ଭୁବନେଶ୍ୱର,୧୩ା୮(ବ୍ୟୁରୋ):ରାଜଧାନୀରେ ଜଣେ ଯୁବତୀଙ୍କ ଉପରକୁ ଏସିଡ୍ ମାଡ଼ କରାଯାଇଛି। ଏଥିରେ ଯୁବତୀଙ୍କ ମୁହଁର ବାମ ପାର୍ଶ୍ୱ ପୋଡ଼ି ଯାଇଛି। ଏସିଡ୍ ମାଡ଼ କରିଥିବା ଯୁବକ ହେଉଛନ୍ତି ନିମାପଡ଼ା ଅଞ୍ଚଳର ପପୁ ରାଉତ। ୨ବର୍ଷ ତଳେ ନୋଟାରୀ ପବ୍ଲିକ୍ଙ୍କ ନିକଟରେ ପପୁ ଉକ୍ତ ଯୁବତୀଙ୍କୁ ବିବାହ କରିଥିବା ଜଣାପଡ଼ିଛି। ପୀଡ଼ିତା ପପୁଙ୍କ ବିରୋଧରେ ଧଉଳି ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା (ନଂ.୧୨୧/୨୦୨୧) ରୁଜୁ କରି ଅଭିଯୁକ୍ତ ପପୁଙ୍କୁ ଅଟକ ରଖି ପଚରାଉଚରା ଜାରି ରଖିଥିବା ଜଣାପଡ଼ିଛି। ଏସିଡ୍ ମାଡ କରାଯାଇଥିବା ନେଇ ପୀଡ଼ିତା ଏତଲାରେ ଉଲ୍ଲେଖ କରିଥିବାବେଳେ ଏହା ଏସିଡ୍ ନୁହେଁ, ଅନ୍ୟ କୌଣସି ରାସାୟନିକ ପଦାର୍ଥ ତାଙ୍କ ଦେହରେ ପକାଯାଇଥିବା ପୋଲିସ ସନ୍ଦେହ କରୁଛି। ତଦନ୍ତ ଜାରି ରହିଥିବାରୁ ପୋଲିସ ଅଧିକ କିଛି ସୂଚନା ଦେବାକୁ ମନା କରିଦେଇଛି।
ମିଳିଥିବା ସୂଚନା ଅନୁସାରେ ପପୁଙ୍କ ଘର ପୁରୀ ଜିଲା ନିମାପଡ଼ାରେ ହୋଇଥିବାବେଳେ ସେ ପିପିଲିର ଜଣେ ଯୁବତୀଙ୍କୁ ଭଲ ପାଉଥିଲେ। ପରେ ଉଭୟେ ୨୦୧୯ରେ ନୋଟାରୀଙ୍କ ନିକଟରେ ବିବାହ କରିଥିଲେ। ବିବାହ ପରେ ସେମାନେ ଏକତ୍ର ନ ରହି ନିଜ ନିଜ ଘରେ ରହୁଥିଲେ। ହେଲେ ନୋଟାରୀରେ ବିବାହ କରିଥିବାରୁ ଯୁବତୀ ଜଣକ ପପୁଙ୍କ ସାଙ୍ଗରେ ରହିବାକୁ ସବୁବେଳେ ଜିଦ୍ ଧରୁଥିଲେ। ହେଲେ ପପୁ କିଛି ନା କିଛି ବାହାନା ଦେଖାଇ ଦିନ ଗଡ଼େଇ ଚାଲିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ଅଧିକାଂଶ ସମୟରେ ଝଗଡ଼ା ମଧ୍ୟ ଲାଗୁଥିଲା। ବୁଧବାର ପପୁ ଉକ୍ତ ଯୁବତୀଙ୍କୁ ଧଉଳି ନିକଟକୁ ଡକାଇଥିଲେ। ଯୁବତୀ ଜଣକ ସେଠାରେ ପହଞ୍ଚତ୍ବା ପରେ ଉଭୟେ ବସି କଥା ହୋଇଥିଲେ। ଏହି ସମୟରେ କୌଣସି କାରଣକୁ ନେଇ ପପୁ ନୋଟାରୀ ନିକଟରେ କରିଥିବା ବିବାହର ସମସ୍ତ କାଗଜପତ୍ରକୁ ପୋଡ଼ିବାକୁ ଚେଷ୍ଟା କରିଥିଲେ। ଏହାକୁ ଯୁବତୀ ବିରୋଧ କରିବାରୁ ପପୁ ରାଗିଯାଇ ନିଜ ସାଥିରେ ଆଣିଥିବା ଏସିଡ୍ ଯୁବତୀଙ୍କ ମୁହଁକୁ ଫୋପାଡ଼ି ସେଠାରୁ ଫେରାର ହୋଇଯାଇଥିଲେ। ଯୁବତୀ ଜଣଙ୍କ କଷ୍ଟରେ ଛଟପଟ ହୋଇ ଚିତ୍କାର କରିବାରୁ ସ୍ଥାନୀୟ ଲୋକେ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ।
