ଚଣ୍ଡିଗଡ଼,୫।୧୨: ଆସନ୍ତା ବର୍ଷ ଆରମ୍ଭରୁ ହେବାକୁ ଯାଉଥିବା ବିଧାନସଭା ନିର୍ବାଚନ ପୂର୍ବରୁ ମୋତେ ଦଳରେ ସାମିଲ କରିବା ପାଇଁ ଜେଣ ଭାଜପା ନେତା ଟଙ୍କା ସହ କେନ୍ଦ୍ର କ୍ୟାବିନେଟ୍ରେ ସ୍ଥାନ ଯାଚିଛନ୍ତି। ଏଭଳି ଅଭିଯୋଗ ଆଣିଛନ୍ତି ପଞ୍ଜାବର ଆମ ଆଦମୀ ପାର୍ଟି (ଏଏପି) ସଭାପତି ଭାଗଓ୍ବନ୍ତ ମନ୍ନ ଦାବି। ଗଣମାଧ୍ୟମକୁ ସମ୍ବୋଧନ ଦେଇ ସଙ୍ଗରୁର ଏମ୍ପି ଭାଜପାର ଘୋଡ଼ା ବ୍ୟପାରକୁ ସମାଲୋଚନା କରିଥିବା ବେଳେ ତାଙ୍କର ଅଭିଯୋଗକୁ ଭିତ୍ତିହୀନ ବୋଲି କହିଛି ଭାଜପା।
ଭାଜପା ନେତାଙ୍କ ନାମ ନ ନେଇ ମନ୍ନ କହିଛନ୍ତି ଯେ, ୪ ଦିନ ତଳେ ଏକ ଫୋନ କଲ ଆସିଥିଲା। ସେ ପଚାରିଥିଲେ, ଭାଜପାରେ ସାମିଲ ହେବା ପାଇଁ ଆପଣଙ୍କୁ କ’ଣ ଦରକାର? ତୁମକୁ ଟଙ୍କା ଦରକାର କି? ପଞ୍ଜାବରେ ମୁଁ ଏଏପିର ଏକମାତ୍ର ଏମ୍ପି ହୋଇଥିବାରୁ ମୋ ବିରୋଧରେ ଆଣ୍ଟି ଡିଫେକଶନ ଆଇନ କାର୍ଯ୍ୟକାରୀ ହୋଇପାରିବ ନାହିଁ। ଏଣୁ ସେ ମୋତେ କେନ୍ଦ୍ର ସରକାରଙ୍କ କ୍ୟାବିନେଟରେ ମନ୍ତ୍ରୀ ପଦ ଦେଇପାରିବେ। ତୁମକୁ କେଉଁ ମନ୍ତ୍ରଣାଳୟ ଦରକାର କୁହ।
ମୁଁ ତାଙ୍କୁ କହିଥିଲି ମୁଁ ଏକ ମିଶନରେ ଅଛି, କମିଶନରେ ନୁହେଁ। ମୋତେ ଟଙ୍କାରେ କିଣି ହେବ ନାହିଁ। ମୁଁ ଦଳ ପାଇଁ କାମ କରିବା ଲାଗି ଭଲ ଚାକିରି ଛାଡ଼ିଛି। ମୋ ଉପରେ ଥିବା ଲୋକଙ୍କ ବିଶ୍ୱାସ ଓ ଦଳୀୟ କର୍ମୀଙ୍କୁ ଜାବନା କିଣିବାକୁ ଚେଷ୍ଟା କରୁଛି ବୋଲି ସେ କହିଛନ୍ତି। ତାଙ୍କୁ ପ୍ରସ୍ତାବ ଦେଇଥିବା ଭାଜପା ନେତାଙ୍କ ନାମ ପଚରାଯିବାରୁ ସେ କହିଥିଲେ, ଉଚିତ ସମୟରେ ଉକ୍ତ ନେତାଙ୍କ ନାମ ପ୍ରକାଶ କରିବେ। ତେବେ ଲୋକଲୋଚନରେ ରହିବା ପାଇଁ ମନ୍ନ ଏଭଳି ପ୍ରୟାସ କରୁଥିବା ଭାଜପାର ପଞ୍ଜାବ ସାଧାରଣ ସମ୍ପାଦକ ସୌରଭ ଶର୍ମା କହିଛନ୍ତି। ଏଥିସହ ସେ ପ୍ରସ୍ତାବ ଦେଇଥିବା ନେତାଙ୍କ ନାମ ପ୍ରକାଶ କରିବାକୁ ଏଏପି ଏମ୍ପିଙ୍କୁ ଚ୍ୟାଲେଞ୍ଜ ଦେଇଛନ୍ତି।
