ଭୁବନେଶ୍ୱର,୬।୯(ବ୍ୟୁରୋ): ରାଜଧାନୀରେ ବନ୍ଧୁକ ବିକ୍ରି କରିବାକୁ ଆସିଥିବା ପଶ୍ଚିମବଙ୍ଗର ଜଣେ ବେପାରୀଙ୍କୁ କମିଶନରେଟ ପୋଲିସ କାବୁ କିରିଛି। ରବିବାର ପୂର୍ବାହ୍ନରେ ଭରତପୁର ଥାନା ଅନ୍ତର୍ଗତ କୋଳଥିଆ ପଡିଆ ନିକଟରେ ବନ୍ଧୁକ ବିକ୍ରି ପାଇଁ ଗରାଖଙ୍କୁ ଅପେକ୍ଷା କରିଥିବାବେଳେ ପୋଲିସ ଗିରଫ କରିଛି। ସେ ହେଲେ ପଶ୍ଚିମବଙ୍ଗ ପଶ୍ଚିମ ମେଦିନପୁର ଜିଲା ଏଇଗ୍ରା ଥାନା ଅଞ୍ଚଳର ବାବୁଜାନ ଖାନ୍(୨୩)। ପୋଲିସ ତାଙ୍କଠାରୁ ୨ଟି ବନ୍ଧୁକ (ପିସ୍ତଲ) ଓ ୧୦ ରାଉଣ୍ଡ ଗୁଳି ଜବତ କରିଛି। ଏନେଇ ପୋଲିସ ଆମର୍ସ ଆକ୍ଟରେ ଏକ ମାମଲା (ନଂ.୩୧୫/୨୧) ରୁଜୁ କରି ଅଭିଯୁକ୍ତ ବାବୁଜାନ୍ଙ୍କୁ କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏ ସମ୍ପର୍କରେ ଥାନା ଅଧିକାରୀ ଜ୍ୟୋତିରଞ୍ଜନ ପତି କହିଛନ୍ତି, ବାବୁଜାନ କିଛିଦିନ ହେଲା ପଶ୍ଚିମବଙ୍ଗରୁ ବନ୍ଧୁକ ଆଣି ରାଜଧାନୀରେ ବିକ୍ରି କରିବାକୁ ଚାହିଁଥିଲେ। ଏଥିପାଇଁ ସେ ତାଙ୍କ ସମ୍ପର୍କୀୟ ଘର ପିପିଲିରେ କିଛିଦିନ ହେଲା ରହିଥିଲେ। ଭୁବନେଶ୍ୱରରେ ବନ୍ଧୁକ ବିକ୍ରି କରି ପଶ୍ଚିମବଙ୍ଗ ଚାଲିଯାଇଥାନ୍ତେ। ତେବେ ପୂର୍ବରୁ ସେ ଏଠାରେ ବନ୍ଧୁକ ବିକ୍ରି କରିଛନ୍ତି କି ନାହିଁ ସେନେଇ ଅଧିକ ତଦନ୍ତ ଚାଲୁଥିବା ଦାସ କହିଛନ୍ତି।
ସୂଚନା ଅନୁଯାୟୀ, ରବିବାର ଦିନ ପ୍ରାୟ ୧୨ଟାରେ କୋଳଥିଆ ପଡିଆ ନିକଟରେ ଅଭିଯୁକ୍ତ ବାବୁଜାନ ବନ୍ଧୁକ ଧରି ବୁଲୁଥିବା ସ୍ଥାନୀୟ ଲୋକେ ଦେଖି ଭରତପୁର ଥାନାକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚତ୍ ବାବୁଜାନ୍ଙ୍କୁ କାବୁ କରିବାକୁ ଘେରି ଯାଇଥିଲା। ହେଲେ ଅଭିଯୁକ୍ତ ପୋଲିସ କବଳରୁ ଖସି ପଳାଇବାକୁ ଘଟଣାସ୍ଥଳ ଛାଡି ଦୌଡିଥିଲେ। ସ୍ଥାନୀୟ ଲୋକଙ୍କ ସହାୟତାରେ କିଛି ସମୟ ପରେ ପୋଲିସ ତାଙ୍କୁ ଧରିବାରେ ସଫଳ ହୋଇଥିଲା।
