ଛତିଆ,୭ା୯(ଡି.ଏନ.ଏ.): ଯାଜପୁର ଜିଲା ବଡ଼ଚଣା ବ୍ଲକ ଅଧୀନ ୧୬ ନଂ. ଜାତୀୟ ରାଜପଥର ଛତିଆ ହନୁମାନ ଢାବା ନିକଟରେ ମଙ୍ଗଳବାର ସକାଳେ ଏକ ଆଳୁ ବୋଝେଇ ଟ୍ରକ୍ ଦୁର୍ଘଟଣାଗ୍ରସ୍ତ ହୋଇ ଓଲଟି ପଡ଼ିଥିଲା। କୋଲକାତାରୁ ଆଳୁ ବୋଝେଇ କରି କଟକ ଜଗତପୁରକୁ ଆସୁଥିବା ଟ୍ରକ୍ ନଂ. (ଡବ୍ଲ୍ୟୁବି-୩୩-ସି-୨୯୩୦) ଛତିଆ ହନୁମାନ ଢାବା ନିକଟରେ ପୂର୍ବରୁ ଛିଡ଼ା ହୋଇଥିବା ଏକ ସିମେଣ୍ଟ ବୋଝେଇ ଟ୍ରକ୍କୁ ପଛ ପଟୁ ଧକ୍କା ଦେଇଥିଲା।
ଦୁର୍ଘଟଣା ଯୋଗୁ ଟ୍ରକ୍ଟି ଓଲଟି ପଡ଼ିବାରୁ ରାସ୍ତାରେ ଏଣେ ତେଣେ ଆଳୁ ବିଛେଇ ହୋଇ ପଡ଼ିଥିଲା। ଆଳୁ ଉଠାଇବାରେ ଚାଳକ ଓ ହେଲଫରଙ୍କୁ ସାହାଯ୍ୟ କରିବା ବଦଳରେ ସ୍ଥାନୀୟ ଲୋକେ ଓ ରାଜପଥରେ ଯାତାୟାତ କରୁଥିବା ଅନ୍ୟ ଗାଡ଼ିଚାଳକମାନେ ବସ୍ତାବସ୍ତା ଆଳୁ ବୋହି ନେଇଥିଲେ। ଖବର ପାଇ ବୈରୀ ଥାନା ପୋଲିସ ଘଟଣାସ୍ଥଳରେ ପହଞ୍ଚିବା ପୂର୍ବରୁ ଟ୍ରକ୍ରୁ ଆଳୁ ଖାଲି ହୋଇଯାଇଥିଲା। ଏହି ଦୁର୍ଘଟଣାରେ କେହି ଆହତ ହୋଇ ନାହାନ୍ତି। ପୋଲିସ ଦୁର୍ଘଟଣାଗ୍ରସ୍ତ ଟ୍ରକ୍ ୨ଟିକୁ କ୍ରେନ୍ ସହାୟତାରେ ଉଠାଇବା ପରେ ଗାଡ଼ି ଚଳାଚଳ ସ୍ବାଭାବିକ ହୋଇଛି। ଏହି ଦୁର୍ଘଟଣା ଯୋଗୁ ପ୍ରାୟ ୪୫ ମିନିଟ୍ ଧରି ରାସ୍ତାରେ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଥିଲା।
