ମୁମ୍ବାଇ: ବଲିଉଡର ସୁପରଷ୍ଟାର ଆମିର ଖାନ ଏବଂ ଗୌରୀ ସ୍ପ୍ରାଟ୍ ପରସ୍ପର ବିବାହ ବନ୍ଧନରେ ବାନ୍ଧି ହୋଇଛନ୍ତି। ନିକଟରେ ବାନ୍ଦ୍ରାସ୍ଥିତ ନିଜ ବାସଭବନରେ ପରିବାର ଏବଂ କିଛି ନିକଟତର ବନ୍ଧୁମାନଙ୍କ ଉପସ୍ଥିତିରେ ଏହି କପଲ କୋର୍ଟ ମ୍ୟାରେଜ କରିଛନ୍ତି। ବିବାହ ପରେ ଗୌରୀ ସୋସିଆଲ ମିଡିଆରେ କିଛି ଫଟୋ ଶେୟାର କରିଛନ୍ତି, ଯାହା ଏବେ ବେଶ୍ ଭାଇରାଲ ହେବାରେ ଲାଗିଛି। ତେବେ ଏହି ବିବାହ ଉତ୍ସବରେ ସବୁଠାରୁ ଅଧିକ ଚର୍ଚ୍ଚାର ବିଷୟ ପାଲଟିଛି ଆମିର ଖାନ ପତ୍ନୀ ଗୌରୀଙ୍କୁ ଉପହାର ଦେଇଥିବା ଏକ ସ୍ପେଶାଲ ମୁଦି।
ଏହି ମୁଦି କୌଣସି ସାଧାରଣ ମୁଦି ନୁହେଁ। ଏହାକୁ ପ୍ରସ୍ତୁତ କରିବା ପାଇଁ ୧୩୧ ଜଣ ଅଭିଜ୍ଞ କାରିଗରଙ୍କୁ ପ୍ରାୟ ୨୫୬ ଘଣ୍ଟା ସମୟ ଲାଗିଥିଲା। ମିଡିଆ ରିପୋର୍ଟ ଅନୁଯାୟୀ, ଏହି ମୁଦିରେ ୪୦ଟି ଅସଲି ହୀରା ସହିତ ଏକ ଦୁର୍ଲଭ ‘କାବୋଚନ-କଟ’ (cabochon-cut) ପ୍ରାକୃତିକ ରୁବି (ପଦ୍ମରାଗ ମଣି) ଲାଗିଛି, ଯାହାକୁ ମାଡାଗାସ୍କାରରୁ ଅଣାଯାଇଛି। ଏହି ସ୍ବତନ୍ତ୍ର ରୁବି ପଥରକୁ ଖୋଜିବା ପାଇଁ ପ୍ରାୟ ୩ ମାସରୁ ଅଧିକ ସମୟ ଲାଗିଥିଲା।
ଜୁଏଲାରୀ ବ୍ରାଣ୍ଡ ‘QWEEN’ ଦ୍ୱାରା ଡିଜାଇନ କରାଯାଇଥିବା ଏହି ମୁଦିକୁ ‘ବମ୍ବେ ସିଗ୍ନେଟ’ (Bombay Signet) ଷ୍ଟାଇଲ୍ରେ ପ୍ରସ୍ତୁତ କରାଯାଇଛି। ଏହାର ଚାରିପାଖରେ ସୁନାର ଏକ ସୁନ୍ଦର କ୍ରାଉନ ବା ରାଜମୁକୁଟ ଭଳି ଡିଜାଇନ ରହିଛି, ଯାହା ସାଧାରଣତଃ ପାରମ୍ପରିକ ରାଜକୀୟ ଅଳଙ୍କାରରେ ଦେଖିବାକୁ ମିଳେ।
ସୂଚନାଯୋଗ୍ୟ ଯେ, ଆମିର ଖାନ ଏବଂ ଗୌରୀ ସ୍ପ୍ରାଟ୍ଙ୍କ ମଧ୍ୟରେ ୨୦୨୪ରୁ ପ୍ରେମ ସମ୍ପର୍କ ଗଢ଼ିଉଠିଥିଲା। ଗତବର୍ଷ ନିଜର ୬୦ତମ ଜନ୍ମଦିନ ଅବସରରେ ଆମିର ଗୌରୀଙ୍କ ସହ ନିଜର ସମ୍ପର୍କକୁ ଗଣମାଧ୍ୟମ ଆଗରେ ଖୋଲାଖୋଲି ଭାବେ ପ୍ରକାଶ କରିଥିଲେ। ଏବେ ଦୁହେଁ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ଫ୍ୟାନ୍ସ ଏବଂ ବଲିଉଡ ସେଲିବ୍ରିଟିମାନେ ଏବେ ନବଦମ୍ପତିଙ୍କୁ ଶୁଭେଚ୍ଛା ଜଣାଉଛନ୍ତି।
