ନୂଆଦିଲ୍ଲୀ,୪।୧୨: ୟୁନିକ୍ ଆଇଡେଣ୍ଟିଫିକେସନ ଅଥରିଟି ଅଫ୍ ଇଣ୍ଡିଆ(ୟୁଆଇଡିଏଆଇ) ପକ୍ଷରୁ ଜାରି କରାଯାଇଥିବା ଆଧାର ଗୁରୁତ୍ୱପୂର୍ଣ୍ଣ ଦସ୍ତାବିଜ ପାଲଟିଛି। ହେଲେ ଅସାବଧାନତା କାରଣରୁ କେବେ ଆଧାର ହଜିଗଲେ ନଚେତ ଚୋରି ହୋଇଗଲେ ଚିନ୍ତା ବଢ଼ିଯାଏ। କାରଣ କେଉଁଭଳି ଭାବେ ଏହାକୁ ଫେରିପାଇବେ ତାହା କାର୍ଡଧାରକ ବୁଝିପାରନ୍ତି ନାହିଁ। ତେବେ ଆଧାର ହଜିଗଲେ ଏହାର ଫଟୋକପି ମିଳିବା ସମ୍ଭବ। ହେଲେ ଏଥିପାଇଁ ଏନ୍ରୋଲମେଣ୍ଟ ସ୍ଲିପ୍ର ଆବଶ୍ୟକତା ରହିଛି। ଏହି ସ୍ଲିପ୍ ପ୍ରଥମ ଥର ପାଇଁ ଆବେଦନ କରିବା ସମୟରେ ମିଳିଥାଏ।
ଏଣୁ ଯଦି ଆପଣଙ୍କ ପାଖରେ ଏନ୍ରୋଲମେଣ୍ଟ ନମ୍ବର ରହିଛି ତେବେ ଆଧାର ହଜିଲେ ଚିନ୍ତା କରିବାର କୌଣସି କାରଣ ନ ଥାଏ। କାରଣ ଆଧାରର ଡାଉନ୍ଲୋଡ୍ କପି ପ୍ରିଣ୍ଟ ଭଳି ମାନ୍ୟ ଅଟେ। ଯଦି ଉଭୟ ହଜିଯାଏ ତେବେ କାର୍ଡଧାରୀ ୧୯୪୭ରେ ଫୋନ୍ କରି ଏନ୍ରୋଲ୍ମେଣ୍ଟ ଆଇଡି ବିଷୟରେ ସୂଚନା ପାଇପାରିବେ। ଏହାଛଡ଼ା ୟୁଆଇଡିଏଆଇର ଓ୍ବେବ୍ସାଇଟ୍ର http://resident.uidai.gov.in/lost-uideid ଲିଙ୍କକୁ ଯାଇ ଏନ୍ରୋଲମେଣ୍ଟ ଆଇଡି ପାଇପାରିବେ। ୟୁଆଇଡିଏଆଇ କାର୍ଡ ଧାରକଙ୍କୁ ଆଧାର ରିପ୍ରିଣ୍ଟ କରିବାର ସୁବିଧା ଦେଇଛି। ଏହାର ଓ୍ବେବ୍ସାଇଟ୍ ଏବଂ ଆଧାର କେନ୍ଦ୍ରକୁ ଯାଇ ଏଥିପାଇଁ ଆବେଦନ କରିପାରିବେ। ୧୫ ଦିନ ମଧ୍ୟରେ କାର୍ଡ ଘରେ ପହଞ୍ଚିଥାଏ।
