ ବିଭାଗ ପ୍ରମୁଖ ସଚିବ ଉଷା ପାଢ଼ୀ ରାଜ୍ୟର ସବୁ ଜିଲାପାଳ, ଏସ୍ପି, ଭୁବନେଶ୍ୱର-କଟକ ଅତିରିକ୍ତ କମିଶନର ଏବଂ ସବୁ ଆର୍ଟିଓଙ୍କୁ ଗୁରୁବାର ଚିଠି ଲେଖିଛନ୍ତି। ଦୁର୍ଘଟଣାଜନିତ ମୃତ୍ୟୁସଂଖ୍ୟା କିପରି ହ୍ରାସ କରାଯାଇପାରିବ ସେନେଇ ସେ ନିର୍ଦ୍ଦେଶ ଦେଇଛନ୍ତି। ସେ ତାଙ୍କ ଚିଠିରେ ଉଲ୍ଲେଖ କରିଛନ୍ତି, ସିଆଇଡି ଏବଂ କ୍ରାଇମବ୍ରାଞ୍ଚର ତଥ୍ୟ ଅନୁଯାୟୀ ୨୦୨୧ ବର୍ଷ ତୁଳନାରେ ୨୦୨୨ରେ ସଡ଼କ ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ୭.୬୦ ପ୍ରତିଶତ ବୃଦ୍ଧି ପାଇଛି। ସୁପ୍ରିମକୋର୍ଟ କମିଟିଙ୍କ ନିର୍ଦ୍ଦେଶ ଅନୁସାରେ ପ୍ରତ୍ୟେକ ବର୍ଷ ୧୦ ପ୍ରତିଶତ ଲେଖା ଦୁର୍ଘଟଣାଜନିତ ମୃତ୍ୟୁହାର ହ୍ରାସ କରିବା କଥା।
ସଡ଼କ ସୁରକ୍ଷା ଜରିଆରେ ଏହା କରିବା ପାଇଁ ସେମାନେ ନିର୍ଦ୍ଦେଶ ଦେଇଛନ୍ତି। ହେଲେ ୨୦୨୨ ତଥ୍ୟ ଯାହା କହୁଛି, ଗଞ୍ଜାମ, କେନ୍ଦୁଝର, ଖୋର୍ଦ୍ଧା, ସମ୍ବଲପୁର, କୋରାପୁଟ, ଢେଙ୍କାନାଳ, ଭଦ୍ରକ, ବଲାଙ୍ଗୀର, ପୁରୀ, କନ୍ଧମାଳ, କେନ୍ଦ୍ରାପଡ଼ା, ନୟାଗଡ଼, ସୁବର୍ଣ୍ଣପୁର ଏବଂ ମାଲକାନଗିରିରେ ୧୦ ପ୍ରତିଶତ ସଡକ ଦୁର୍ଘଟଣାଜନିତ ମୃତ୍ୟୁହାର ବୃଦ୍ଧି ଘଟିଛି। ସଡକ ସୁରକ୍ଷା ଜରିଆରେ ଦୁର୍ଘଟଣା ରୋକିବା ସହିତ ମୂଲ୍ୟବାନ୍ ମଣିଷ ଜୀବନ ବଞ୍ଚାଇବାକୁ ପଡିବ। ପ୍ରତ୍ୟେକ ମଙ୍ଗଳବାର ‘ଜିରୋ ଟଲରାନ୍ସ’ ଦିନ ଭାବେ ଗ୍ରହଣ କରାଯିବ। ଏହିଦିନ ଟ୍ରାଫିକ ଉଲ୍ଲଂଘନକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହାଦ୍ୱାରା ସଡକ ସୁରକ୍ଷା ଦିଗରେ ଯେଉଁ ଉତ୍ତରଦାୟିତ୍ୱ ରହିଛି ତାହାର ଠିକ୍ ପ୍ରମାଣ ଦେବାକୁ ହେବ। ସେହିପରି ଏପ୍ରିଲ ୧ରୁ ୭ ତାରିଖ ପର୍ଯ୍ୟନ୍ତ ୭ ଦିନ ମଧ୍ୟରେ ଦୁର୍ଘଟଣାଜନିତ ମୃତ୍ୟୁସଂଖ୍ୟା ଶୂନ କରିବାକୁ ପଡିବ। ଏହି ସପ୍ତାହକୁ ଶୂନ ମୃତ୍ୟୁ ସପ୍ତାହ ଭାବେ ପ୍ରମାଣ କରିବାକୁ ପଡିବ। ଶୂନ ଦୁର୍ଘଟଣାଜନିତ ମୃତ୍ୟୁ ପାଇଁ ଯେଉଁ ସପ୍ତାହେ ପାଳନ କରାଯିବ ତାର