ଚିକିଟି,୫।୫(ପ୍ରକାଶ ଚନ୍ଦ୍ର ସାହୁ): କେରଳସ୍ଥିତ ଥିରୁଭାନନ୍ତପୁରମ ଅଞ୍ଚଳରେ ଏକ ଘରୋଇ କମ୍ପାନୀରେ କାମ କରୁଥିବା ଓଡ଼ିଆ ଶ୍ରମିକଙ୍କ ରବିବାର ମୃତ୍ୟୁ ଘଟିଛି l ସେ ହେଲେ ଗଞ୍ଜାମ ଜିଲା ଚିକିଟି ବ୍ଲକ ନୂଆପଡା ପଞ୍ଚାୟତର ବି ନୂଆପଡା ଗ୍ରାମର ଅଭିମନ୍ୟୁ ପ୍ରଧାନ (୫୭) l ଅଭିମନ୍ୟୁ ଦୀର୍ଘ ବର୍ଷ ଧରି ଯାଜପୁର, ଚେନ୍ନାଇ, ହାଇଦ୍ରାବାଦରେ ଏଭଳି ଘରୋଇ କମ୍ପାନୀରେ ଶ୍ରମିକ ଭାବେ କାମ କରୁଥିଲେ l ଗତ ଏକ ମାସ ତଳେ ନିଜ ଗ୍ରାମରେ ମନ୍ଦିର ପ୍ରତିଷ୍ଠା ଉପଲକ୍ଷେ ଗ୍ରାମକୁ ଆସିଥିଲେ l ପ୍ରତିଷ୍ଠା ସରିବା ପରେ ଗତ ୨୦ ଦିନ ତଳେ କେରଳକୁ ଫେରିଥିଲେ l
ଗତକାଲି ଘରୋଇ କମ୍ପାନୀରେ କାମ ଚାଲିଥିବା ସମୟରେ ହାଇଡ୍ରୋ ଯୋଗେ ପିଲର ପାଇଁ ଜାଲି ଉଠାଉ ଥିବାବେଳେ ହଠାତ୍ ହାଇଡ୍ରୋ ଲାଗିଥିବା ବେଲ୍ଟଟି କଟିଯିବା ଫଳରେ ଅଭିମନ୍ୟୁଙ୍କ ଉପରେ ପଡି ଯାଇଥିଲା l ଖବର ପାଇଁ ତାଙ୍କ ସାଙ୍ଗ ଏବଂ ବନ୍ଧୁ ମାନେ ପହଞ୍ଚି ତାଙ୍କୁ ଚିକିତ୍ସା ପାଇଁ ନିକଟସ୍ଥ ସରକାରୀ ଡାକ୍ତର ଖାନାକୁ ନେଇଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା l କୌଣସି ସୂତ୍ରରୁ ଖବର ପାଇଁ ଥିରୁଭାନନ୍ତପୁରମ ଅଞ୍ଚଳର ପୋଲିସ ଡାକ୍ତରଖାନାରେ ପହଂଚି ମୃତ ଶବକୁ ଜବତ କରି ଆଜି ବ୍ୟବଚ୍ଛେଦ ହେବ ବୋଲି ପରିବାର ପକ୍ଷରୁ କୁହାଯାଇଛି। ସେଠାରେ ଥିବା ଅଭିମନ୍ୟୁଙ୍କ ବନ୍ଧୁ ତଙ୍କ ପରିବାରକୁ ମୃତ୍ୟୁ ଖବର ଜଣାଇବା ପରେ ପରିବାର ଲୋକେ ଭାଙ୍ଗି ପଡ଼ିଛନ୍ତି। ଏହାସହ ଗ୍ରାମରେ ଶୋକର ଛାୟା ଖେଳିଯାଇଛି l ଆଜି ପରିବାର ଲୋକେ କେରଳରେ ପହଞ୍ଚିଥିବା ଜଣାପଡିଛି l ଅଭିମନ୍ୟୁଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବା ପାଇଁ ଗ୍ରାମବାସୀ ଦାବି କରିଛନ୍ତି l
Dharitri – Odisha’s No.1 Odia Daily
