ମୁମ୍ବାଇ: ବଲିଉଡର ସୁପରଷ୍ଟାର ଆମିର ଖାନ ପୁଣିଥରେ ବିବାହ ବନ୍ଧନରେ ବାନ୍ଧି ହୋଇଛନ୍ତି। ମୁମ୍ବାଇର ବାନ୍ଦ୍ରାସ୍ଥିତ ନିଜ ବାସଭବନରେ ସେ ଗର୍ଲଫ୍ରେଣ୍ଡ ଗୌରୀ ସ୍ପ୍ରାଟ୍ଙ୍କ ସହ ତୃତୀୟ ବିବାହ କରିଛନ୍ତି। ୬୦ ବର୍ଷ ବୟସରେ ଆମିର ଅତି ସାଧାରଣ ଭାବେ ଗୌରୀଙ୍କ ସହ କୋର୍ଟ ମ୍ୟାରେଜ କରିଥିବା ସୂଚନା ମିଳିଛି। ଏହି ବିବାହ ସମାରୋହରେ କେବଳ ତାଙ୍କ ପରିବାର ଏବଂ କିଛି ସ୍ବତନ୍ତ୍ର ଅତିଥି ଉପସ୍ଥିତ ଥିଲେ। ମୁମ୍ବାଇରେ ପ୍ରବଳ ବର୍ଷା ସତ୍ତ୍ୱେ ଶନିବାରଠାରୁ ହିଁ ଆମିରଙ୍କ ଘର ରଙ୍ଗବେରଙ୍ଗର ଆଲୋକରେ ସଜେଇ ହୋଇଉଠିଥିଲା।
ଗତ କିଛି ସମୟ ଧରି ଆମିର ଏବଂ ଗୌରୀଙ୍କୁ ଅନେକ ସ୍ଥାନରେ ଏକାଠି ଦେଖିବାକୁ ମିଳୁଥିଲା, ଯାହାକୁ ନେଇ ଚର୍ଚ୍ଚା ଜୋର ଧରିଥିଲା। ପରେ ଆମିର ନିଜେ ଏହି ସମ୍ପର୍କକୁ ସ୍ବୀକାର କରିଥିଲେ। ଆମିରଙ୍କ ପୂର୍ବ ଦୁଇଟି ବିବାହ ଭଳି ଏହି ତୃତୀୟ ବିବାହ ମଧ୍ୟ ଅତ୍ୟନ୍ତ ସାଧାରଣ ଢଙ୍ଗରେ ସମ୍ପନ୍ନ ହୋଇଛି। ବର୍ତ୍ତମାନ ସୋସିଆଲ ମିଡିଆରେ ଏହି ବିବାହର ଫଟୋଗୁଡ଼ିକ ଖୁବ ଭାଇରାଲ ହେବାରେ ଲାଗିଛି। ଏହି ଘରୋଇ ସମାରୋହରେ ବଲିଉଡ ଇଣ୍ଡଷ୍ଟ୍ରିରୁ ଅଧିକ ଲୋକଙ୍କୁ ଦେଖିବାକୁ ମିଳି ନ ଥିଲା, କିନ୍ତୁ ଆମିରଙ୍କ ସମ୍ପୂର୍ଣ୍ଣ ପରିବାର ଏଥିରେ ସାମିଲ ହୋଇଥିଲେ।
ଆମିରଙ୍କ ପ୍ରଥମ ପତ୍ନୀଙ୍କ ଝିଅ ଆୟରା ଖାନ ତାଙ୍କ ସ୍ବାମୀ ନୂପୁର ଶିଖରେଙ୍କ ସହ ପହଞ୍ଚିଥିବା ବେଳେ ପୁଅ ଜୁନୈଦ ଖାନ ମଧ୍ୟ ପିତାଙ୍କ ବିବାହରେ ଉପସ୍ଥିତ ଥିଲେ। କ୍ରିକେଟର ଇରଫାନ ପଠାନଙ୍କୁ ଏହି ବିବାହ ପାଇଁ ନିମନ୍ତ୍ରଣ କରାଯାଇଥିଲା। ଆମିରଙ୍କ ନିକଟତର ଏମଏନଏସ (MNS) ମୁଖ୍ୟ ରାଜ ଠାକରେ ଏବଂ ’ଲଗାନ’ ଚଳଚ୍ଚିତ୍ରର ’ବାଘା’ ଚରିତ୍ରରେ ଅଭିନୟ କରିଥିବା ଅଭିନେତା ଅମିନ ହାଜି ମଧ୍ୟ ଏହି ସମାରୋହରେ ନଜର ଆସିଥିଲେ।
କହିରଖୁଛୁ, ଆମିର ଏହା ପୂର୍ବରୁ ଦୁଇଥର ବିବାହ କରିଛନ୍ତି। ଆମିର ୧୯୮୬ରେ ରୀନା ଦତ୍ତଙ୍କୁ ପ୍ରଥମ ବିବାହ କରିଥିଲେ। ଏହି ବିବାହ ୧୬ ବର୍ଷ ଚାଲିବା ପରେ ୨୦୦୨ରେ ଉଭୟଙ୍କ ମଧ୍ୟରେ ବିବାହ ବିଚ୍ଛେଦ ହୋଇଥିଲା। ସେମାନଙ୍କର ଦୁଇଟି ସନ୍ତାନ ଅଛନ୍ତି – ପୁଅ ଜୁନୈଦ (ଯିଏ ଏବେ ଜଣେ ଅଭିନେତା) ଏବଂ ଝିଅ ଆୟରା।
ଏହାପରେ ୨୦୦୫ରେ ସେ କିରଣ ରାଓଙ୍କୁ ଦ୍ୱିତୀୟ ବିବାହ କରିଥିଲେ। ୧୫ ବର୍ଷ ପରେ ୨୦୨୧ରେ ଦୁହେଁ ଆପୋଷ ସହମତିରେ ଅଲଗା ହୋଇଥିଲେ। ସେମାନଙ୍କର ଆଜାଦ ନାମରେ ଜଣେ ପୁଅ ଅଛନ୍ତି। ବର୍ତ୍ତମାନ ୨୦୨ରେ ସେ ଗୌରୀ ତୃତୀୟ ବିବାହ କରିଛନ୍ତି।
ବିଶେଷ କଥା ହେଉଛି, ଆମିରଙ୍କର ତାଙ୍କର ଦୁଇ ପୂର୍ବତନ ପତ୍ନୀଙ୍କ ସହ ସମ୍ପର୍କ ଖୁବ ଭଲ ରହିଛି ଏବଂ ଅନେକ ସମୟରେ ସମସ୍ତଙ୍କୁ ଏକାଠି ଦେଖିବାକୁ ମଧ୍ୟ ମିଳିଥାଏ।
