ମୁମ୍ବାଇ,୨୭।୪: ଆଇପିଏଲ୍ରେ ୨୦୨୨ରେ ୱାଙ୍ଖେଡେ ଷ୍ଟାଡିୟମରେ ଗୁଜରାଟ ଟାଇଟାନ୍ସ ଏବଂ ସନରାଇଜର୍ସ ହାଇଦ୍ରାବାଦ ମଧ୍ୟରେ ଖେଳାଯାଉଛି। ସନରାଇଜର୍ସ ହାଇଦ୍ରାବାଦ ଗୁଜରାଟ ଟାଇଟାନ୍ସ ସମ୍ମୁଖରେ ୧୯୬ ରନ ଲକ୍ଷ୍ୟ ଧାର୍ଯ୍ୟ କରିଛି। ଟସ ହରାଇବା ପରେ ପ୍ରଥମେ ବ୍ୟାଟିଂ କରି ହାଇଦ୍ରାବାଦ ଦଳ ୨୦ ଓଭରରେ ୬ ଉଇକେଟ ହରାଇ ୧୯୫ ରନ ସଂଗ୍ରହ କରିଥିଲା। ଅଭିଷେକ ଶର୍ମା ୪୨ଟି ବଲ୍ରୁ ୬୫ ରନ୍, ଏଡେନ୍ ମାର୍କରମ୍ ୪୦ ବଲ୍ରୁ ୫୬ ରନ୍ର ପାଳି ଖେଳିଥିଲେ। ସେହିପରି ଆଇପିଏଲ ୨୦୨୨ରେ ନିଜର ପ୍ରଥମ ମ୍ୟାଚ ଖେଳୁଥିବା ଶଶାଙ୍କ ସିଂ ୨୦ ତମ ଓଭରରେ ଲକି ଫର୍ଗୁସନଙ୍କ ଶେଷ ତିନୋଟି ବଲରେ ତିନୋଟି ଛକା ମାରିଥିଲେ। ଏହା ବ୍ୟତୀତ ମାର୍କୋ ୟାନସେନ ମଧ୍ୟ ଗୋଟିଏ ଛକା ମାରିଥିଲେ। ଫର୍ଗୁସନ ଶେଷ ଓଭରରେ ମୋଟ ୨୫ ରନ ଦେଇଥିଲେ। ଶଶାଙ୍କ ୬ଟି ବଲରୁ ୨୫ ରନ୍ ଏବଂ ମାର୍କୋ ୟାନସେନ ପାଞ୍ଚଟି ବଲରୁ ୮ରେ ଅପରାଜିତ ରହିଥିଲେ। ଶେଷ ଓଭରରେ ହାଇଦ୍ରାବାଦ ଚାରି ଉଇକେଟ ହରାଇ ୫୫ ରନ ସଂଗ୍ରହ କରିଥିଲା।
ହାର୍ଦ୍ଦିକ ପାଣ୍ଡ୍ୟାଙ୍କ ଅଧିନାୟିକତ୍ୱରେ ଗୁଜରାଟ ଭଲ ପ୍ରଦର୍ଶନ କରିଛି। ଦଳ ଏପର୍ଯ୍ୟନ୍ତ ୭ଟି ମ୍ୟାଚରୁ ମାତ୍ର ଗୋଟିଏ ମ୍ୟାଚ ହାରିଛି। ଦଳ ୧୨ ପଏଣ୍ଟ ସହ ପଏଣ୍ଟ ଟେବୁଲରେ ଦୁଇ ନମ୍ବର ସ୍ଥାନରେ ଅଛି। କେନ ୱିଲିୟମସନଙ୍କ ଅଧିନାୟକତ୍ୱରେ ଥିବା ସନରାଇଜର୍ସ ହାଇଦ୍ରାବାଦରେ ବର୍ତ୍ତମାନ ୧୦ ପଏଣ୍ଟ ରହିଛି। ଯଦି ଦଳ ଆଜି ଗୁଜରାଟକୁ ଏକ ବଡ଼ ବ୍ୟବଧାନରେ ପରାସ୍ତ କରିବାରେ ସଫଳ ହୁଏ ତେବେ ଶୀର୍ଷରେ ପହଞ୍ଚିପାରିବ।
