ଜେନେଭା/କାବୁଲ, ୧୮।୯ : ଆଫଗାନିସ୍ତାନରେ ତାଲିବାନ ପକ୍ଷରୁ ବର୍ଷେ ବ୍ୟାପୀ ବାଳିକାଙ୍କ ଶିକ୍ଷାବନ୍ଦ କରାଯାଇଥିବା ଘଟଣାରେ ଜାତିସଂଘ ପକ୍ଷରୁ କଡ଼ା ନିନ୍ଦା କରାଯାଇଛି। ତାଲିବାନ ଶାସନକୁ ଆସିବା ପରେ ୨୦୨୧ ସେପ୍ଟେମ୍ବର ୧୮ରେ ଦେଶରେ ବାଳିକାଙ୍କ ଶିକ୍ଷା ଉପରେ କଟକଣା ଜାରି କରିଥିଲା। ଇତିମଧ୍ୟରେ ଏହି ଘଟଣାକୁ ବର୍ଷେ ପୂରଣ ହୋଇଛି। ଶୀଘ୍ର ବାଳିକାଙ୍କ ଲାଗି ଉପଯୋଗୀ ଥିବା ସ୍କୁଲଗୁଡ଼ିକୁ ଖୋଲିବା ପାଇଁ ଜାତିସଂଘ ପକ୍ଷରୁ ଅନୁରୋଧ କରାଯାଇଛି।
ଚଳିତ ବର୍ଷ ମାର୍ଚ୍ଚ ୨୩ରେ ଶିକ୍ଷା ମନ୍ତ୍ରଣାଳୟ ପକ୍ଷରୁ ବାଳିକାଙ୍କ ପାଇଁ ସେକେଣ୍ଡାରୀ ସ୍କୁଲ ଖୋଲା ଯାଇଥିଲା। ମାତ୍ର କିଛି ଘଣ୍ଟା ମଧ୍ୟରେ ତାଲିବାନ ନେତା ଏସବୁ ବନ୍ଦ କରିବାକୁ ନିର୍ଦ୍ଦେଶ ଜାରି କରିଥିଲେ।
ସ୍କୁଲ ବନ୍ଦ ଯୋଗୁ ୧୦ ଲକ୍ଷରୁ ଅଧିକ ବାଳିକା ଆବଶ୍ୟକୀୟ ଶିକ୍ଷାଦାନ ପାଇ ପାରୁ ନଥିବା ଆଫଗାନିସ୍ତାନରେ କାର୍ଯ୍ୟ କରୁଥିବା ଜାତିସଂଘ ସହାୟତା ମିଶନ ପକ୍ଷରୁ ସୂଚନା ପ୍ରଦାନ କରାଯାଇଛି।
ଆଫଗାନିସ୍ତାନ ଜାତିସଂଘ ସହାୟତା ମିଶନର ମୁଖ୍ୟ ମାର୍କୁସ ପୋଟଜେଲ୍ ତାଲିବାନର ଏଭଳି କାର୍ଯ୍ୟକୁ ନିନ୍ଦା କରିଛନ୍ତି। ଏହା ଦ୍ୱାରା ବାଳିକାଙ୍କ ଭବିଷ୍ୟତ ଅନ୍ଧକାରରେ ରହିଥିବା ସେ କହିଛନ୍ତି।
ଏନେଇ ଜାତିସଂଘ ମୁଖ୍ୟ ଆଣ୍ଟୋନିଓ ଗ୍ୟୁଟେରସ୍ କହିଛନ୍ତି ଯେ, ତାଲିବାନ ପରିସ୍ଥିତିକୁ ବୁଝି ଶୀଘ୍ର କଟକଣା ପ୍ରତ୍ୟାହାର କରିବା ଉଚିତ।