ଏସ୍ଓପି ପରିବହନ କମିଶନରଙ୍କ ଦ୍ୱାରା ପ୍ରସ୍ତୁତ କରାଯାଇ ଜିଲାଗୁଡିକୁ ପଠାଇ ଦିଆଯାଇଛି। ଏହି ଲକ୍ଷ୍ୟକୁ ସଫଳତାର ସହିତ ପୂରଣ କରିବାକୁ ପଡିବ। ଏଥିଲାଗି ଜିଲାପାଳ ଏବଂ ଏସ୍ପି ସମସ୍ତେ ଧ୍ୟାନ ଦେବା ସହିତ ସବୁ ପ୍ରକାର ବ୍ୟବସ୍ଥା ଠିକ୍ ଭାବେ ହେବ ସେନେଇ ଧ୍ୟାନ ଦେବାକୁ କୁହାଯାଇଛି। ରାଜ୍ୟସ୍ତରରୁ ଯଦି କିଛି ଆବଶ୍ୟକତା ପଡେ ତେବେ ସେନେଇ କ’ଣ କରାଯିବ ତାହା ଏସ୍ଓପିରେ ଉଲ୍ଲେଖ ରହିଛି।
ତେବେ ୨୦୨୨ ସଡ଼କ ଦୁର୍ଘଟଣାଜନିତ ତଥ୍ୟରେ ଯାହା ଉଲ୍ଲେଖ ରହିଛି ତାହା ସବୁଠାରୁ ଚିନ୍ତାଜନକ। ସଡକ ଦୁର୍ଘଟଣାରେ ଗଞ୍ଜାମ ଜିଲାରେ ୨୦୨୧ ତୁଳନାରେ ୨୦୨୨ରେ ୧୪ ପ୍ରତିଶତ ବୃଦ୍ଧି ଘଟିଥିବା ବେଳେ ମୃତ୍ୟୁହାରରେ ୧୦ ପ୍ରତିଶତ ବଢିଥିବା ଉଲ୍ଲେଖ ଅଛି। ସେହିପରି ସୁନ୍ଦରଗଡ଼ରେ ମୃତ୍ୟୁହାର ୫ ପ୍ରତିଶତ ଏବଂ ଦୁର୍ଘଟଣା ହାର ୧୬ ପ୍ରତିଶତ ବଢିଛି। କେନ୍ଦୁଝରରେ ମୃତ୍ୟୁହାର ୧୦ ପ୍ରତିଶତ ବଢିଥିବା ବେଳେ ଦୁର୍ଘଟଣା ୩ ପ୍ରତିଶତ ହ୍ରାସ ପାଇଛି। ଖୋର୍ଦ୍ଧାରେ ମୃତ୍ୟୁହାର ୧୬ ପ୍ରତିଶତ ଏବଂ ଦୁର୍ଘଟଣା ହାର ୨୨ ପ୍ରତିଶତ ବୃଦ୍ଧି ଘଟିଛି। ମୟୂରଭଞ୍ଜରେ ମୃତ୍ୟୁହାର ୪ ଏବଂ ଦୁର୍ଘଟଣା ହାର ୧୫ ପ୍ରତିଶତ ବୃଦ୍ଧି ଘଟିଛି। ସେହିପରି ଦେଖିବାକୁ ଗଲେ, କଟକ, ଯାଜପୁର, ବାଲେଶ୍ୱର, ଅନୁଗୋଳ, ବରଗଡ, କଳାହାଣ୍ଡି, ରାୟଗଡା, ନୂଆପଡା, ବୌଦ୍ଧ ଏବଂ ଗଜପତିରେ ଦୁର୍ଘଟଣାଜନିତ ମୃତ୍ୟୁହାର କମିଛି। ଅନୁଗୋଳରେ ୨୦୨୧ ତୁଳନାରେ ୨୧ ପ୍ରତିଶତ ମୃତ୍ୟୁହାର କମିଛି, ଏହା ରାଜ୍ୟରେ ସର୍ବାଧିକ। ସେହିପରି ସୋନପୁରରେ ୨୦୨୧ ବର୍ଷ ତୁଳନାରେ ୨୦୨୨ରେ ସର୍ବାଧିକ ୫୩ ପ୍ରତିଶତ ଦୁର୍ଘଟଣାଜନିତ ମୃତ୍ୟୁହାରରେ ବୃଦ୍ଧି ଘଟିଛି, ଯାହା ରାଜ୍ୟରେ ସର୍ବାଧିକ। ଢେଙ୍କାନାଳରେ ୩୮ ପ୍ରତିଶତ ଏବଂ ଭଦ୍ରକରେ ୩୬ ପ୍ରତିଶତ ମୃତ୍ୟୁହାର ବଢିଛି। ଅନ୍ୟପଟେ ଦେବଗଡ ଏବଂ ମାଲକାନଗିରିରେ ସଡ଼କ ଦୁର୍ଘଟଣା ହାର ସର୍ବାଧିକ ୩୩ ପ୍ରତିଶତ ବୃଦ୍ଧି ପାଇଛି।
