ଆୟାରଲାଣ୍ଡରେ ଏକ ରୋଚକ ଘଟଣା ଘଟିଛି। ୪ ବର୍ଷ ତଳେ ଜଣେ ଯୁବକ ବିମାନରେ ଯାଉଥିବାବେଳେ ଏକ ଅଘଟଣ ଘଟିଥିଲା। ବିମାନରେ ଯାଉଥିବାବେଳେ ଜଣେ କ୍ରୁ ମେମ୍ବର ସମ୍ପୃକ୍ତ ଯୁବକଙ୍କ ଗୋଡରେ ଚା’ ଢାଳିଦେଇଥିଲେ। ଏଥିରେ ତାଙ୍କ ଗୋଡର କିଛି ଅଂଶ ପୋଡି ହୋଇଯାଇଥିଲା। ପରେ ଯୁବକଙ୍କ ମା’ ବିମାନ କମ୍ପାନୀ ନାଁରେ ଏକ ମାମଲା ରୁଜୁ କରିଥିଲେ। ୪ ବର୍ଷ ପରେ ଏବେ କୋର୍ଟ ନିଜ ରାୟ ଶୁଣାଇଛନ୍ତି। ବିମାନ କମ୍ପାନୀ ପକ୍ଷରୁ ଯୁବକଙ୍କୁ କ୍ଷତିପୂରଣ ବାବଦରେ ୫୮ ଲକ୍ଷ ଦେବାକୁ ପଡିବ ବୋଲି କୋର୍ଟ ରାୟ ଶୁଣାଇଛନ୍ତି। ସୂଚନାଯୋଗ୍ୟ, ଡୁବଲିନ୍ରୁ ଇସ୍ତାନବୁଲ ଯାଉଥିବା ଏକ ବିମାନରେ ଆୟାରଲାଣ୍ଡରେ ରହୁଥିତ୍ବା ଏମରେ କରାକ୍ୟାଙ୍କ ସହ ଏହି ଦୁର୍ଘଟଣା ଘଟିଥିଲା। ସେତେବେଳେ ତାଙ୍କ ବୟସ ମାତ୍ର ୧୩ ବର୍ଷ ଥିଲା। ଏମରେଙ୍କ ମା’ଙ୍କ କହିବା ଅନୁଯାୟୀ, ଏହି ଘଟଣା ପରଠାରୁ ତାଙ୍କ ପୁଅ ମାନସିକ ଏବଂ ଶାରିରୀକ ଭାବେ ଖୁବ୍ ଆଘାତ ପାଇଛି। ପୁଅର ଗୋଡ ଶୁଖିବାକୁ ପ୍ରାୟ ୩-୪ ସପ୍ତାହ ଲାଗିଥିଲା। ଏବେ ପର୍ଯ୍ୟନ୍ତ ମଧ୍ୟ ପୋଡା ଦାଗ ରହିଛି ବୋଲି ସେ କହିଛନ୍ତି।
